MAKSATLY TUTUMLAR — ROWAÇLYGYŇ KEPILI

Berkarar döwletiň täze eýýamynyň Galkynyşy döwründe ýurdumyzda her bir raýatyň syýasy, ykdysady, durmuş taýdan goraglylygyny üpjün etmek, döwletiň we jemgyýetiň demokratik kadalaryny, hukuk esaslaryny berkitmek babatdaky giň gerimli işler jemgyýetimiziň öňünde täze wezipeleri goýýar. «Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasynda» hem Garaşsyz Watanymyzy mundan beýläk-de depginli ösdürmek, halkymyzyň ýaşaýyş-durmuş şertlerini iň ýokary derejelere çykarmak ýaly belent wezipeleri kesgitlenilýär. Türkmenistanyň Halk Maslahatynyň Prezidiumynyň 22-nji fewralda geçirilen mejlisinde bu Maksatnamany üstünlikli durmuşa geçirmek boýunça «Pähim-paýhas ummany Magtymguly Pyragy» ýylynda ýerine ýetirilmeli işleriň esasy ugurlary boýunça çäreleriň Meýilnamasy ara alnyp maslahatlaşyldy. 

Gahryman Arkadagymyzyň mejlisde eden çykyşynda «Berkarar döwletiň täze eýýamynyň Galkynyşy: Türkmenistany 2022-2052-nji ýyllarda durmuş-ykdysady taýdan ösdürmegiň Milli maksatnamasyndan», «Türkmenistanyň Prezidentiniň ýurdumyzy 2022-2028-nji ýyllarda durmuş-ykdysady taýdan ösdürmegiň Maksatnamasyndan» ugur alnyp işlenilip düzülen Maksatnamany amala aşyrmakda öňde duran wezipeleri birnäçe aýratynlyklar boýunça kesgitledi. Olarda önümçilik kärhanalarynyň kuwwatlyklarynyň doly işledilmegini gazanmak, gaýtadan işleýän senagaty ösdürmek, eksporty artdyrmak we importyň ornuny tutýan önümçilikleri ösdürmek, ekologik taýdan arassa, ýokary hilli önümleriň öndürilişini artdyrmak, amatly işewürlik gurşawyny döretmek esasy wezipeleriň hatarynda görkezilýär. Gahryman Arkadagymyz Maksatnama boýunça amala aşyrylmaly işleriň öňdebaryjy tehnologiýalary, sanly ulgamlary giňden ornaşdyrmaklyga, amatly işewürlik gurşawyny döretmeklige, döwlete dahylsyz bölegi ösdürmeklige esaslanmalydygyny aýratyn belläp geçdi. Akyldar Pyragynyň wesýetlerini kalbyna guýup, bir başa uýýan halkymyzyň agzybirlikli zähmeti netijesinde ýurdumyzda 2009-njy ýyldan bäri ortaça 6 göterimden ýokary ösüşiň gazanylandygy, soňky 15 ýylyň dowamynda jemi içerki önümiň möçberiniň 3,7 esse artandygy, öndürilýän önümleriň görnüşleriniň barha artmak bilen, hil babatda dünýä ölçeglerine laýyk gelýändigi, geçen ýyllar bilen deňeşdirilende, 2023-nji ýylda öndürilen senagat önümleriniň möçberiniň 3 esseden gowrak köpelendigi maksatly aşylan menzilleriň ajaýyp miwe berýändiginiň buýsandyryjy mysalydyr. 

Ýurdumyzyň içerki we daşarky ösüşleri bilen bir hatarda türkmen halkynyň Milli Lideri, hormatly Prezidentimiz tarapyndan tassyklanan Maksatnamada göz öňünde tutulan, ykdysady, maliýe, durmuş, önümçilik, kanunçylyk ulgamlaryna degişli ýerine ýetirilmeli işleriň çäklerinde howandarlyga mätäçlere hemaýat bermegi ösdürmek, her bir adamyň, ylaýta-da, çagalaryň bagtyýar durmuşyny üpjün etmek babatdaky başlangyçlary kanunçylyk taýdan berkitmegi möhüm meseleleriň biri hökmünde kesgitledi. Bu kesgitlenilen wezipeleri halkymyz «Pähim-paýhas ummany Magtymguly Pyragy» ýylynyň dowamynda ýurdumyzyň ösüşiň täze belentliklerine çykjakdygynyň, halkymyzyň ýaşaýyş-durmuş derejesiniň has-da ýokary galjakdygynyň ýolgörkezijisi hökmünde kabul etdi. 

Gahryman Arkadagymyz «Türkmenistany 2024-nji ýylda durmuş-ykdysady taýdan ösdürmegiň we maýa goýum Maksatnamasyny» durmuşa geçirmegiň çäklerinde kanunçylygy kämilleşdirmekligi guramaçylykly dowam etdirmek bilen baglanyşykly ýerine ýetirilmeli işleriň we geçirilmeli çäreleriň ýokary guramaçylyk derejesini üpjün etmek hakdaky aýdanlary Garaşsyz, hemişelik Bitarap Türkmenistanyň her bir raýaty üçin geljekki ädimleriň şamçyragyna öwrüler. Bu şeýle-de bolar. Çünki ajaýyp zamanamyzda durmuşa geçirilýän işlerde hemişe halkyň ýürek isleginden ugur alynýar. Munuň şeýledigini Gahryman Arkadagymyzyň öz taryhy çykyşynda il-ýurt bähbitli taryhy başlangyçlar, kabul edilen resminamalar babatda wagyz-nesihat işleriniň, duşuşyklaryň, maslahatlaryň geçirilmeginiň, köpçülikleýin habar beriş serişdelerinde täsirli çykyşlaryň guralmagynyň wajypdygyna ünsi çekmegi hem ýene bir ýola aýdyň görkezdi. 

Garaşsyz, hemişelik Bitarap ýurdumyzyň barha gülläp ösmegi, halkymyzyň eşretli durmuşda ýaşamagy üçin giň möçberli özgertmeleri durmuşa geçirýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak, gadamlary şowly bolsun! 

Perman SAPAROW, 

Türkmenistanyň Mejlisiniň Durmuş syýasaty 

baradaky komitetiniň baş hünärmeni