TÜRKMENISTANYŇ MEJLISINIŇ KARARY

Türkmenistanyň Goranmak ministrliginiň

1-nji, 2-nji we 3-nji Ýöriteleşdirilen harby

mekdeplerine at dakmak hakynda

(Türkmenistanyň Mejlisiniň Maglumatlary, 2014 ý., № 1, 18-madda)

Berkarar döwletimiziň bagtyýarlyk döwründe özleriniň ýaşap geçen ýyllarynda gahrymançylykly edermenligi, merdanalygy bilen türkmen halkyny şöhratlandyran, nesillere nusgalyk miras goýan gerçekleriň hatyrasyny tutmak, halkymyzyň agzybirligini pugtalandyrmakda, milli goşunymyzyň geljekki serkerdelerini watansöýüjilik ruhunda terbiýelemekde olaryň nusgalyk göreldelerini peýdalanmak babatda uly işler durmuşa geçirilýär. Türkmenistanyň hormatly Prezidenti Gurbanguly Berdimuhamedow maşgala däbine eýerip, ata-babalarymyzdan gelýän milli däp-dessurlarymyza, olaryň öwüt-ündewlerine uýup, şöhratly pederlerimiziň ýol-ýörelgesini görelde mekdebi hasaplaýar.

Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy Gurbanguly Berdimuhamedowyň atasy Berdimuhamet Annaýewiň Watan öňündäki bitiren çuňňur many-mazmunly işleri Berkarar döwletimiziň bagtyýarlyk döwrüniň ýaşlary üçin watançylygyň, zähmetsöýerligiň, edermenligiň we mertligiň özüne çekiji nusgasy bolup, görelde mekdebi hökmünde uly abraýa eýedir. Mugallym, esger, ilhalar ynsan Berdimuhamet Annaýewiň ýokary ahlaklylygy, mertligi we gaýduwsyzlygy ýaş nesiller üçin göreldä eýermegiň ägirt uly ýörelgesi  bolup hyzmat edýär.

Türkmen halkynyň bäş müňýyllyk taryhynyň dowamynda beýik döwletleri gurmakda umumy ynsanyýet ösüşinde öçmejek yz galdyran beýik şahsyýetler ýaşap geçipdirler. Beýik seljuk türkmen döwletiniň serkerdesi Çagry begiň agtygy Alp Arslanyň seljuk türkmen döwletine hökümdarlyk eden döwründe seljuk türkmen döwleti has-da ulalyp, oba hojalyk pudagy, hünärmençilik we şäherler gülläp ösüpdir, beýik ýüpek ýolunyň ugrunda kerwensaraýlar gurlupdyr. Alp Arslan Türkmen türkmenlere Rum iliniň derwezesini açan soltandyr. Onuň örän adalatly serkerde bolandygy üçin oňa "Adalatyň ganaty" diýip at beripdirler.

Beýik seljuk türkmen döwletiniň meşhur hökümdarlarynyň biri bolan Soltan Mälik şanyň ogly Soltan Sanjar hem özüniň seljuk türkmen döwletine hökümdarlyk eden döwründe türkmeniň ylmyna, medeniýetine uly üns beripdir. Soltan Sanjar raýatlarynyň rahat, bagtly we asuda ýaşamagy üçin yzygiderli alada edipdir.

Beýik seljuk türkmen soltanlary Alp Arslanyň, Soltan Sanjaryň guran döwletleri, görkezen gahrymançylyklary, mertlik göreldeleri, pähim-parasada ýugrulan ýörelgeleri, özlerini bütin yslam döwletleriniň soltany diýip yglan etmekleri gojaman taryhyň sahypalaryna altyn harplar bilen ýazylan deňi-taýy bolmadyk wakalardyr.

Ýokarda agzalanlardan ugur alyp, Türkmenistanyň Goranmak ministrliginiň Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy Gurbanguly Berdimuhamedowyň  atasy Berdimuhamet Annaýewiň Watanyny goramakda görkezen edermenligine, mertligine hormat goýmak, ýaş nesli okatmakda, terbiýelemekde bitiren hyzmatlaryny nusga edinmek, şöhratly taryhymyzda goşunbaşy hökmünde uly meşhurlyk gazanan Alp Arslan, Soltan Sanjar ýaly beýik şahsyýetleriň atlaryny ebedileşdirmek, olaryň söweşjeň däplerini, watansöýüjiligini we edermenligini ýörelge edinmek maksady bilen, şeýle hem  ministrligiň 1-nji Ýöriteleşdirilen harby mekdebine Berdimuhamet Annaýewiň adyny, 2-nji Ýöriteleşdirilen harby mekdebine Alp Arslanyň adyny, 3-nji Ýöriteleşdirilen harby mekdebine Soltan Sanjaryň adyny dakmak baradaky ýüz tutmasyny nazara alyp, hem-de "Türkmenistanyň dolandyryş-çäk gurluşynyň meselelerini çözmegiň hem-de döwlet kärhanalaryna, guramalaryna, edaralaryna we beýleki obýektlere at dakmagyň, adyny üýtgetmegiň tertibi hakynda" Türkmenistanyň Kanunyna laýyklykda, Türkmenistanyň Mejlisi  k a r a r  e d ý ä r :

1. Türkmenistanyň Goranmak ministrliginiň 1-nji Ýöriteleşdirilen harby mekdebine Türkmenistanyň hormatly Prezidenti, Türkmenistanyň Ýaragly Güýçleriniň Belent Serkerdebaşysy Gurbanguly Berdimuhamedowyň atasy Berdimuhamet Annaýewiň adyny dakmaly we ony mundan beýläk "Türkmenistanyň Goranmak ministrliginiň Berdimuhamet Annaýew adyndaky 1-nji Ýöriteleşdirilen harby mekdebi" diýip atlandyrmaly.

2. Türkmenistanyň Goranmak ministrliginiň 2-nji Ýöriteleşdirilen harby mekdebine beýik seljuk türkmenleriniň soltany Alp Arslanyň adyny dakmaly we ony mundan beýläk "Türkmenistanyň Goranmak ministrliginiň Alp Arslan adyndaky 2-nji Ýöriteleşdirilen harby mekdebi" diýip atlandyrmaly.

3. Türkmenistanyň Goranmak ministrliginiň 3-nji Ýöriteleşdirilen harby mekdebine beýik seljuk türkmenleriniň soltany Soltan Sanjaryň adyny dakmaly we ony mundan beýläk "Türkmenistanyň Goranmak ministrliginiň Soltan Sanjar adyndaky 3-nji Ýöriteleşdirilen harby mekdebi" diýip atlandyrmaly.

Türkmenistanyň

Mejlisiniň Başlygy                                           A.Nurberdiýewa

Aşgabat şäheri.

         2014-nji ýylyň 7-nji ýanwary.

         № 18-V.