TARYHY ÇÖZGÜTLER WAGYZ EDILDI

«Tegelek stoluň» başyndaky söhbetdeşlikden

Türkmenistanyň Halk Maslahatynyň mejlisiniň çözgütlerini wagyz etmek, hormatly Prezidentimize Türkmenistanyň Gahrymany diýen belent adyň dakylmagyny dabaralandyrmak maksady bilen, golaýda «Daşoguz habarlary» gazetiniň redaksiýasynyň, welaýat halk maslahatynyň, welaýat kitaphanasynyň, TDP-niň Daşoguz şäher komitetiniň bilelikde guramagynda «tegelek stoluň» başynda söhbetdeşlik geçirildi. 

Söhbetdeşlik Mejlisiň deputatlarynyň, welaýat, şäher halk maslahatynyň wekilleriniň, Halk Maslahatynyň mejlisine gatnaşyjylaryň gatnaşmagynda welaýat kitaphanasynda «Türkmenistanyň Halk Maslahaty: taryhy ösüşlere badalga» atly şygar astynda geçirildi.Söhbetdeşligiň dowamynda Mejlisiň deputatlary — Boldumsaz etrabynyň Zähmetkeş geňeşliginiň Geňeşiniň hünärmeni Aşyr Toýlyýew, Akdepe etrap bilim bölüminiň hünärmeni Mähriban Kurambaýewa, welaýat halk maslahatynyň agzalary - TDP-niň Şabat etrap komitetiniň başlygy Täzebaý Şermetow, welaýat kitaphanasynyň kitaphanaçysy Mähri Bekiýewa, welaýat Taryhy we ülkäni öwreniş muzeýiniň direktory, şäher halk maslahatynyň başlygy Allanazar Garajanow, Beki Seýtäkow adyndaky mugallymçylyk mekdebiniň mugallymy, Halk Maslahatynyň mejlisine gatnaşyjy Sylap Atabaýew dagy çykyş edip, umumymilli forumyň çözgütleri barada pikir alyşdylar. 

Çykyşlarda bellenilip geçilişi ýaly, Gahryman Arkadagymyzyň başlyklyk etmeginde geçirilen umumymilli forum taryhy ähmiýetliligi taýdan ýokary derejä eýe boldy. Ol Arkadag Serdarly bagtyýar ýaşlar ýylynyň bir-birine utgaşýan belent tutumlarynyň üstüni ýetirdi we şol bir wagtyň özünde halk bilen hormatly Prezidentimiziň baky jebisligini tutuş aýdyňlygy bilen açyp görkezdi. Gahryman Arkadagymyzyň hem-de hormatly Prezidentimiziň Halk Maslahatynyň mejlisinde eden taryhy çykyşlaryndan gelip çykýan wezipeleriň ählisi döwlet syýasatynyň ugurlarynda ýerine ýetirilen işlere we öňde goýlan belent maksatlara gönükdirildi. Ol tutumlaryň ýurdumyzda uzak geljegi nazarlaýan maksatnamanyň esasynda amala aşyrylýandygy nukdaýnazaryndan, bellenilen sepgide maksat edilişine laýyk ýetiljekdigine doly kepil geçýär. Bu bolsa döwlet hem jemgyýetçilik durmuşynyň ösüşiň täze menzillerini nazarlaýandygy, ýurduň ylmyň iň soňky gazananlaryna laýyk derejede kuwwatlanmagyna uly mümkinçilikleriň döredilýändigi, şol bir wagtyň özünde dünýä giňişliginde ornunyň çuňlaşýandygy häsiýetliligine uly esas döredýär. 

Halk Maslahatynyň mejlisinde kabul edilen taryhy çözgüt, ýagny merdana halkymyzyň ýürek arzuwlary, umumy milli foruma gatnaşan ýaşulularyň isleg-haýyşlary nazarda tutulyp, hormatly Prezidentimize Türkmenistanyň Gahrymany diýen belent adyň dakylmagy baky bitewüligiň mizemez häsiýete eýedigini ýene bir ýola subut etdi. Çünki Arkadagly Gahryman Serdarymyz döwlet Baştutany wezipesine girişen ilkinji gününden Gahryman Arkadagymyzyň göreldesine eýerip, ýurdumyzy hem jemgyýetimizi ösdürmegiň baş ugruna öwrülen «Döwlet adam üçindir!» diýen belent şygaryň dowamatyna «Watan diňe halky bilen Watandyr! Döwlet diňe halky bilen döwletdir!» diýen taglymaty bilen dowam berip, halkyň bagtyýar durmuşynyň hatyrasyna beýik işleri amal edip gelýär. Täze taryhy döwrüň belent tutumlaryna şan berjek maksatnamany öňe sürüp, onuň tapgyrlaýyn esasda durmuşa geçirilmegini gazanmaga uly ähmiýet berýän hormatly Prezidentimiziň her bir tutumy asylly işlere badalga bolup, durmuş hakykatynda öz beýanyny tapýar. Ol Arkadagly Gahryman Serdarymyzyň umumymilli forumda eden çuň manyly çykyşynda döwletimiziň  Hökümetiniň ýerine ýetiren işleri we öňde duran wezipeleri barada belläp geçmeginde hem aýdyň görünýär. 

Şeýle hem çykyş edenler taryhy çözgütleriň öňde täze wezipeleri goýýandygy, oňa her bir raýatyň öz ornunda mynasyp iş bilen jogap bermelidigi dogrusynda nygtap geçdiler. Halkymyzy eşretli durmuşda ýaşadýan, döwletimizi ösüşiň belent sepgitlerine alyp barýan Gahryman Arkadagymyzyň we Arkadagly Gahryman Serdarymyzyň atlaryna tüýs ýürekden hoşallyk sözlerini aýtdylar. 

«Daşoguz habarlary»