ENERGETIKA PUDAGYNYŇ ÝEŇIŞLI GADAMLARY

Berkarar döwletiň täze eýýamynyň Galkynyşy döwrüniň ýyllary uly zähmet ýeňişlerine, taryhy wakalara beslenýär. Döwlet Baştutanymyzyň parasatly içeri we daşary syýasaty netijesinde Garaşsyz, baky Bitarap Türkmenistan döwletimiz ähli ugurlar boýunça ösüşli menziller bilen ynamly öňe barýar. Ýurdumyzyň dünýäniň ösen döwletleriniň hataryna goşulmagynda guwançly sepgitlere ýetilýär. 

Milli ykdysadyýetimiziň durnukly ösdürilmeginde elektroenergetika pudagyna möhüm orun degişlidir. Ýurt Baştutanymyzyň başda durmagynda bu möhüm pudakda ägirt uly işler durmuşa geçirilýär. Mary DES-niň çäginde kuwwaty 149,2 megawat bolan täze gaz turbina elektrik stansiýasy gurlup, ulanylmaga berildi. Şeýlelikde, ýurdumyzda elektrik energiýasynyň öndürilişini artdyrmakda möhüm ädim ädildi. 

Bilşimiz ýaly, halk hojalygynyň durnukly we sazlaşykly ösdürilmeginde uly orny eýeleýän elektroenergetika pudagyny ösdürmäge örän uly ähmiýet berilýär. Diňe bir Garaşsyz Türkmenistanymyzda däl, eýsem, sebitde iri desga bolan kuwwaty 1574 megawata deň täze elektrik stansiýasynyň işe girizilmegem milli ykdysadyýetimizi ösdürmekde guwançly waka bolupdy. 

Täze elektrik stansiýasynyň möhüm aýratynlyklarynyň birem onuň “ýaşyl tehnologiýalara” beslenenligindedir. Beýle diýildigi ýurdumyzda elektrik energiýasynyň öndürilişiniň birnäçe esse ýokarlanmagyna ýardam etjek bu desgada daşky gurşawa zyňylýan zyýanly galyndylaryň möçberiniň köp mukdarda azalandygyny aňladýar. Şeýle hem kämil tehnologiýaly bu elektrik stansiýasynyň önümçilik tehnologiýasynyň ykdysady tygşytlylygy üpjün etmekde giň mümkinçiliklere eýedigini bellemelidiris. Şeýle bu desganyň işe girizilmegi bilen Türkmenistan döwletimiziň arassa energiýa çeşmesini daşary ýurtlara eksport etmekdäki mümkinçiligi düýpli ýokarlandy. 

Arkadagly Gahryman Serdarymyzyň baştutanlygynda “Pähim-paýhas ummany Magtymguly Pyragy” ýylynda Garaşsyz Watanymyzyň ösüş-özgerişli bady artýar. Türkmen halky Beýik Garaşsyzlygymyzyň şanly 33 ýyllygynyň baýramyna zähmet sowgatly barmak maksady bilen döredijilikli zähmet çekýär. 

Merdan ORAZMEREDOW. 

TDEI-niň mugallymy, 

Türkmenistanyň Mejlisiniň deputaty.