ASYLLY ÝÖRELGÄNIŇ BEÝANY

     Hemişelik Bitaraplygynyň 30­ýyllyk şanly toýuna beslenýän eziz Watanymyz durmuşyň ähli ugurlary boýunça uly üstünliklere eýe bolýar, täze sepgitlere tarap bedew bady bilen öňe barýar. Hormatly Prezidentimiziň parasatly baştutanlygynda hemişelik  Bitarap döwletimiziň  halkara abraýy has­da artýar. Garaşsyz ýurdumyz ata­babalarymyzyň ajaýyp däp­dessurlaryna, dost­doganlyk ýörelgelerine gyşarnyksyz eýermek bilen, oýlanyşykly we pähim­paýhasly, hoşniýetli daşary syýasaty alyp barýar.

     Häzirki döwürde halkymyzyň parahatçylyk söýüjilik ýörelgeleri dünýä ýaýylýar. Şunda ýurdumyzyň hemişelik Bitaraplygynyň orny aýratyn ähmiýete eýedir. Çünki hemişelik Bitaraplyk syýasatyny üstünlikli durmuşa geçirýän ýurdumyz bu günki­günde sebitiň we dünýäniň parahatçylygy ugrunda tagallalary edýär. Ýurdumyzyň BMG­niň Baş Assambleýasynyň 79­njy mejlisiniň wise-başlyklygyna saýlanmagy, Türkmenistanyň başlangyjy bilen, Birleşen Milletler Guramasynyň Baş Assambleýasy tarapyndan “2025­nji ýyl Halkara parahatçylyk we ynanyşmak ýyly” hem-de “Merkezi Aziýa- parahatçylyk,ynanyşmak we hyzmatdaşlyk zolagy” atly Kararnamalaryň biragyzdan kabul edilmegi aýratyn bellärliklidir. Hut şu buýsandyryjy maglumatlar hem türkmen Bitaraplygynyň dünýäde we sebitde parahatçylygyň asylly ýörelgesini rowaçlandyrýandygyny beýan edýär. 

     Berkarar döwletiň täze eýýamynyň Galkynyşy döwründe ýurdumyzyň alyp barýan hoşniýetli daşary syýasatynyň esasy ýörelgesi Birleşen Milletler Guramasynyň Baş Assambleýasynyň 1995­nji ýylyň 12­nji dekabrynda we 2015­nji ýylyň 3­nji iýunynda hem­de 2025­nji ýylyň 21­nji martynda «Türkmenistanyň hemişelik Bitaraplygy» atly kabul eden Kararnamalary bilen ykrar edilen Türkmenistanyň hemişelik Bitaraplyk hukuk ýagdaýy bolup durýar. Ýurdumyzyň hemişelik Bitaraplyk hukuk ýagdaýy halkara giňişliginde aýratyn ähmiýet berilýän mertebämizdir. Ýurdumyzyň oňyn Bitaraplyk syýasaty biziň milli ýörelgämizdir.

      Birleşen Milletler Guramasynyň Baş Assambleýasy tarapyndan ýörite Kararnamalar bilen üç gezek ykrar edilen dünýäde ýeke­täk döwlet biziň Garaşsyz, hemişelik Bitarap Türkmenistan döwletimizdir. Dünýäde özüniň Esasy Kanunynda - Konstitusiýasynda hemişelik Bitaraplyk hukuk ýagdaýyny beýan eden, hemişelik Bitaraplygy hakynda Konstitusion kanuny bolan döwletimize biziň buýsanjymyz elmydama belentdir. Oňyn Bitaraplyk syýasatyny alyp barýan döwletimizde Halkara parahatçylyk we ynanyşmak ýylynda il­ýurt bähbitli, dünýä jemgyýetçiligi üçin ähmiýetli döwrebap işler amala aşyrylýar. Bu işler şu günümizi we röwşen geljegimizi üpjün edip, halk we umumadamzat bähbitlerine eýe bolup durýar. Il­ýurt bähbitli, halkara ähmiýetli beýik işleri amala aşyrýan Gahryman Arkadagymyzyň, Arkadagly Gahryman Serdarymyzyň janlary sag,ömürleri uzak bolsun!

Perman SAPAROW, 

Türkmenistanyň Mejlisiniň 

Durmuş syýasaty baradaky komitetiniň baş hünärmeni