ASYLLY DÄBE EÝERILIP...

Indi her gün bizi jemgyýetimiziň durmuşynda bolup geçjek möhüm waka — Türkmenistanyň Halk Maslahatynyň nobatdaky mejlisine ýakynlaşdyrýar. Demokratik, hukuk we dünýewi döwletimizde halk häkimiýetini amala aşyrmakda, ýurdumyzyň durnukly durmuş-ykdysady ösüşini, türkmen halkynyň bagtyýar, abadan durmuşyny üpjün etmekde ýokary wekilçilikli edara bolan Türkmenistanyň Halk Maslahatynyň işi iňňän uly ähmiýete eýedir. Bilşimiz ýaly, şu ýylyň 12-nji iýulynda Arkadagly Gahryman Serdarymyz Türkmenistanyň Ministrler Kabinetiniň giňişleýin mejlisini geçirip, “Pähim-paýhas ummany Magtymguly Pyragy” ýylynyň birinji ýarymynyň jemlerine seljerme berdi. Şu giňişleýin mejlisde-de döwlet Baştutanymyz mukaddes Garaşsyzlygymyzyň 33 ýyllygynyň baýramynyň bellenilýän günlerinde Türkmenistanyň Halk Maslahatynyň nobatdaky mejlisiniň geçiriljekdigini aýdyp, bu möhüm waka häzirden düýpli taýýarlyk görmegiň zerurdygyny nygtady. Şunuň bilen baglylykda, Türkmenistanyň Halk Maslahatynyň Prezidiumynyň kabul eden kararyna laýyklykda, Türkmenistanyň Halk Maslahatynyň nobatdaky mejlisini ak şäherimiz Aşgabatdaky Maslahat köşgünde şu ýylyň 24-nji sentýabrynda geçirmek bellenildi. 

Bu umumymilli forum jemgyýetimiziň durmuşynda taryhy waka bolmak bilen, onda döwlet ähmiýetli, il-gün bähbitli wajyp meseleler ara alnyp maslahatlaşylar. Garaşsyz, baky Bitarap Türkmenistan döwletimiziň mundan beýläk-de gülläp ösmegine gönükdirilen möhüm çözgütler kabul ediler. Görnüşi ýaly, halk bilen döwletiň bähbitleriniň bitewiligi we sazlaşygy Türkmenistan Watanymyzyň ähli ugurlar boýunça depginli ösüşini, döwletimiziň halkara abraýynyň has-da artmagyny, halkymyzyň bagtyýar, abadan durmuşyny şertlendirýär. Ýeri gelende aýtsak, bu ugurlarda ýetilýän belent sepgitleriň guwançly netijeleri bolsa, her bir raýatyň durmuşynda özüniň beýanyny tapýar. 

Türkmenistanyň Halk Maslahatynyň nobatdaky mejlisi milli demokratiýamyzyň asylly däpleriniň dowamat-dowam bolýandygynyň aýdyň subutnamasy bolar. Giň wekilçilikli bu umumymilli forumda döwletimiziň ähli ugurlar boýunça durnukly ösdürilmegine, raýat jemgyýetimiziň mundan beýläk-de demokratiýalaşdyrylmagyna ýardam etjek taryhy çözgütleriň kabul ediljekdigi guwandyrýar. 

Begenç GURBANGELDIÝEW. 

Türkmenistanyň “Halk bank” paýdarlar täjirçilik bankynyň Tagtabazar etrap şahamçasynyň dolandyryjysy wezipesini wagtlaýyn ýerine ýetiriji, Türkmenistanyň Mejlisiniň deputaty.