TÜRKMENISTANYŇ KANUNY

Türkmenistanyň «Garaşsyz, Baky Bitarap Türkmenistan»

ýubileý medalyny döretmek hakynda

(Türkmenistanyň Mejlisiniň Maglumatlary, 2015 ý., № 2, 55-madda)

1-nji madda. Türkmenistanyň «Garaşsyz, Baky Bitarap Türkmenistan» ýubileý medalyny döretmeli.

2-nji madda. Türkmenistanyň «Garaşsyz, Baky Bitarap Türkmenistan» ýubileý medaly hakynda Düzgünnamany tassyklamaly (goşulýar).

3-nji madda. Türkmenistanyň «Garaşsyz, Baky Bitarap Türkmenistan» ýubileý medalynyň Ýazgysyny tassyklamaly (goşulýar).

Türkmenistanyň                                               Gurbanguly

     Prezidenti                                                  Berdimuhamedow

Aşgabat şäheri.

2015-nji ýylyň 23-nji maýy.

№ 221-V.

Türkmenistanyň «Garaşsyz, Baky Bitarap Türkmenistan»

ýubileý medaly hakynda

DÜZGÜNNAMA

1. Türkmenistanyň «Garaşsyz, Baky Bitarap Türkmenistan» ýubileý medaly Türkmenistanyň Garaşsyzlyk ýyllary içinde ýurdumyzyň syýasy, durmuş-ykdysady, ruhy-medeni we beýleki ugurlardaky ösüşi üçin halal zähmeti bilen uly hyzmatlary bitiren, ajaýyp zähmet üstünliklerini gazanan raýatlary sylaglamak üçin döredilýär.

2. Türkmenistanyň «Garaşsyz, Baky Bitarap Türkmenistan» ýubileý medaly bilen:

-          Türkmenistanyň Garaşsyzlygyny, özygtyýarlylygyny we hemişelik bitaraplyk hukuk ýagdaýyny pugtalandyrmak ugrunda köp ýyllaryň dowamynda çeken halal zähmeti, işjeň we önjeýli döwlet, jemgyýetçilik işi, şeýle hem ata Watanymyzyň dünýä ýüzündäki halkara abraýyny hemişelik bitaraplyk ýörelgelerine laýyklykda berkitmekde goşan uly şahsy goşandy üçin;

- Garaşsyz, hemişelik Bitarap Türkmenistanyň ykdysady kuwwatyny pugtalandyrmak, ylmyny, bilimini, medeniýetini, sungatyny, saglygy goraýşyny hem-de ýurduň durmuşynyň beýleki ähli pudaklaryny ösdürmek boýunça işlenip taýýarlanan maksatnamalary abraýly durmuşa geçirmekde gazanan ajaýyp üstünlikleri we ýokary hyzmatlary üçin;

- Garaşsyz Türkmenistanyň goranmak ukybyny berkitmäge, raýatlaryň howpsuzlygyny, kanunylygy we hukuk tertibini üpjün etmek işine goşan uly şahsy goşandy üçin;

- ösüp gelýän ýaş nesli Watana söýgi we oňa wepalylyk, mertlik, halallyk, ruhubelentlik sypatlarynda terbiýelemek işinde görkezen ýokary hyzmatlary üçin sylaglanylýar.

3. Türkmenistanyň «Garaşsyz, Baky Bitarap Türkmenistan» ýubileý medaly bilen Garaşsyz Türkmenistanyň raýatlary sylaglanylýar.

Türkmenistanyň «Garaşsyz, Baky Bitarap Türkmenistan» ýubileý medaly bilen Türkmenistanyň Prezidenti tarapyndan daşary ýurt raýatlary hem sylaglanyp bilner.

4. Şu sylaga mynasyp bolan adamlara Türkmenistanyň «Garaşsyz, Baky Bitarap Türkmenistan» ýubileý medaly we onuň şahadatnamasy gowşurylýar.

5. Türkmenistanyň «Garaşsyz, Baky Bitarap Türkmenistan» ýubileý medaly bilen sylaglanan adamlar Türkmenistanyň kanunçylygynda bellenilen tertipde ýeňilliklerden peýdalanýarlar.

Türkmenistanyň «Garaşsyz, Baky Bitarap Türkmenistan»

ýubileý medalynyň

ÝAZGYSY

Türkmenistanyň «Garaşsyz, Baky Bitarap Türkmenistan» ýubileý medaly üsti-üstüne birleşdirilen sekizburçluklaryň ikisinden ybaratdyr. Onuň ýokarda ýerleşdirilen sekizburçly ýyldyzynyň burçlarynyň her birinde milli nagyş şekillendirilip, gyzyl reňkli sirkoniý daşy oturdylan. Aşaky sekizburçly ýyldyzyň burçlarynyň her birinde açyk ýaşyl reňkli milli nagyşyň ýüzüne ýaşyl reňkli sirkoniý daşlarynyň ikisi oturdylyp, gapdallarynda gün şöhleleri şekillendirilen.

Ýokarky sekizburçly ýyldyzyň merkezinde umumy diametri 32 mm bolan tegelekleriň ikisi ýerleşdirilen, diametri 26 mm bolan oýulyp şekillendirilen ýerligi altyn çaýylan içki tegelekde Ýer şarynyň şekilinde Türkmenistanyň ýaşyl reňkli syrçalanan kartasy, onuň daşynda parahatçylygyň nyşany bolan ak kepderiniň uçup barýan altyn çaýylan şekili, şeýle hem Türkmenistanyň we Birleşen Milletler Guramasynyň parlap duran baýdaklary, olaryň sag tarapynda bolsa Türkmenistanyň hemişelik Bitaraplygynyň 20 ýyllygyny aňladýan rim san bilen «XX» diýlen ýazgy şekillendirilen. 

Içki tegelegiň daşynda ýerligi ýaşyl reňkli syrçalanan ini 3,5 mm bolan halkanyň ýokarky böleginde «GARAŞSYZ, BAKY BITARAP TÜRKMENISTAN» diýen altyn çaýylan ýazgy, aşaky böleginde bolsa sekiz burçly milli nagyşlaryň ýedisi ýerleşdirilen.

Ýubileý medalynyň umumy diametri 44 mm. 

Ýubileý medaly halkajyk arkaly ini 30 mm we beýikligi 20 mm bolan baýdak görnüşdäki kolodka birleşdirilýär. Ýaşyl reňkli syrça örtülen kolodkada türkmen milli gölleri, ýarym aý we bäş sany ýyldyz şekillendirilen. 

Ýubileý medaly 925 mähekli kümüşden ýasalyp, onuň ýüzüne altyn çaýylýar.