ASYLLY ÝÖRELGELER DABARALANÝAR

     Her ýyl ýurdumyzda hormatly Prezidentimiziň Permany bilen bellenilýän Gurban baýramy halkymyzyň agzybirligini we jebisligini has­da berkidýär. Ol hoşmeýillilige, mähribanlyga we

ýagşylyga çagyryp, adamlaryň köňlüni päkleýär. 

     Gahryman  Arkadagymyz «Ömrümiň manysy» atly eserinde: «Gurban baýramy günlerinde hiňňildik uçmak uly şadyýanlygy, ruhubelentligi döredýär. «Hiňňildik uçmak bilen günäleriň dökülýär» diýen gadymy ynanç şu günlerde-de ýaşaýar. Hiňňildik uçulýan ýerlerde joşgunly aýdym sazlar belentden ýaňlanýar. Adamlar, aýratyn hem, ýaşlar ol ýerlere köpçülikleýin barýarlar. Bu ýagdaýlar adamlara uly lezzet berýär, ruhubelentlik paýlaýar, olaryň birek­birek bilen gatnaşygyny, agzybirligini berkidýär» diýip belleýär. 

     Türkmen topragynda gadymdan bäri aýratyn sarpalanýan bu baýramçylyk milli senenamamyzyň ähmiýetli seneleriniň sanawyna girizilmegi bilen, ata­babalarymyzyň ajaýyp däplerini dowam edýän halkymyz ony şatlyk bilen garşy alýar. Şol günler täze egin­eşikler geýilýär, öý içerä serenjam berilýär, her bir öýde myhmanlar üçin datly tagamlar taýýarlanylýar. Gatlama, ýagly petir, çelpek, maýaly petir, pişme, owmaç ýaly dürli nygmatlar bereketli saçaklarymyzda bol bolýar. Myhmanlara palaw, dograma, ýarma, çekdirme, gowurma ýaly milli tagamlar hödürlenýär.

     Türkmen halkynyň ruhy­ahlak gymmatlyklaryna kybap gelýän, hoşniýetliligi, päk ýürekliligi we ynsanperwerligi ündeýän Gurban baýramyny ýokary ruhubelentlikde bellemäge ähli mümkinçilikleri döredýän, milli däp­dessurlarymyza aýratyn ähmiýet berýän türkmen halkynyň Milli Lideri Gahryman Arkadagymyzyň hem­de hormatly Prezidentimiziň janlary sag, ömürleri uzak bolsun! Gurbanlygyňyz kabul bolsun, eziz ildeşler!

Ýakup ATABAÝEW,

Türkmenistanyň Mejlisiniň deputaty, Mejlisiň Halkara we 

parlamentara aragatnaşyklar baradaky komitetiniň agzasy.