TÜRKMENISTANYŇ MEJLISINIŇ

 K A R A R Y

Türkmenistanyň Saglygy goraýyş we derman senagaty ministrliginiň Halkara saglyk merkezleri müdiriýetine Türkmenistanyň Prezidenti Beýik Saparmyrat Türkmenbaşynyň adyny dakmak hakynda

(Türkmenistanyň Mejlisiniň Maglumatlary, 2004 ý., № 3, 20-nji madda)

Türkmenistanyň Prezidenti Beýik Saparmyrat Türkmenbaşynyň "Saglyk" maksatnamasynyň yzygiderli durmuşa geçirilmegi netijesinde ýurdumyz saglygy goraýyş babatda dünýäniň ösen döwletleriniň hataryna barha ymykly goşulýar.

Türkmenistanda adam saglygy hakyndaky alada Garaşsyzlygymyzyň ilkinji günlerinden öň hatarda goýuldy we ol halkyň milli gymmatlyklarynyň biri hökmünde ykrar edildi. Geçen döwürde saglygy goraýyşda düýpli we giň möçberli özgertmeler amala aşyryldy, onuň düzüminde täze ugurlar, şol sanda ilata halkara ölçeglerine laýyklykda ýokary hilli, döwrebap hyzmat edýän iň kämil bejeriş-anyklaýyş edaralarynyň ulgamy peýda boldy. Beýik Serdarymyzyň başlangyjy bilen türkmen halkynyň Altyn asyrynda häzirki zaman bejeriş-keseliň öňüni alyş edaralarynyň gurluşyny we olaryň dolandyrylyşyny kämilleşdirmek maksady bilen Halkara saglyk merkezleri müdiriýeti döredildi. Munuň özi gurluş-guramaçylyk taýdan diňe bir biziň ýurdumyz üçin däl, eýsem dünýä saglygy goraýşynda hem kämil çözgüt bolup, ol häzirki zaman tilsimatlaryna we enjamlaryna esaslanýan hem-de işe täzeçe çemeleşmegi talap edýän merkezleri we tutuş pudagy bitewilikde netijeli dolandyrmagy üpjün etmek üçin giň mümkinçilikler açýar. Häzirki zaman enjamlary bilen abzallaşdyrylan, halkara ülňülerine laýyklykda üpjün edilen sebitde deňi-taýy bolmadyk Halkara saglyk merkezleriniň geljekde saglygy goraýyşda uly üstünliklere ýetmekde, ýurdumyzyň her bir raýatynyň ömrüniň dowamlylygyny uzaltmakda, jan saglygyny goramakda bahasyna ýetip bolmajak ähmiýeti bardyr.

Türkmenistanyň Prezidenti Beýik Saparmyrat Türkmenbaşynyň halkyň saglygyny goramak we adamlaryň ömrüniň dowamlylygyny artdyrmak baradaky ýadawsyz aladasyny aýratyn belläp, Halkara saglyk merkezleri müdiriýetiniň işgärleriniň haýyşyny, Türkmenistanyň Saglygy goraýyş we derman senagaty ministrliginiň towakganamasyny nazarda tutup, Türkmenistanyň Mejlisi karar edýär:

Türkmenistanyň Saglygy goraýyş we derman senagaty ministrliginiň Halkara saglyk merkezleri müdiriýetine Türkmenistanyň Prezidenti Beýik Saparmyrat Türkmenbaşynyň adyny dakmaly we ony mundan beýläk Türkmenistanyň Saglygy goraýyş we derman senagaty ministrliginiň Beýik Saparmyrat Türkmenbaşy adyndaky Halkara saglyk merkezleri müdiriýeti diýip atlandyrmaly.

 Türkmenistanyň

 Mejlisiniň Başlygy                                                       Ö. Ataýew

Aşgabat şäheri.

2004-nji ýylyň Ruhnama aýynyň 8-i.

№ 230-II.