TÜRKMENISTANYŇ

K A N U N Y

«Türkmenistanyň Garaşsyzlygynyň 15 ýyllygyna» atly ýadygärlik medalyny döretmek hakynda

(Türkmenistanyň Mejlisiniň Maglumatlary, 2006 ý., № 4, 14-madda)

Türkmenistanyň Garaşsyzlygynyň şanly 15 ýyllygy mynasybetli, raýatlaryň garaşsyzlyk ýyllary içinde ýurdumyzyň syýasy, ykdysady, medeni ugurlarda gazanan ajaýyp zähmet üstünliklerini göz öňünde tutup, olary sylaglamak maksady bilen:

1-nji madda. «Türkmenistanyň Garaşsyzlygynyň 15 ýyllygyna» atly ýadygärlik medalyny döretmeli.

2-nji madda. «Türkmenistanyň Garaşsyzlygynyň 15 ýyllygyna» atly ýadygarlik medaly hakyndaky Düzgünnamany tassyklamaly (goşulýar).

3-nji madda. «Türkmenistanyň Garaşsyzlygynyň 15 ýyllygyna» atly ýadygärlik medalynyň Ýazgysyny tassyklamaly (goşulýar).

4-nji madda - 12.01.2016 ý. № 327-V Türkmenistanyň Kanuny esasynda güýjüni ýitiren.

Türkmenistanyň                                             Saparmyrat

      Prezidenti                                                  Türkmenbaşy

Aşgabat şäheri.

2006-njy ýylyň 2-nji oktýabry 

№ 58-III.

«Türkmenistanyň Garaşsyzlygynyň 15 ýyllygyna»

atly ýadygärlik medaly hakynda

DÜZGÜNNAMA

1.«Türkmenistanyň Garaşsyzlygynyň 15 ýyllygyna» atly ýadygärlik medaly şanly 15 ýylyň dowamynda Türkmenistan Watanymyzyň we jemgyýetiň öňünde halal zähmeti bilen uly hyzmatlary bitiren adamlary sylaglamak üçin döredilýär.

2.«Türkmenistanyň Garaşsyzlygynyň 15 ýyllygyna» atly ýadygärlik medaly bilen:

- Garaşsyz hem-de özygtyýarly döwlet hökmünde Bitarap Türkmenistany ykrar etmek boýunça köp ýyllaryň dowamynda çeken halal zähmeti, işjen we önjeýli döwlet, jemgyýetçilik işi hem-de ata Watanymyzyň dünýä ýüzündaki halkara abraýyny pugtalandyrmaga goşan uly şahsy goşandy üçin;

-Garaşsyz, Bitarap Tütkmenistanyň ykdysady kuwwatyny pugtalandyrmak, ylmyny, bilimini, medeniýetini, sungatyny, saglygy goraýşyny hem-de ýurduň durmuşynyň beýleki ähli pudaklaryny ösdürmek boýunça Türkmenistanyň Prezidenti Beýik Saparmyrat Türkmenbaşy tarapyndan işlenip taýýarlanan Altyn asyryň maksatnamalaryny abraýly durmuşa geçirmekde gazanan ajaýyp üstünlikeri we ýokary hyzmatlary üçin;

-Garaşsyz Türkmenistanyň goranmak ukybyny berkitmäge, raýatlaryň howpsuzlygyny we kanunylygy üpjün etmek işine goşan uly şahsy goşandy üçin;

-Altyn asyryň nesillerini ata Watana söýgi we oňa wepalylyk, mertlik halallyk, ruhubelentlik sypatlarynda terbiýelemek işinde görkezen ýokary hyzmatlary üçin sylaglanylýar.     

3. «Türkmenistanyň Garaşsyzlygynyň 15 ýyllygyna» atly ýadygärlik medaly bilen Garaşsyz Türkmenistanyň raýatlary sylaglanylýar.

«Türkmenistanyň Garaşsyzlygynyň 15 ýyllygyna» atly ýadygärlik medaly bilen Türkmenistanyň Prezidenti tarapyndan daşary ýurt raýatlary hem sylaglanyp bilner.

4. Şu sylaga mynasyp bolan adamlara «Türkmenistanyň Garaşsyzlygynyň 15 ýyllygyna» atly ýadygärlik medaly we onuň şahadatnamasy gowşurylýar.

5.«Türkmenistanyň Garaşsyzlygynyň 15 ýyllygyna» atly ýadygärlik medaly bilen sylaglanan adamlara iň pes iş hakynyň üç esse möçberinde birwagtlaýyn baýrak berilýär.

6.«Türkmenistanyň Garaşsyzlygynyň 15 ýyllygyna» atly ýadygärlik medaly bilen sylaglanan adamlar kanunçylykda bellenilen tertipde ýeňilliklerden peýdalanýarlar. 

«Türkmenistanyň Garaşsyzlygynyň 15 ýyllygyna» 

atly ýadygärlik medalynyň

ÝAZGYSY

«Türkmenistanyň Garaşsyzlygynyň 15 ýyllygyna» atly ýadygärlik medaly bäşgyran görnüşde bolup, beýikligi  40 mm, onuň her gapyrgasynyň uzynlygy 25 mm.

Medalyň ýüzündäki sekizburçlugyň diametri 29 mm deň bolup, merkezinde Türkmenistanyň Prezidenti Beýik Saparmyrat Türkmenbaşynyň barelýef görnüşli şekili ýerleşdirilendir. Barelýef şekiliniň arkasynda günüň şöhleleri ýerleşdirilendir. Ol şöhleler medalyň sekizburçlugynyň bütin çägine ýaýradylyp ýerleşdirilendir.

Medalyň sekizburçlugynda «Türkmenistanyň Garaşsyzlygynyň 15 ýyllygyna» diýen ýazgy güberçek görnüşde ýerleşdirilendir. Şol ýazgynyň «Türkmenistanyň Garaşsyzlygynyň» diýen bölegi sekizburçlugyň ýokarsynda ýarymaýlaw görnüşinde ýerleşdirilendir. Ýazgynyň «15 ýyllygyna» diýen bölegi Türkmenistanyň Prezidenti Beýik Saparmyrat Türkmenbaşynyň barelýef şekiliniň aşagynda iki setirde ýarymaýlaw görnüşde, medalyň sekizburçlugynyň aşaky böleginde Türkmenistanyň Döwlet baýdagyndaky bäş sany milli haly gölleriniň şekilleri biri-birinden deň uzaklykda ýarymaýlaw görnüşinde ýerleşdirilendir.

Sekizburçlugyň daşy ak pagtanyň ýaprakly bäş hanaly açylan gozalarynyň şekilleri bilen bezelendir.

Medal 9 mm x 7 mm deň bolan halkajyk arkaly altyn zynjyr bilen boýundan asylýar. Zynjyryň uzynlygy 70 sm. Medalyň halkajygynda ýarym aý we bäş sany bäşburç ýyldyzyň güberçek şekili ýerleşdirilendir.

Medalyň arka tarapynda ýarym aý we bäş sany bäşburç ýyldyzyň şekili, «Türkmenistanyň Prezidenti Beýik Saparmyrat Türkmenbaşydan. 27 Garaşsyzlyk 2006» diýlen dört setirden ybarat ýazgy keseligine ýerleşdirilendir.

«Türkmenistanyň Garaşsyzlygynyň 15 ýyllygyna» atly ýadygärlik medaly 750-nji mähekli altyndan ýasalýar.