TÜRKMENISTANYŇ MEJLISINIŇ

K A R A R Y

Lebap welaýatynyň Köýtendag etrabynyň dolandyryş-çäk gurluşynyň käbir meseleleri hakynda

(Türkmenistanyň Mejlisiniň Maglumatlary, 2010 ý., № 4, 76-njy madda)

Türkmenistanyň Prezidentiniň täze Galkynyş we beýik özgertmeler zamanasynda ýurdumyzy ykdysady taýdan ösdürmek, halkymyzyň bolelin eşretli durmuşda ýaşamagyny üpjün etmek ugrundaky tutumlary barha rowaç alýar.

Lebap welaýatynyň Köýtendag etrabynda gurulýan kaliý dökünlerini öndürýän dag-magdan toplumynda hem-de sement zawodynda işlejek işgärleriň zerur ýaşaýyş-durmuş şertlerini üpjün etmek, gurulmagy meýilleşdirilýän dürli maksatly binalary we desgalary şäher gurluşygynyň talaplaryna laýyklykda ýerleşdirmek we ýerleri netijeli peýdalanmak maksady bilen, Köýtendag etrabynyň Garlyk geňeşliginiň ilatynyň, Garlyk geňeşliginiň Geňeşiniň, Köýtendag etrap we Lebap welaýatynyň häkimleriniň Lebap welaýatynyň Köýtendag etrabyndaky täze ilatly ýere şäherçe derejesini bermek we şol şäherçä Garlyk adyny dakmak hem-de Garlyk geňeşligini ýatyrmak we bu geňeşligiň Garlyk we Künjek obalaryny säherçäniň dolandyryş tabynlygyna bermek baradaky towakganamalaryny hem-de Türkmenistanyň Ministrler Kabinetiniň teklipnamasyny nazara alyp, Türkmenistanyň Konstitusiýasynyň 63-nji maddasyna hem-de "Türkmenistanyň dolandyryş-çäk gurluşynyň meselelerini çözmegiň hem-de döwlet kärhanalaryna, guramalaryna, edaralaryna we beýleki obýektlere at dakmagyň, adyny üýtgetmegiň tertibi hakynda" Türkmenistanyň Kanunyna laýyklykda Türkmenistanyň Mejlisi karar edýär:

1. Lebap welaýatynyň Köýtendag etrabyndaky täze ilatly ýere şäherçe derejesini berip, oňa Garlyk adyny dakmaly, Köýtendag etrabynyň Garlyk geňeşligini ýatyryp, bu geňeşligiň Garlyk we Künjek obalaryny Garlyk säherçesiniň dolandyryş tabynlygyna bermeli.

2. Garlyk geňeşliginiň Geňeş agzalarynyň ygtyýarlyklaryny Garlyk şäherçesiniň Geňeşiniň agzalarynyň saýlawlar gününe çenli saklap galdyrmaly.

3. Lebap welaýatynyň Köýtendag etrabynyň Garlyk säherçesiniň Geňeşiniň agzalarynyň saýlawlaryny 2011-nji ýylyň 13-nji fewralyna, ýekşenbe gününe bellemeli.

4. Türkmenistanyň Mejlisiniň 2010-njy ýylyň 10-njy maýyndaky 112-IV belgili karary bilen tassyklanylan Türkmenistanyň dolandyryş-çäk birlikleriniň Sanawyna degişli üýtgetmeleri girizmeli.

Türkmenistanyň

Mejlisiniň Başlygy                                               A.Nurberdiýewa

Aşgabat şäheri.

2010-njy ýylyň 26-njy noýabry.

№ 152-IV.