TÜRKMENISTANYŇ KANUNY

Türkmenistanyň «Türkmenistanyň halk atşynasy» 

diýen hormatly adyny döretmek hakynda

(Türkmenistanyň Mejlisiniň Maglumatlary, 2015 ý., № 1, 46-njy madda)

1-nji madda. Türkmenistanyň «Türkmenistanyň halk atşynasy» diýen hormatly adyny döretmeli.

2-nji madda. Türkmenistanyň «Türkmenistanyň halk atşynasy» diýen hormatly adynyň Düzgünnamasyny we onuň döşe dakylýan nyşanynyň Ýazgysyny tassyklamaly (goşulýar).

3-nji madda. Şu Kanun resmi taýdan çap edilen gününden güýje girýär.

Türkmenistanyň                                                  Gurbanguly

    Prezidenti                                                    Berdimuhamedow

Aşgabat şäheri.

2015-nji ýylyň 31-nji marty.

№ 212-V.

Türkmenistanyň «Türkmenistanyň halk atşynasy»

diýen hormatly adynyň

DÜZGÜNNAMASY

(03.06.2023 ý. № 28-VII Türkmenistanyň Kanuny esasynda girizilen üýtgetme bilen)

1. Türkmenistanyň «Türkmenistanyň halk atşynasy» diýen hormatly ady Türkmenistanyň döwlet sylagydyr.

2. Türkmenistanyň Garaşsyzlyk ýyllarynda türkmen halkynyň milli buýsanjy, gözelligiň ajaýyp nusgasy bolan behişdi bedewleriniň dünýädäki at-abraýyny has-da belende götermekde, olaryň şan-şöhratyny dünýä ýaýmakda we seýislik sungatyny ösdürmekde uly hyzmatlary bitiren, türkmen bedewlerini seýislemekde we olaryň syn-sypatyny kämilleşdirmekde, atçylyk pudagyny, şol sanda atçylyk sportuny ösdürmekde aýratyn şahsy goşant goşan, at çapmagyň we bedewleri seýislemegiň inçe tälimleriniň nusgalyk usullaryny ýaş nesle öwretmekde uly işleri bitiren we ýokary netijeleri gazanan adamlara Türkmenistanyň «Türkmenistanyň halk atşynasy» diýen hormatly ady dakylýar.

3. Türkmenistanyň «Türkmenistanyň halk atşynasy» diýen hormatly ady Türkmenistanyň raýatlaryna dakylýar.

4. Türkmenistanyň «Türkmenistanyň halk atşynasy» diýen hormatly ady Türkmenistanyň Prezidentiniň Permany bilen dakylýar.

5. Türkmenistanyň «Türkmenistanyň halk atşynasy» diýen hormatly adynyň dakylmagy döwlet häkimiýet we dolandyryş edaralarynyň merkezi edaralarynyň ýolbaşçylarynyň, welaýatlaryň, Aşgabat we Arkadag şäherleriniň häkimleriniň, şeýle hem jemgyýetçilik birleşikleriniň teklipnamalary esasynda amala aşyrylýar.

Teklipnamalar Türkmenistanyň Prezidentiniň adyna iberilýär.

6. Türkmenistanyň «Türkmenistanyň halk atşynasy» diýen hormatly ady dakylan adamlara Türkmenistanyň «Türkmenistanyň halk atşynasy» diýen hormatly adynyň şahadatnamasy we döşe dakylýan nyşany gowşurylýar.

7. Türkmenistanyň «Türkmenistanyň halk atşynasy» diýen hormatly ady dakylan adamlara iň pes aýlyk zähmet hakynyň bäş essesi  möçberinde birwagtlaýyn baýrak tölenýär we iň pes aýlyk zähmet hakynyň 30 göterimi möçberinde iş hakyna, aýlyk wezipe hakyna, pensiýasyna, döwlet kömek puluna, talyp hakyna her aýda goşmaça hak bellenýär.

8. Türkmenistanyň «Türkmenistanyň halk atşynasy» diýen hormatly ady dakylan adamlar Türkmenistanyň kanunçygynda bellenilen tertipde we halatlarda beýleki ýeňilliklerden hem peýdalanýarlar.

Türkmenistanyň «Türkmenistanyň halk atşynasy»

diýen hormatly adynyň döşe dakylýan nyşanynyň

ÝAZGYSY

Türkmenistanyň «Türkmenistanyň halk atşynasy» diýen hormatly adynyň döşe dakylýan nyşany üsti-üstüne birleşdirilen sekizburçluklaryň ikisinden ybaratdyr. Ýerligi ýaşyl reňkli syrça bilen syrçalanan ýokarky sekizburçlugyň milli nagyşly altyn çaýylan burçlarynyň aralarynda ýerleşdirilen aşaky sekizburçlugyň burçlarynyň her biri ýaşyl reňkli sirkoniý daşy bilen bezelen. Döşe dakylýan nyşanyň umumy diametri – 44 mm.

Döşe dakylýan nyşanyň diametri 24 mm bolan ýerligi ak reňkli syrça bilen syrçalanan merkezi tegeleginiň merkezi böleginde Türkmenistanyň ýaşyl reňkli syrçalanan kartasynyň ýüzünde altyn çaýylan atyň we taýyň şekilleri ýerleşdirilen. Atyň we taýyň şekilleriniň aşagynda – parahatçylygyň nyşany bolan ýaýrap gidýän altyn reňkli zeýtun şahalarynyň ikisi şekillendirilen. Döşe dakylýan nyşanyň merkezi tegeleginiň daşynda diametri 31 mm, ini 3,5 mm bolan ýaşyl reňk bilen syrçalanan tegelek halkanyň içiniň ýokarky böleginde «TÜRKMENISTANYŇ HALK ATŞYNASY» diýen altyn çaýylan ýazgy, aşaky böleginde bolsa türkmen halylarynyň gölleriniň bäşisiniň şekilleri ýerleşdirilen.

Döşe dakylýan nyşan halkajyk arkaly beýikligi 20 mm we ini 31 mm bolan gönüburçly altyn çaýylan kolodka birleşdirilýär. Ýaşyl reňkli syrça örtülen kolodkada altyn çaýylan «TÜRKMENISTAN» diýen ýazgy, ýarym Aý we ýyldyzlaryň bäşisi ýerleşdirilen.

Döşe dakylýan nyşan we onuň kolodkasy 925 mähekli kümüşden altyn çaýylyp ýasalýar.