TÜRKMENISTANYŇ KANUNY

Türkmenistanyň «Türkmenistanyň ussat halypa

çapyksuwary» diýen hormatly adyny 

döretmek hakynda

(Türkmenistanyň Mejlisiniň Maglumatlary, 2014 ý., № 3, 109-njy madda)

1-nji madda. Türkmenistanyň «Türkmenistanyň ussat halypa çapyksuwary» diýen hormatly adyny döretmeli.

2-nji madda. Türkmenistanyň «Türkmenistanyň ussat halypa çapyksuwary» diýen hormatly adynyň Düzgünnamasyny we onuň döşe dakylýan nyşanynyň Ýazgysyny tassyklamaly (goşulýar).

3-nji madda. Şu Kanun resmi taýdan çap edilen gününden güýje girýär.

Türkmenistanyň                                                   Gurbanguly

     Prezidenti                                                    Berdimuhamedow

Aşgabat şäheri.

2014-nji ýylyň 16-njy awgusty.

№ 109-V.

Türkmenistanyň «Türkmenistanyň ussat halypa 

çapyksuwary» diýen hormatly adynyň

DÜZGÜNNAMASY

(03.06.2023 ý. № 28-VII Türkmenistanyň Kanuny esasynda girizilen üýtgetme bilen)

1. Türkmenistanyň «Türkmenistanyň ussat halypa çapyksuwary» diýen hormatly ady Türkmenistanyň döwlet sylagydyr.

2. Türkmenistanyň Garaşsyzlyk ýyllarynda ahalteke bedewleriniň şan-şöhratyny dünýä ýaýmakda özüni görkezen, atçylyk pudagyny, şol sanda atçylyk sportuny ösdürmekde ýardam berýän, şeýle hem Türkmen bedewiniň baýramy mynasybetli ýurdumyzda her ýyl geçirilýän at çapyşyklarynda öz  seýislän bedewi bilen ýokary ussatlygy görkezip, baýrakly orunlary eýelän, ýaş çapyksuwarlara at çapmagyň inçe tälimleriniň nusgalyk usullaryny öwredýän, ýokary ussatlygy hem-de hünäre ezberligi görkezen adamlara Türkmenistanyň «Türkmenistanyň ussat halypa çapyksuwary» diýen hormatly ady dakylýar.

3. Türkmenistanyň «Türkmenistanyň ussat halypa çapyksuwary» diýen hormatly ady Türkmenistanyň raýatlaryna dakylýar.

4. Türkmenistanyň «Türkmenistanyň ussat halypa çapyksuwary» diýen hormatly ady Türkmenistanyň Prezidentiniň Permany bilen dakylýar.

5. Türkmenistanyň «Türkmenistanyň ussat halypa çapyksuwary» diýen hormatly adynyň dakylmagy döwlet häkimiýet we dolandyryş edaralarynyň merkezi edaralarynyň ýolbaşçylarynyň, welaýatlaryň, Aşgabat we Arkadag şäherleriniň häkimleriniň, şeýle hem jemgyýetçilik guramalarynyň teklipnamalary esasynda amala aşyrylýar.

Teklipnamalar Türkmenistanyň Prezidentiniň adyna iberilýär.

6. Türkmenistanyň «Türkmenistanyň ussat halypa çapyksuwary» diýen hormatly ady dakylan adamlara Türkmenistanyň «Türkmenistanyň ussat halypa çapyksuwary» diýen hormatly adynyň şahadatnamasy we döşe dakylýan nyşany gowşurylýar.

Türkmenistanyň «Türkmenistanyň ussat halypa 

çapyksuwary» diýen hormatly adynyň döşe dakylýan nyşanynyň

ÝAZGYSY

Türkmenistanyň «Türkmenistanyň ussat halypa çapyksuwary» diýen hormatly adynyň döşe dakylýan nyşany milli nagyşly ýaşyl syrça bilen syrçalanan sekizburçly ýyldyz görnüşindedir we onuň altyn çaýylan burçlarynyň her birinde ýaşyl reňkli sintetik daş goýulan. Döşe dakylýan nyşanyň umumy diametri – 44 mm.

Döşe dakylýan nyşanyň diametri 24 mm bolan ýerligi ak reňkli syrça bilen syrçalanan merkezi tegeleginiň merkezi böleginde Türkmenistanyň ýaşyl reňkli syrçalanan kartasynyň ýüzünde altyn çaýylan ganatly atyň iki ölçegli şekili ýerleşdirilen. Atyň şekiliniň aşagynda – parahatçylygyň nyşany bolan ýaýrap gidýän altyn reňkli zeýtun şahalarynyň ikisi şekillendirilen. Döşe dakylýan nyşanyň merkezi tegeleginiň daşynda diametri 31 mm, ini 3,5 mm bolan gyzyl reňk bilen syrçalanan tegelek halkanyň içiniň ýokarky böleginde «TÜRKMENISTANYŇ USSAT HALYPA ÇAPYKSUWARY» diýen altyn çaýylan ýazgy, aşaky böleginde bolsa deň aralykda ak reňkli sintetik daşlaryň on birisi ýerleşdirilen.

Döşe dakylýan nyşan halkajyk arkaly beýikligi 20 mm we ini 31 mm bolan gönüburçly altyn çaýylan kolodka birleşdirilýär. Ýaşyl reňkli syrça örtülen kolodkada «TÜRKMENISTAN» diýen ýazgy, ýarym aý we ýyldyzlaryň bäşisi ýerleşdirilen.

Döşe dakylýan nyşan we onuň kolodkasy 925 mähekli kümüşden altyn çaýylyp ýasalýar.