Özbegistan Respublikasynyň Buhara şäherinde geçirilen Zenanlaryň ikinji Aziýa forumynyň «Ylymda, bilimde, daşky gurşawyň durnuklylygynda, innowasiýalarda we emeli aňda zenanlar: indiki nesil üçin mümkinçilikler» atly tema boýunça geçirilen bölüminde türkmen wekiliýetiniň agzasy çykyş edip, «Ýaşyl tehnologiýalar we ekologiýa» temasynyň häzirki döwürde diňe bir ylmyň däl, eýsem, global ykdysady we durnukly ösüşiň esasy bolup durýandygy barada belledi.

Şeýle hem daşky gurşawy goramakda we tebigy baýlyklary netijeli ulanmakda, suw serişdelerini rejeli peýdalanmakda, ekologiýa durnuklylygyny üpjün etmekde bilelikdäki tagallalaryň ähmiýeti, bu ugurda Türkmenistanyň halkara başlangyçlary, ýaşyl ykdysadyýete geçmegiň ileri tutulýan ugurlary barada durlup geçildi.

Şunuň bilen birlikde, ýurdumyzda tokaý zolaklaryny döretmek boýunça alnyp barylýan giň gerimli işlere, Türkmenistanda gaýtadan dikeldilýän energiýa çeşmelerini ösdürmegiň milli strategiýasynyň, daşky gurşawy goramak babatynda kabul edilen kanunlaryň we beýleki kadalaşdyryjy hukuk namalarynyň durmuşa geçirilişine ünsi çekildi. 

Bu forumyň sebitiň zenanlarynyň tejribe alyşmagy we täze başlangyçlara itergi berilmegi üçin möhüm meýdança bolup durýandygy bellenildi.

Özbegistan Respublikasynyň Buhara şäherinde geçirilen Zenanlaryň ikinji Aziýa forumynyň «Döwlet we jemgyýetçilik dolandyryşynda, şeýle hem syýasy kararlary kabul etmekde zenanlaryň gatnaşygyny giňeltmegiň häzirki zaman meseleleri» atly tema boýunça bölüminde ýurdumyzyň milli parlamentiniň wekili çykyş edip, Türkmenistanda zenanlaryň hukuklaryny, durmuş goraglylygyny üpjün etmek we mümkinçiliklerini giňeltmek, olaryň jemgyýetdäki tutýan ornuny ýokarlandyrmak babatdaky işleriň hormatly Prezidentimiz Serdar Berdimuhamedowyň taýsyz tagallalary bilen oňyn başlangyçlar esasynda işjeňleşdirilýändigini belledi. Döwlet dolandyryşynda we kanun çykaryjy edaralarda zenanlaryň işjeňliginiň saglygy goraýyş, bilim we durmuş goraglylygy ýaly ugurlarda kanunçylyk binýadynyň has-da kämilleşmegine ýardam berýändigi nygtaldy. 

Çykyş edenler döwlet we jemgyýetçilik dolandyryşynda, şeýle-de syýasy kararlary kabul etmek işinde zenanlaryň gatnaşygyny giňeltmek, ornuny ýokarlandyrmak, häzirki zaman çemeleşmeleri we parlament tejribesi, zenan ýolbaşçylygyny ösdürmek arkaly inklýuziw dolandyryşy üpjün etmekde döwletleriň tejribeleri barada giňişleýin belläp geçdiler. 

Şeýle hem zenanlaryň mümkinçiliklerini giňeltmek we häzirki zaman jemgyýetinde olaryň ornuny pugtalandyrmak babatda tejribe alyşmagyň, döwrüň çagyryşlaryny we mümkinçiliklerini ara alyp maslahatlaşmagyň, şeýle hem halkara hyzmatdaşlygy ösdürmek barada durmuşa geçirilýän işleriň, gazanylýan netijeleriň sebit derejesinde umumy görkezijileriniň ýokarlanmagyna we oňyn tejribeleriň artmagyna ýardam edýändigi, bu forumyň sebitiň zenanlarynyň tejribe alyşmagy we täze başlangyçlara itergi berilmegi üçin möhüm meýdança bolup durýandygy bellenildi.

2026-njy ýylyň 14-nji maýynda Türkmenistanyň Mejlisiniň Başlygy D.Gulmanowanyň Özbegistan Respublikasynyň Buhara şäherine iş saparynyň çäklerinde Azerbaýjan Respublikasynyň Milli Mejlisiniň Başlygy S.Gafarowa bilen duşuşygy geçirildi. 

Taraplar iki ýurduň döwlet Baştutanlarynyň tagallalary bilen ikitaraplaýyn we köptaraplaýyn görnüşde, şeýle hem abraýly halkara guramalaryň çäklerinde döwletara hyzmatdaşlyk gatnaşyklarynyň üstünlikli ösdürilýändigini bellediler.   

Duşuşygyň dowamynda iki dostlukly ýurduň arasynda işjeň ösdürilýän döwletara gatnaşyklarda parlamentara hyzmatdaşlygyň möhüm orny bellenildi. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň geçen ýylyň iýul aýynda Azerbaýjan Respublikasyna amala aşyran taryhy saparynyň iki ýurduň arasyndaky parlamentara we döwletara gatnaşyklaryň ýokary derejä çykmagynda we gazanylan ylalaşyklaryň sebitde energetika we ulag-üstaşyr geçelgelerini ösdürmekde möhüm ähmiýete eýe bolandygy nygtaldy.  

Türkmen tarapy iki ýurduň halklaryny gadymyýetden gelýän taryhy kökleriň, medeni we ruhy umumylyklaryň baglanyşdyrýandygyny, häzirki wagtda özara hormat goýmaga, ynanyşmaga we deňhukuklylyga esaslanýan bu gatnaşyklaryň ähli ugurlar boýunça üstünlikli ösdürilýändigini we täze mazmun bilen baýlaşdyrylýandygyny belledi. 

Duşuşykda Türkmenistan bilen Azerbaýjan Respublikasynyň arasyndaky giň möçberli, deňhukukly we özara bähbitli gatnaşyklary mundan beýläk-de ösdürmekde iki döwletiň halkara hukuk ulgamyndaky hyzmatdaşlygyna uly orun degişlidigi bellenildi. Bu gatnaşyklar bolsa halklaryň arasyndaky dost-doganlygy has-da pugtalandyrmaga, döwletara gatnaşyklaryny parlament diplomatiýasynyň üsti bilen goldamaga ýardam berýändigi barada nygtaldy. Şeýle hem geljekde parlamentara dostluk toparlarynyň  çäklerinde tejribe alyşmak we kanun çykaryjylyk işinde ýakyndan hyzmatdaşlyk etmek barada pikir alşyldy.

Türkmenistanyň Mejlisiniň Başlygy D.Gulmanowa                               ýurdumyzyň şu  ýyl  Garaşsyz Döwletleriň Arkalaşygynda hem-de Merkezi Aziýa ýurtlarynyň we Azerbaýjanyň döwlet Baştutanlarynyň konsultatiw duşuşygynda başlyklyk etmeginiň çäklerinde «Awaza» milli syýahatçylyk zolagynda durnukly ösüşi üpjün etmekde oňyn tejribeleri paýlaşmak we öňde durýan wezipeleri ara alyp maslahatlaşmak boýunça geçiriljek halkara we parlamentara çärelerine gatnaşmaga çagyrdy.

Türkmenistanyň Konstitusiýasynyň we Döwlet baýdagynyň güni mynasybetli 2026-njy ýylyň 14-nji maýynda Türkmenistanyň Mejlisinde göni wideoaragatnaşyk arkaly geçirilýän «Konstitusiýa döwletleriň ösüşiniň we jemgyýetiň abadançylygynyň hukuk kepili» atly maslahat öz işine başlady.

Bu maslahata Birleşen Milletler Guramasynyň düzüm birlikleriniň Türkmenistandaky wekilhanalarynyň ýolbaşçylary, Ýewropa Bileleşiginiň Türkmenistandaky Adatdan daşary we Doly ygtyýarly Ilçisi, Merkezi Aziýa ýurtlarynyň we Azerbaýjan Respublikasynyň parlamentleriniň wekilleri gatnaşýarlar. 

Maslahatyň esasy maksady hukuk ulgamynda öňdebaryjy tejribeleri alyşmakdan, döwletimiziň hemişelik Bitaraplyk hukuk ýagdaýyna daýanyp, amala aşyrýan il-ýurt bähbitli işlerini, umumadamzat ähmiýetli başlangyçlaryny, dünýewi we hukuk döwletini gurmagyň tejribesini dünýä jemgyýetçiligine ýetirmekden ybaratdyr.