IL BÄHBITLI TAGALLALAR

Berkarar döwletiň täze eýýamynyň Galkynyşy döwründe ilatyň saglygyny goramakda we berkitmekde ýokary netijelere eýe bolunýar. Hormatly Prezidentimiziň taýsyz tagallalary bilen Arkadag Serdarly bagtyýar ýaşlar ýylynda-da bu ulgamda bitirilýän il-gün bähbitli işleriň bady artýar. Ýurdumyzda gurlup, ulanmaga berilýän döwrebap hassahanalar, saglyk merkezleri we beýlekiler halka edilýän lukmançylyk hyzmatynyň hilini ýokarlandyrmaga mümkinçilik berýär. Üstümizdäki ýylyň sentýabr aýynda Gahryman Arkadagymyzyň başlyklyk etmeginde geçirilen Türkmenistanyň Halk Maslahatynyň mejlisinde Garaşsyz, Bitarap döwletimizi mundan beýläk-de ösdürmegiň wajyp wezipeleri ara alnyp maslahatlaşyldy. 

Şu ählumumy forumda Garaşsyzlygymyzyň we Bitaraplygymyzyň binýatlyk esaslaryny berkidip, abadan geljegine barýan ata Watanymyzy ähli ugurlar boýunça durnukly ösdürmegiň meselelerine garaldy. Ýurdumyzyň halk hojalygynyň dürli pudaklary bilen birlikde, saglygy goraýyş, ylym-bilim, sport we beýleki ulgamlarda öňde durýan wezipeler kesgitlenildi. Aýratynam, saglygy goraýyş ulgamynyň işini döwrebaplaşdyrmak bilen bagly durmuşa geçirilen we geçirilýän işler il-günümizde guwanç duýgusyny döredýär. Türkmenistanyň Halk Maslahatynyň nobatdaky mejlisinde eden maksatnamalaýyn çykyşynda hormatly Prezidentimiz Serdar Berdimuhamedow: “Saglygy goraýyş ulgamy depginli ösdürilip, halkymyza dünýä ülňülerine laýyk gelýän lukmançylyk hyzmatlary edilýär” diýip belledi. 

Çary GURBANMYRADOW. 

Mary etrap hassahanasynyň 2-nji çagalar bölüminiň müdiri, Türkmenistanyň Mejlisiniň deputaty.