«AKSAKGAL AK BAŞ BOLAR...»

Halkymyzda: «Aksakgal ak baş bolar, ýöne göwni ýaş bolar» diýlişi ýaly, bu günki gün kalby juwan ýaşulularymyz ähli başlangyçlarymyzyň, toý-baýramlarymyzyň bismillaçysy. «Pähim-paýhas ummany Magtymguly Pyragy» ýylymyzyň ahyrky günlerinde alysdan-ýakyndan myhman çagyryp toýlanan Halkara Bitaraplyk gününiň öň ýanynda-da ýaşulularymyz döwre gurap, maslahat etdi. Gahryman Arkadagymyzyň ýolbaşçylygynda 10-njy dekabrda geçirilen Türkmenistanyň Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň mejlisinde amal edilen işlere seljerme berlip, geljegiň wezipeleri kesgitlenildi. Gahryman Arkadagymyzyň mejlisde belleýşi ýaly, döwletimiziň alyp barýan içeri we daşary syýasatyny halka ýetirmekde, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň işini ilerletmekde, ýaşlary milli däp-dessurlarymyz esasynda terbiýelemekde Halk Maslahatynyň hem-de Ýaşulular geňeşiniň agzalary mynasyp işleri alyp barýarlar. Munuň özi halkymyzyň asyrlaryň aňyrsyndan gözbaş alýan asylly ýörelgeleriniň bagtyýar döwrümizde-de mynasyp dowam edýändigini görkezýär. 

Bu günki gün Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy ynsanperwerligiň nusgasyna öwrüldi. Döredileli bäri geçen gysga döwürde geljek barada süýji arzuw etmek mümkinçiligi gaýtarylyp berlen, agyr kesellerden saplanan çagalaryň, olaryň ene-atalarynyň ýürek seslerini diňläniňde, daşary ýurtlaryň çagalarynyň ykbalyna röwşenlik çaýylan pursatlary hakyda getireniňde, bu sogaply işleriň gözbaşynda duran Gahryman Arkadagymyza alkyş aýdýarsyň. 

Toý-baýram alyslary ýakyn edýär. Gardaşlary, dogan-garyndaşlary bereket suprasynyň başyna jemleýär. Oňa jemlenen märeke toý eýesiniň abraýyndan habar berýär. Hemişelik Bitaraplygymyzyň 29 ýyllyk toýuna alysdan-ýakyndan gelýän myhmanlary göreniňde-de, şu geçilen menzillerde Garaşsyz Türkmenistanyň halkara derejesindäki abraý-mertebesiniň näderejede belentdigine göz ýetirýärsiň. Gahryman Arkadagymyzyň toýumyzy gutlap gelen Türki Döwletleriň Guramasynyň Aksakgallar geňeşiniň başlygy Binali Ýyldyrym bilen duşuşygynda hem Türkmenistanyň dünýä ýurtlary bilen köpugurly hyzmatdaşlygy ösdürmäge uly ähmiýet berýändigi aýratyn bellenildi. Türkmenistan bilen TDG-niň arasyndaky gatnaşyklaryň hil taýdan täze derejä çykarylýandygy muňa mysaldyr. Duşuşygyň dowamynda Gahryman Arkadagymyzyň TÜRKSOÝ guramasynyň işi bilen baglanyşykly täze teklipleri orta atmagy gatnaşyklaryň gerimini giňeltmek arkaly ösüşlere ýetmegiň zamanamyzyň ýörelgesine öwrülendiginiň subutnamasydyr. 

Milli Liderimiziň belleýşi ýaly, gatnaşyklar dialog arkaly ýola goýulýar. Halk Maslahatynyň hem-de Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýanyndaky Ýaşulular geňeşiniň, şonuň ýaly-da Türki Döwletleriň Guramasynyň Aksakgallar geňeşiniň işi hem Milli Liderimiziň öňe süren «Dialog — parahatçylygyň kepili» atly ýörelgesi bilen ugurdaşdyr. Çünki olar hut dialog — söz arkaly ýüreklere ýetmek ýörelgesi bilen iň gowy başlangyçlary durmuşa ornaşdyrýarlar. Her bir günümizi oňyn özgerişliklere, toý-baýrama besleýän Gahryman Arkadagymyzyň, hormatly Prezidentimiziň janlary sag, ömürleri uzak bolsun! 

Perman SAPAROW, 

Türkmenistanyň Mejlisiniň Durmuş syýasaty 

baradaky komitetiniň baş hünärmeni.