TÜRKMENISTANYŇ MEJLISINIŇ

 K A R A R Y

Mary welaýatynda gurlan saglygy goraýyş anyklaýyş merkezine Türkmenistanyň Prezidenti Beýik Saparmyrat Türkmenbaşynyň adyny dakmak hakynda

(Türkmenistanyň Mejlisiniň Maglumatlary, 2004 ý., № 3, 18-nji madda)

Türkmenistanyň ilkinji we ömürlik Prezidenti Beýik Saparmyrat Türkmenbaşynyň ýolbaşçylygynda Garaşsyzlyk ýyllarynda ýurdumyzda saglygy goraýşy mundan beýläk-de ösdürmekde, raýatlaryň saglygyny goramakda we pugtalandyrmakda uly üstünlikler gazanyldy.

Prezidentimiziň "Saglyk" döwlet maksatnamasyny durmuşa geçirmegiň çäklerinde saglygy goraýyş ulgamy düýpli özgerdildi, onuň dolandyrylyşy kämilleşdirildi, hyzmatlaryň hili we netijeliligi ýokarlandyrylýar, olaryň täze, öňdebaryjy usullary giňden ornaşdyrylýar. Özgertmeleriň barşynda täze hassahanalaryň, saglyk öýleriniň, anyklaýyş merkezleriniň gurulmagynyň hasabyna saglygy goraýşyň derejesi dünýä ülňüleriniň talaplaryna laýyk getirilýär. Saglygy goraýyşda keselleriň öňüni almak işiniň mundan beýläk-de güýçlendirilmegi raýatlaryň saglygyny goramak baradaky syýasatyň esasy ugry bolup durýar. Şundan ugur alnyp, Mary welaýatynda hem dünýä ülňülerine laýyk gelýän saglygy goraýyş anyklaýyş merkezi guruldy.

Türkmenistanyň Prezidenti Beýik Saparmyrat Türkmenbaşynyň Türkmenistanyň halkynyň Altyn asyrynda saglygy goraýşy ösdürmekde alyp barýan ýadawsyz tagallalaryny aýratyn bellemek bilen, "Saglyk" döwlet maksatnamasyny durmuşa geçirmekde, ilata edilýän saglygy goraýyş hyzmatynyň derejesini ýokarlandyrmakda, keselleri öz wagtynda anyklap öňüni almakda, sagdyn bedenli, ruhubelent nesli kemala getirmekde anyklaýyş merkeziniň örän uly ähmiýetiniň bardygyny, şeýle hem Mary welaýatynyň raýatlarynyň, saglygy goraýyş ulgamynyň işgärleriniň, jemgyýetçilik guramalarynyň haýyşlaryny we Mary welaýat häkimliginiň towakganamasyny nazarda tutup, Türkmenistanyň Mejlisi karar edýär:

Mary welaýatynda gurlan saglygy goraýyş anyklaýyş merkezine Türkmenistanyň Prezidenti Beýik Saparmyrat Türkmenbaşynyň adyny dakmaly we ony "Beýik Saparmyrat Türkmenbaşy adyndaky Mary saglygy goraýyş anyklaýyş merkezi" diýip atlandyrmaly.

 Türkmenistanyň

 Mejlisiniň Başlygy                                                     Ö. Ataýew

Aşgabat şäheri.

2004-nji ýylyň Ruhnama aýynyň 8-i.

№ 228-II.