TÜRKMENISTANYŇ MEJLISINIŇ KARARY

Ahal welaýatynyň Gökdepe etrabynyň

Yzgant obasynda gurlan Medeniýet köşgüne

Mälikguly Berdimuhammedowyň adyny 

dakmak hakynda

Türkmenistanyň Prezidentiniň obalaryň, şäherçeleriň, etrapdaky şäherleriň hem-de etrap merkezleriniň ilatynyň durmuş-ýaşaýyş şertlerini özgertmek boýunça 2020-nji ýyla çenli döwür üçin Milli maksatnamasynyň çäklerinde ýurdumyzda giň gerimli işler amala aşyrylýar. Ilatymyza ulanmaga berilýän, dünýä ülňülerine gabat gelýän mekdepleriň, çagalar baglarynyň, medeniýet köşkleriniň, sport desgalarynyň, saglyk merkezleriniň we beýleki durmuş maksatly desgalaryň sany günsaýyn artýar. 

Ýaşululara hormat goýmak, halkymyzyň agzybirligini pugtalandyrmakda, milli mirasymyzy, däp-dessurlarymyzy nesilden- nesle geçirmekde olaryň baý tejribesini, pähim-paýhasyny we asylly ýörelgelerini durmuşda peýdalanmak, ýaş nesli halallyk, watançylyk, zähmetsöýerlik ruhunda terbiýelemekde has işeňňirlik görkezen ýaşulularymyzy hormatlamak bilen olaryň mertebesini belende götermek üçin Berkarar döwletimiziň bagtyýarlyk döwründe has-da giň mümkinçilikler açylýar.

Öz halkyny çäksiz söýýän, belent adamkärçilikli, açyk göwünli, adam mertebesine hormat goýmak bilen türkmen halkyna wepaly hyzmat etmegiň nusgasyny görkezýän Türkmenistanyň Prezidenti hormatly Gurbanguly Berdimuhamedowyň kakasy Mälikguly Berdimuhammedowyň döwlet gullugynda we jemgyýetçilik işlerinde köp ýyllaryň dowamynda tutanýerli, halal zähmet çekip görkezen göreldesini, ýaşlary zähmetsöýerlik, Watana wepalylyk ruhunda terbiýelemekde, olary bilimli, hünärli, edepli, maksada okgunly edip ýetişdirmekde işeňňirlik bilen bitiren uly hyzmatlaryny, şeýle hem belent adamkärçiligi bilen ilimize görelde bolup, halkymyzyň içinde uly abraýa eýe bolandygyny, Berkarar döwletimiziň bagtyýarlyk döwrüniň ýaşlary üçin halkyna wepaly hyzmat etmegiň ajaýyp nusgasyny görkezip, jemgyýetçilik işlerinde görkezen işjeňligini göz öňünde tutup, şonuň ýaly hem Ahal welaýatynyň Gökdepe etrabynyň Yzgant obasynyň ýaşaýjylarynyň hem-de etrabyň medeniýet işgärleriniň isleglerini, Ahal welaýatynyň häkimliginiň haýyşnamasyny kanagatlandyrmak maksady bilen, "Türkmenistanyň dolandyryş-çäk gurluşynyň meselelerini çözmegiň hem-de döwlet kärhanalaryna, guramalaryna, edaralaryna we beýleki obýektlere at dakmagyň, adyny üýtgetmegiň tertibi hakynda" Türkmenistanyň Kanunyna esaslanyp, Türkmenistanyň Mejlisi                       k a r a r  e d ý ä r :

Ahal welaýatynyň Gökdepe etrabynyň Yzgant obasynda gurlan Medeniýet köşgüne Mälikguly Berdimuhammedowyň adyny dakmaly we ony "Ahal welaýatynyň Gökdepe etrabynyň Yzgant obasynyň Mälikguly Berdimuhammedow adyndaky Medeniýet köşgi" diýip atlandyrmaly.

Türkmenistanyň

Mejlisiniň Başlygy                                           A.Nurberdiýewa

Aşgabat şäheri.

2012-nji ýylyň 10-njy oktýabry.

№ 336-IV.