Belent sepgitleriň buýsançly beýany

     Türkmen halkynyň Milli Lideri Gahryman Arkadagymyzyň peşgeş beren «Saglygy goraýyşda ýetilen sepgitler» atly kitaby saglygy goraýyş ulgamynyň köptaraply ösüşlerini beýan edýän gymmatly gollanmadyr. «Saglyk» Döwlet maksatnamasynyň çäklerinde durmuşa geçirilen işler barada anyk delillere we maglumatlara esaslanýan gürrüňler kitabyň gymmatyny artdyrýar. Kitabyň başynda Gahryman Arkadagymyz jemgyýetimiziň mizemez durmuş kadasyna öwrülen «Il saglygy -ýurt baýlygy» şygaryna esaslanyp, saglyga gadymy döwürlerden bäri ähmiýet berlip, häzirki günlerde ynsan saglygyny goramagyň, sagdyn durmuş ýörelgesine eýermegiň döwlet syýasatymyzyň baş ugry hökmünde kesgitlenendigi baradaky gürrüňlere orun berýär. 

     Garaşsyzlyk ýyllarynda kabul edilen «Saglyk» Döwlet maksatnamasynyň üstünlikli durmuşa geçirilmegi saglygy goraýyş ulgamynyň täze hil derejesini üpjün edýär. Aşgabat, Arkadag şäherlerinde, ýurdumyzyň welaýatlarynda gurlup ulanmaga berlen saglyk maksatly binalar hem soňky tejribeleri, ylmyň gazananlaryny özünde jemlemek bilen, ýokary hilli lukmançylyk hyzmatlary bilen halka hyzmat edýär. Adamlaryň saglygyny goramak bilen bagly ählumumy wezipeleriň çözgüdine goşant goşýan döwletimiziň halkara guramalar we dünýä döwletleri bilen alyp barýan hyzmatdaşlyklary milli saglygy goraýyş ulgamynda tejribeleri baýlaşdyrmaga, lukmançylyga öňdebaryjy tejribeleriň ornaşdyrylmagyna oňyn täsirini ýetirýär. Milli Liderimiz täze kitabynda: «Dünýä jemgyýetçiliginde döwletleriň ösüşini aňladýan esasy düşünje adamlaryň sagdyn ýaşaýşy bilen baglanyşykly wezipeleriň durmuşa geçirilmeginde ýüze çykýar. Şoňa görä, ösen ýurtlarda näsaglyga getirýän sebäpleri öwrenmek we öňüni almak çäreleri ähmiýetli orunda goýulýar» diýip bellemek bilen, eziz Diýarymyzda ilatyň saglygyny goramakda, keselleriň öňüni almakda, sagdyn ýaşaýşy üpjün etmekde maksatnamalaýyn çäreleriň dowam etdirilýändigine hem ünsi çekýär. 

     Gahryman Arkadagymyz ajaýyp kitabynda diňe bir saglygy goraýyş ulgamynda edilen işler we ýetilen sepgitler barada aýtmak bilen çäklenmän, saglygyň gymmaty, adamlaryň durmuş bilen bagly ýürek telwaslarynyň, birek-birege bolan özara gatnaşyklarynyň hem saglykdan gözbaş alýandygy baradaky pikir-garaýyşlara orun berýär, saglygy adamlaryň medeni-durmuş, syýasy-ykdysady ösüşleriniň esasy binýady, döwletiň kuwwatly bolmagynyň baş şerti hasaplaýar. Milli Liderimiz kitabynda: «Parahatçylygyň we ynamyň özeni hem saglykdadyr. Saglyk geljege ynam döredýän beýik güýçdür» diýip belleýär. Şeýle paýhasly setirler beden we ruhy taýdan sagdyn adamlaryň nurana geljegi berkarar etmekde, asuda ýaşaýşy dowam etdirmekde, parahatçylykly ýol bilen özara gatnaşyklary dowam etdirmekde uly ähmiýete eýedigini görkezýär. 

     Saglygy goraýyş ulgamynyň işgärleri üçin ähmiýetli gollanma boljak ajaýyp kitaby peşgeş beren Gahryman Arkadagymyzyň jöwher paýhasyndan döreýän gymmatly kitaplarynyň höwri köp bolsun! 

Şemşat Mä­miýewa, Balkanabat şäheriniň Gumdag şäherçe hassahanasynyň baş lukmanynyň orunbasary, Türkmenistanyň Mejlisiniň deputaty.