TÜRKMENISTANYŇ MEJLISINIŇ KARARY

Balkan welaýatynyň Türkmenbaşy şäherinde

täze etraplary döretmek hakynda

(Türkmenistanyň Mejlisiniň Maglumatlary, 2013 ý., № 3, 50-madda)

Berkarar döwletimiziň bagtyýarlyk döwründe hormatly Prezidentimiziň ýurdumyzyň abadançylygyny, halkymyzyň eşretli we döwrebap durmuşyny üpjün etmek barada edýän ýadawsyz aladalary netijesinde amala aşyrylýan Beýik işleri, il-ýurt bähbitli başlangyçlary netijesinde gözel Diýarymyz bu gün taryhda görlüp-eşidilmedik ösüş derejelerine ýetdi. Hormatly Prezidentimiziň bagtyýar durmuşa gönükdirilen syýasatynyň esasy maksady ykdysadyýetimiziň pudaklarynyň durnukly ösüşiniň, diwersifikasiýalaşdyrylmagynyň, önümçilik we zähmet serişdeleriniň ýerlikli ulanylmagynyň netijesinde raýatlarymyzyň maddy hal-ýagdaýyny düýpli ýokarlandyrmakdan ybaratdyr.

Şu maksatlary durmuşa geçirmegiň ugurlary “Türkmenistanyň durmuş-ykdysady ösüşiniň 2011–2030-njy ýyllar üçin Milli maksatnamasynda”, “Türkmenistanyň Prezidentiniň obalaryň, şäherçeleriň, etraplardaky şäherleriň we etrap merkezleriniň ilatynyň durmuş-ýaşaýyş şertlerini özgertmek boýunça 2020-nji ýyla çenli döwür üçin Milli maksatnamasynda”, “Türkmenistanyň Prezidentiniň ýurdumyzy 2012–2016-njy ýyllarda durmuş-ykdysady taýdan ösdürmegiň Maksatnamasynda” jemlenendir.

Agzalan maksatnamalara laýyklykda, Türkmenistanyň hormatly Prezidentiniň başlangyçlary esasynda birnäçe iri möçberli halkara derejeli we milli ykdysady taslamalaryň we maksatnamalaryň özleşdirilmegi netijesinde, durmuş-medeni maksatly döwrebap binalaryň, desgalaryň, inženerçilik desgalarynyň, ýaşaýyş jaýlarynyň gurluşygy çalt depginler bilen dowam etdirilýär, ähli welaýatlarda täze nusgawy obalar, şäherçeler gurulýar, şol sanda “Awaza” Milli syýahatçylyk zolagyny özleşdirmek işleri güýçli depginlerde alnyp barylýar. 

Berkarar döwletimiziň bagtyýarlyk döwründe “Awaza” Milli syýahatçylyk zolagynyň çäkleriniň giňelýändigini, ilatyň ýaşaýyş-durmuş şertlerini has-da gowulandyrmak, bu ýerde dynç alýanlaryň wagtyny gyzykly geçirmekleri we saglyklaryny berkitmekleri üçin has amatly şertleri döretmek maksadynda dünýäniň ösen derejesindäki syýahatçylyk, dynç alyş ulgamlarynyň, dürli görnüşli dynç alyş toplumlarynyň gurluşyklarynyň giňden ýaýbaňlandyrylýandygyny göz öňünde tutup hem-de Türkmenistanyň Ministrler Kabinetiniň teklipnamasyny nazara almak bilen, Türkmenistanyň Konstitusiýasynyň 63-nji maddasynyň 11-nji bendine laýyklykda Türkmenistanyň Mejlisi  k a r a r e d ý ä r :

1. Balkan welaýatynyň Türkmenbaşy şäheriniň düzüminde goşunda laýyklykda iki etrap döretmeli we olara Awaza we Kenar atlaryny dakmaly we mundan beýläk olary degişlilikde Türkmenbaşy şäheriniň Awaza etraby hem-de Türkmenbaşy şäheriniň Kenar etraby diýip atlandyrmaly. 

2. Türkmenbaşy şäheriniň Kenar şäherçesini Türkmenbaşy şäheriniň Kenar etrabynyň tabynlygyna bermeli.

3. Türkmenbaşy şäheriniň Awaza hem-de Kenar etraplarynyň halk maslahatlarynyň agzalarynyň saýlawlaryny 2013-nji ýylyň 15-nji dekabryna, ýekşenbe gününe bellemeli.

4. Türkmenistanyň Oba hojalyk ministrliginiň ýanyndaky Ýer serişdeleri gullugy Balkan welaýatynyň häkimligi bilen bilelikde Türkmenbaşy şäheriniň dolandyryş-çäkleriniň ýazgysyny bellenen tertipde geçirmeli.

5. Türkmenistanyň Mejlisiniň 2010-njy ýylyň 10-njy maýyndaky 112-IV belgili karary bilen tassyklanylan Türkmenistanyň dolandyryş-çäk birlikleriniň Sanawyna degişli üýtgetmeleri girizmeli.

Türkmenistanyň

Mejlisiniň Başlygy                                           A.Nurberdiýewa

Aşgabat şäheri.

2013-nji ýylyň 29-njy iýuly.

№ 420-IV.

(Goşundynyň teksti asyl nusgada)