TÜRKMENISTANYŇ

K A N U N Y

Türkmenistanyň "Watan" ordenini döretmek hakynda

(Türkmenistanyň Mejlisiniň Maglumatlary, 2007 ý., № 2, 50-madda)

Garaşsyz we bitarap Türkmenistanda, Türkmenistanyň Konstitusiýasyna laýyklykda iş ýüzünde özüniň kuwwatly durmuş güýjüni subut eden we biziň döwletimiziň ykdysady, durmuş we medeni ösüşini üpjün edýän dolandyrmagyň prezident respublikasy görnüşi kesgitlendi, biziň döwletimizde durnuklylyk, raýat parahatçylygy we ylalaşygy ýagdaýy pugta ornaşdy, dünýä bileleşiginiň milletleri tarapyndan ählumumy ykrar edilen adamyň we raýatyň ähli demokratik hukuklary we azatlyklary üpjün edilýär. Watana çäksiz we wepaly gulluk etmekde aýratyn hyzmatlaryň jemgyýet we döwlet tarapyndan ykrar edilmeginiň we mynasyp baha berilmeginiň zerurlygyny üpjün etmekden ugur alyp:

1-nji madda. Türkmenistanyň "Watan" ordenini döretmeli.

2-nji madda. Türkmenistanyň "Watan" ordeniniň Statutyny tassyklamaly (goşulýar).

3-nji madda. Türkmenistanyň "Watan" ordeniniň Ýazgysyny tassyklamaly (goşulýar).

4-nji madda. Şu Kanun kabul edilen pursadyndan güýje girýär.

Türkmenistanyň                                                   Gurbanguly

   Prezidenti                                                      Berdimuhamedow

Aşgabat şäheri.

2007-nji ýylyň 28-nji iýuny  

№ 125-III

Türkmenistanyň "Watan" ordeniniň

STATUTY

1. Türkmenistanyň "Watan" ordeni bilen Türkmenistanyň içeri we daşary syýasatyny durmuşa geçirmekde milli döwletliligi berkitmäge, Watany ykdysady, durmuş we medeni taýdan mundan beýläk-de ösdürmäge, onuň goranyş ukybyny berkitmäge we hemişelik bitaraplyk hukuk ýagdaýynyň dünýä ýurtlary bilen dostluk hem hyzmatdaşlyk ýörelgelerini işjeň amala aşyrmaga we şonuň esasynda Türkmenistanyň abraýyny ýokarlandyrmaga goşan aýratyn wajyp hyzmatlary üçin diňe Türkmenistanyň Prezidenti sylaglanylýar.

2. Türkmenistanyň "Watan" ordenine mynasyp bolan Döwlet baştutanyna  Türkmenistanyň Döwlet býujetiniň serişdelerinden ABŞ-nyň 20 müň dollary möçberinde birwagtlaýyn baýrak tölenilýär hem-de Döwlet býujetiniň serişdeleriniň hasabyna her aýda alýan iş hakynyň, wezipe aýlygynyň, pensiýasynyň 30 göterimi möçberde goşmaça töleg girdeji salgydy salynmazdan tölenilýär.

3. Türkmenistanyň "Watan" ordeni bilen Türkmenistanyň Prezidenti öz ygtyýarlar möhletiniň dowamynda diňe bir gezek sylaglanylyp bilner.

Türkmenistanyň "Watan" ordeniniň

Ý A Z G Y S Y

Türkmenistanyň "Watan" ordeni bilen diňe Türkmenistanyň Prezidenti sylaglanylýar. Bu orden 750-nji mähekli sary we ak altyndan zynjyr şekilinde ýasalyp, gyralary göwher daşlar bilen bezelen 22 sany sekizburçlyk ýyldyz görnüşli böleklerden ybarat.

Ýyldyzlaryň diametri 40 mm, esasy bölegi aýna görnüşli syrça bilen örtülendir. Merkezi üç bölekde ýaşyl reňkli syrçanyň ýerligi zeýtun pudaklary bilen bezelip, olarda Garaşsyzlyk binasy, Türkmenbaşy köşgi we Bitaraplyk derwezesi şekillendirilendir. Zynjyryň galan bölegi, her tarapyndan 5 sany gyrmyzy-gyzyl syrça bilen örtülen bäş milli türkmen gölüniň şekilleri ýerleşdirilen 10 sany sekizburçlykdan, şeýle hem ýaşyl syrça bilen örtülen we zeýtun pudagy şekillendirilen 9 sany sekizburçlykdan ybaratdyr. 

Zynjyr bilen birikdirilen sekizburçlyk görnüşindäki asygynyň diametri 80 mm. bolup, ýaşyl reňkli syrça bilen örtülip, gyralary göwher daşlary bilen bezelen. Onuň merkezinde Türkmenistanyň Prezidentiniň Tugunyň güberçek altyn şekili göwher daşlary bilen bezelip ýasalýar.

Ordeniň umumy agramy 925,0 (+/-2,5%) gram, göwher daşlarynyň umumy möçberi 55 karata deňdir. Orden sowgat gutusynda ýerleşdirilendir.