TÜRKMENISTANYŇ MEJLISINIŇ KARARY

Mary welaýatynyň Baýramaly etrabynyň

Üçajy şäherçesiniň adyny üýtgetmek hakynda

Berkarar döwletiň bagtyýarlyk döwründe ýurdumyzda Türkmenistanyň Prezidenti Gurbanguly Berdimuhamedowyň "Meniň ähli aladam halkym bolar" diýen ýörelgesi esasynda il-halkymyzyň ýaşaýyş-durmuş derejesini ýokarlandyrmaga gönükdirilen beýik tutumlar durmuşa geçirilýär. Türkmenistanyň Prezidentiniň "Türkmenistanyň Prezidentiniň obalaryň, şäherçeleriň, etrapdaky şäherleriň we etrap merkezleriniň ilatynyň durmuş-ýaşaýyş şertlerini özgertmek boýunça 2020-nji ýyla çenli döwür üçin Milli maksatnamasyny" durmuşa geçirmegiň çäklerinde amala aşyrylýan işleriň netijesinde ýurdumyzyň obalarynyň, şäherçeleriniň keşbi bütinleý özgerýär. Garagum çölüniň jümmüşinde ýerleşen Mary welaýatynyň Baýramaly etrabynyň Üçajy şäherçesinde gysga wagtyň içinde dünýä ülňülerine laýyk gelýän enjamlar bilen enjamlaşdyrylan saglyk öýüniň, mekdebiň, çagalar bagynyň, agyz suw toplumynyň we beýleki durmuş maksatly desgalaryň gurlup ulanylmaga berilmegi muňa doly şaýatlyk edýär.

Üçajy şäherçesiniň ýaşaýjylarynyň şäherçäniň adyny halkymyzyň bagtyýarlyk döwrüniň talaplaryna laýyk atlandyrmak baradaky arzuw-isleglerini, şeýle hem şäherçe Geňeşiniň, Baýramaly etrabynyň we Mary welaýatynyň häkimlikleriniň Mary welaýatynyň Baýramaly etrabynyň Üçajy şäherçesiniň adyny üýtgetmek hakynda towakganamalaryny nazara alyp hem-de Türkmenistanyň Konstitusiýasynyň 63-nji maddasyna, "Türkmenistanyň dolandyryş-çäk gurluşynyň meselelerini çözmegiň hem-de döwlet kärhanalaryna, guramalaryna, edaralaryna we beýleki obýektlere at dakmagyň, adyny üýtgetmegiň tertibi hakynda" Türkmenistanyň Kanunyna laýyklykda Türkmenistanyň Mejlisi                 k a r a r  e d ý ä r :

1. Mary welaýatynyň Baýramaly etrabynyň Üçajy şäherçesiniň adyny üýtgedip, oňa Bagtyýarlyk adyny dakmaly we mundan beýläk ony "Mary welaýatynyň Baýramaly etrabynyň Bagtyýarlyk şäherçesi" diýip atlandyrmaly.

2. Türkmenistanyň Mejlisiniň 2010-njy ýylyň 10-njy maýyndaky 112-IV belgili karary bilen tassyklanylan Türkmenistanyň dolandyryş-çäk birlikleriniň Sanawyna degişli üýtgetmeleri girizmeli. 

Türkmenistanyň 

Mejlisiniň Başlygy                                           A.Nurberdiýewa

Aşgabat şäheri.

2012-nji ýylyň 20-nji sentýabry.

№ 331-IV.