TÜRKMENISTANYŇ 

 K A N U N Y

Türkmenistanyň "Garaşsyzlyk" ordenini döretmek hakynda

(Türkmenistanyň Mejlişiniň Maglumatlary, 2001 ý., № 2.,24-madda)

(16.10.2001 ý. № 89-II; 13.07.2007 ý. № 131-III; 02.10.2009 ý. № 68-IV we 01.03.2014 ý.

 № 31-V Türkmenistanyň Kanunlary esasynda  girizilen üýtgetmeler we goşmaçalar bilen)

Türkmenistanyň Prezidenti Beýik Saparmyrat Türkmenbaşynyň öňdengörüjiligi, dana pähim-parasaty bilen gazanylan mukaddes Garaşsyzlygymyz ata-babalarymyzyň müňýyllyklaryň dowamynda gursaklarynda göterip gelen abadan durmuş, Garaşsyz Watan hakyndaky näzik umyt-arzuwlarynyň ebedilik hasyl bolmagydyr.

Garaşsyzlyk merdana türkmeniň buýsançly, baý taryhynyň, milli däp-dessurlarynyň, toý-baýramlarynyň, ebedilik dabaralanmagydyr. Beýik türkmeniň bagtynyň oýanmagydyr.

Garaşsyz Türkmenistanyň ilkinji Prezidenti Beýik Saparmyrat Türkmenbaşynyň hut özüniň gije-gündizläp çeken halal zähmeti bilen döredilen "On ýyl Abadançylyk"; "Täze oba", "Däne", "Saglyk", "Bilim" hem-de "Türkmenistanyň durmuş-ykdysady özgertmeleriň 2010-njy ýyla çenli baş ugry" Milli maksatnamasy sarsmaz döwletimiziň ilkinji günlerinden başlap polat kimin mäkämleşmegi ykdysadyýetde, syýasatda, medeniýetde we durmuşyň ähli beýleki ugurlarynda gazanylan ýeňişleriň, ýetilen belent sepgitleriň ýeke-täk hem aýdyň ýolunyň dogry maksatnamalarydyr. Şol ajaýyp maksatnamalaryň üstünlikli durmuşa geçirilmegi bolsa, sabyr-kanagatly, merdana türkmen halkymyzyň ýeke-täk hem belent Başa - Baky Serdaryna ýürekden uýup, onuň daşyna mäkäm jebişleşip, çeken agzybirlikli, guramaçylykly halal zähmetlerine baglydyr.

Öz çekýän halal zähmetinden ruhy lezzet alyp, döredijilikli işlemek bolsa, ähli zamanlarda üstünligiň, abraýyň, uly hormata mynasyp bolmagyň esasy çeşmesidir. Raýatlaryň ata Watanyň we jemgyýetiň öňünde bitiren aýratyn hyzmatlaryny höweslendirmek, olaryň on ýylyň içinde gazanan zähmet üstünliklerini ýokary döwlet derejesinde ykrar etmek hem-de türkmeniň Beýik Saparmyrat Türkmenbaşynyň mukaddes Ruhnamasy bilen ruhlanyp, Altyn asyrda gazanan zähmet üstünliklerini, hünar ussatlyklaryny görkezen adamlary bellemek maksady bilen:

1-nji madda.

Döwlet sylagyny - Türkmenistanyň "Garaşsyzlyk" ordenini döretmeli.

2-nji madda.

Türkmenistanyň "Garaşsyzlyk" ordeniniň düzgünnamasyny tassyklamaly (goşulýar).

3-nji madda.

Türkmenistanyň "Garaşsyzlyk" ordeniniň ýazgysyny tassyklamaly (goşulýar).

Türkmenistanyň                                                 Saparmyrat

Prezidenti                                                           Türkmenbaşy

Aşgabat şäheri

2001-nji ýylyň 18-nji iýuny

№ 67-II 

Türkmenistanyň «Garaşsyzlyk» ordeniniň

STATUTY

(rejelenen görnüşi)

1. Türkmenistanyň «Garaşsyzlyk» ordeni döwlet sylagy bolmak bilen, ata Watanymyzyň şöhratly Garaşsyzlyk ýyllarynda türkmen halkynyň Altyn asyrynda durmuşyň dürli ugurlarynda zähmet we hünär işinde görkezilen aýratyn hyzmatlar üçin tapawutlandyryş nyşanydyr.

2. Türkmenistanyň «Garaşsyzlyk» ordeni bilen:

ata Watanymyz Türkmenistan döwletiniň mukaddes Garaşsyzlygyny pugtalandyrmakda, döwletiň goranmak ukybyny we howpsuzlygyny berkitmekde, ýurtda kanunçylygyň hem-de hukuk tertibiniň ýokary derejesini saklamakda, Türkmenistanyň dünýä ýüzündäki at-abraýyny ýokarlandyrmakda bitiren aýratyn hyzmatlary üçin;

ykdysadyýetde, syýasatda, medeniýetde we durmuşyň beýleki ugurlarynda gazanan aýratyn zähmet üstünlikleri üçin;

ýokary hünär ussatlygy, döredijilik zähmeti üçin sylaglanylýar.

3. Türkmenistanyň «Garaşsyzlyk» ordeni bilen Türkmenistanyň raýatlary sylaglanylýar.

Türkmenistanyň «Garaşsyzlyk» ordeni bilen beýleki ýurtlaryň raýatlary hem sylaglanylyp bilner.

4. Türkmenistanyň «Garaşsyzlyk» ordeni bilen sylaglamak ýylda bir gezek geçirilýär we Türkmenistanyň Garaşsyzlyk gününe gabat getirilýär. Beýleki halatlarda Türkmenistanyň «Garaşsyzlyk» ordeni bilen sylaglamak Türkmenistanyň Prezidentiniň çözgüdi bilen geçirilýär.

5. Türkmenistanyň «Garaşsyzlyk» ordeni bilen sylaglananlara:

Türkmenistanyň «Garaşsyzlyk» ordeni we şahadatnama gowşurylýar;

iň pes aýlyk zähmet hakynyň ýigrimi essesi möçberde birwagtlaýyn baýrak berilýär;

iş hakyna, aýlyk wezipe hakyna, pensiýasyna, kömek puluna, talyp hakyna iň pes aýlyk zähmet hakynyň 30 göterimi möçberinde her aýda goşmaça hak tölenilýär.

Türkmenistanyň «Garaşsyzlyk» ordeniniň plankasynyň

ÝAZGYSY

Türkmenistanyň «Garaşsyzlyk» ordeniniň plankasynyň düşegi ýaşyl reňkli ýüpek mata bolup, onuň iki tarapyndan sary çyzykly açyk ýaşyl reňkli dik çyzyk geçýär.

Türkmenistanyň «Garaşsyzlyk» ordeniniň

ÝAZGYSY

(rejelenen görnüşi)

Türkmenistanyň «Garaşsyzlyk» ordeni sekizburçluk görnüşinde bolup, onuň her burçunda togalak düwme goýlan. Ol burçlaryň arasy ýaşyl reňkli syrça örtülen ýarym aýlaw bilen birikdirilip, ol aýlawlarda Gün şöhleleri görnüşinde çyzyklar we milli nagyşlar şekillendirilen. Ordeniň umumy diametri 42 mm.

Ordeniň merkezinde diametri 23 mm bolan ýerligi dogup gelýän Günüň şöhleleri şekillendirilen altyn çaýylan tegelegiň orta böleginde Türkmenistanyň ýaşyl reňkli syrçalanan kartasy we Türkmenistanyň Garaşsyzlyk binasynyň güberçek altyn çaýylan şekili ýerleşdirilen. 

Ordeniň merkezi tegeleginiň daşyndan diametri 30 mm bolan ýaşyl reňkli syrçalanan tegelek halkanyň ýokarky böleginde «GARAŞSYZLYK» diýen altyn çaýylan ýazgy, aşaky böleginde iki tarapa ýaýrap gidýän altyn çaýylan zeýtun şahalary ýerleşdirilen.

Ordeniň her burçunda bäş sany akasirkoniý daşjagazlary, burçlaryň ortasynda bolsa gyzyl reňkli daşjagazlar goýlandyr.

Orden halkajyk arkaly beýikligi 20 mm we ini 31 mm bolan açyk kitap görnüşinde şekillendirilen daşy altyn çaýylan bezeg bilen jäheklenen ýaşyl reňkli syrçaly kolodka birleşdirilýär. Kolodkanyň ortasynda gyzyl reňkli syrçalanan sütünde türkmen halysynyň bäş sany altyn çaýylan gölleri ýerleşdirilendir.

Türkmenistanyň «Garaşsyzlyk» ordeni altyn çaýylan 925 mähekli kümüşden ýasalýar.