TÜRKMENISTANYŇ

K A N U N Y

«Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medalyny döretmek hakynda

(Türkmenistanyň Mejlisiniň Maglumatlary, 2006 ý., № 4, 15-madda)

(26.11.2010 ý. № 148-IV Türkmenistanyň Kanuny esasynda girizilen üýtgetmeler bilen)

Türkmenistanyň Garaşsyzlygynyň 15 ýyllygyna bagyşlanan dabaraly harby ýörişe gatnaşyjylary we şol ýörişi geçirmegi üpjün edýän adamlary höweslendirmek maksady bilen:

1-nji madda. «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medalyny döretmeli.

2-nji madda. «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medaly hakyndaky Düzgünnamany tassyklamaly (goşulýar).

3-nji madda. «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medalynyň we onuň plankasynyň Ýazgylaryny tassyklamaly (goşulýar).

4-nji madda - 12.01.2016 ý. № 327-V Türkmenistanyň Kanuny esasynda güýjüni ýitiren.

Türkmenistanyň                                       Saparmyrat

Prezidenti                                                  Türkmenbaşy

Aşgabat şäheri.

2006-njy ýylyň 2-nji oktýabry 

№ 59-III.

«Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň

ýadygärlik medaly hakynda

DÜZGÜNNAMA

1. «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medaly Türkmenistanyň garaşsyzlygynyň 15 ýyllyk baýramynyň hormatyna geçiriljek dabaraly harby ýörişe gatnaşyjylary we ýörişi guramaçylykly geçirmäge goşant goşan adamlary sylaglamak üçin döredildi.

2. «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medaly bilen Türkmenistanyň raýatlary sylaglanylýar.

3. «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medaly bilen sylaglanan adamlara şu medal we onuň şahadatnamasy gowşurylýar.

4. «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medaly döşüň çep tarapyndan dakylýar we beýleki sylaglary bar bolsa, «Türkmenistanyň Garaşsyzlygynyň 10 ýyllyk baýramynyň hormatyna harby ýörişe gatnaşyja» atly Türkmenistanyň ýadygärlik medalyndan soň ýerleşdirilýär.

«Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň

ýadygärlik medalynyň

ÝAZGYSY

«Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medaly onaltyburçluk gornüşinde bolup, olaryň sekiz sanysy ýüzüne gyzyl çaýylan we sekiz sanysy hem inçe nagyşly kümüş çaýylan burçlardyr. Kümüş çaýylan burçlaryň ortasynda uzynlygy 4 millimetr, ini 1,5 millimetr bolan gök reňkli emal bilen syrçalanan zolaklar ýerleşdirilendir.

Medalyň umumy diametri 40 millimetrdir.

Medalyň diametri 28 millimetr bolan sekizburçly merkezi bölegi ýaşyl reňkli syrça bilen örtülendir. Medalyň merkezi böleginde diametri 21 millimetr bolan gyzyl çaýylan, inine 3 millimetr ölçegdäki tegelegiň içinde türkmen dilinde «Garaşsyz Türkmenistana 15 ýyl» diýen ýazgy hem-de on bäş sany bäşburçly ýyldyzjyklar ýerleşdirilendir. Medalyň merkezi bölegindäki tegelegiň içinde gyzyl çaýylan Türkmenistanyň kartasy, Garaşsyzlyk binasy we esgerleriň nyzamly ýöriş bilen barýan kolonnasy ýerleşdirilendir.

Medal mis bilen nikeliň garyndysyndan ýasalýar. Medal halkajyk arkaly beýikligi 15 millimetr we ini 28 millimetr bolan bäşburçly kolodka bilen birleşdirilendir. Kolodkanyň ýaşyl reňkli syrça bilen örtülen esasy meýdanynda, gyzyl çaýylan, biri-biri bilen kesişýän zeýtun şahalarynyň ikisi bilen Türkmenistanyň Döwlet tugrasy şekillendirilendir.

Medalyň arka tarapynda, diametri 4 millimetr bolan tegelegiň içinde «Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja ýadygärlik medaly» diýen ýazgy hem-de lentanyň içinde «2006» diýen ýazgy we güberçek görnüşindäki bäş sany ýyldyzly ýarym aý şekillendirilendir.

Kolodkanyň arka tarapynda medaly eginbaşa berkitmek üçin iňňebagjyk bar.

«Türkmenistanyň Garaşsyzlygynyň 15 ýyllygyna 

bagyşlanyp geçirilen dabaraly harby ýörişe gatnaşyja» diýen Türkmenistanyň ýadygärlik medalynyň plankasynyň

ÝAZGYSY

«Türkmenistanyň Garaşsyzlygynyň 15 ýyllygyna bagyşlanyp geçirilen dabaraly harby ýörişe gatnaşyja» diýen Türkmenistanyň  ýadygärlik medalynyň plankasynyň düşegi ýaşyl reňkli ýüpek mata bolup, onuň merkezinde iki tarapa ýaýrap gidýän parahatçylygyň nyşany bolan altyn reňkli zeýtun şahalary, onuň içinde Garaşsyzlyk binasy we «XV ýyl» diýen ýazgy ýerleşdirilendir.

Plankanyň daşky gyrasy sary we goňur reňk bilen örtülen.