TÜRKMENISTANYŇ 

K A N U N Y

"Türkmenistanyň Garaşsyzlygynyň 10 ýyllygyna" atly 

ýubileý medalyny döretmek hakynda

(Türkmenistanyň Mejlisiniň Maglumatlary,  2001 ý. № 2, 25 - madda)

(Türkmenistanyň  16.10.2001ý. № 89-II  Kanuny esasynda girizilen üýtgetmeler 

we goşmaçalar bilen)

Türkmenistanyň Garaşsyzlygynyň şanly 10 ýyllygyny şöhratlandyrmak hem-de şu geçen döwürde ata Watanymyzyň raýatlarynyň Beýik Saparmyrat Türkmenbaşynyň mukaddes Ruhnamasy bilen ruhlanyp gazanan ajaýyp zähmet üstünliklerini göz öňünde tutup, sylaglamak maksady bilen:

1–nji madda. «Türkmenistanyň Garaşsyzlygynyň 10 ýyllygyna» atly ýubileý medalyny döretmeli.

2–nji madda. «Türkmenistanyň Garaşsyzlygynyň 10 ýyllygyna» atly ýubileý medaly hakyndaky Düzgünnamany tassyklamaly (goşulýar).

3-nji madda. «Türkmenistanyň Garaşsyzlygynyň 10 ýyllygyna» atly ýubileý medalynyň ýazgysyny tassyklamaly (goşulýar).

Türkmenistanyň                                                 Saparmyrat

Prezidenti                                                           Türkmenbaşy

Aşgabat şäheri

2001-nji ýylyň 18-nji iýuny       

№ 68 – II 

«Türkmenistanyň Garaşsyzlygynyň 10 ýyllygyna» atly ýubileý medalynyň

DÜZGÜNNAMASY

l. «Türkmenistanyň Garaşsyzlygynyň 10 ýyllygyna» atly ýubileý medaly şanly 10 ýylyň dowamynda ata Watanymyzyň we jemgyýetimiziň öňünde halal zähmeti bilen uly hyzmatlary bitiren adamlary sylaglamak üçin döredilýär.

2.«Türkmenistanyň Garaşsyzlygynyň 10 ýyllygyna» atly ýubileý medaly bilen Garaşsyz Türkmenistanyň raýatlary sylaglanylýar.

«Türkmenistanyň Gara;syzlygynyň 10 ýyllygyna» atly ýubileý medaly bilen Türkmenistanyň Prezidenti tarapyndan daşary ýurtly raýatlar hem sylaglanyp bilner.

3. «Türkmenistanyň Garaşsyzlygynyň 10 ýyllygyna» atly ýubileý medaly bilen:

- Garaşsyz hem-de özbaşdak döwlet hökmünde Bitarap Türkmenistany  ykrar etmek boýunça köp ýyllaryň dowamynda çeken halal zähmeti, işjeň we önjeýli döwlet, jemgyýetçilik işi hem-de ata Watanymyzyň dünýä ýüzündäki halkara abraýyny pugtalandyrmaga goşan uly şahsy goşandy üçin;

- Garaşsyz, Bitarap Türkmenistanyň ykdysady kuwwatyny pugtalandyrmak, ylmyň-bilimiň, medeniýetiň-sungatyň, saglygy goraýşyň hem-de durmuşyň beýleki ähli pudaklaryny ösdürmek boýunça Türkmenistanyň Prezidenti Beýik Saparmyrat Türkmenbaşynyň işläp taýýarlan «Altyn asyryň Maksatnamasyny» abraýly durmuşa geçirmekde gazanan ajaýyp üstünlikleri we ýokary hyzmatlary üçin; 

- Garaşsyz döwletimiziň goranmak ukybyny berkitmäge, raýatlaryň
howpsuzlygyny we kanunçylygy üpjün etmek işine goşan uly şahsy goşandy üçin;

-Altyn asyryň altyn nesillerini ata Watana söýgi we oňa wepalylyk, mertlik, halallyk, ruhubelentlik sypatlarynda terbiýelemek işinde görkezen ýokary hyzmatlary üçin sylaglanylýar.               

 4. Şu sylaga mynasyp bolan adamlara «Türkmenistanyň Garaşsyzlygynyň 10 ýyllygyna» atly ýubileý medaly we şahadatnama gowşurylýar.

5-nji we 7-nji bölümler 16.10.2001ý. № 89-II Türkmenistanyň Kanuny esasynda aýrylan.

 6. «Türkmenistanyň Garaşsyzlygynyň 10 ýyllygyna» atly ýubileý medaly bilen sylaglanan adamlar kanunçylykda bellenilen halatlarda we tertipde ýeňilliklerden peýdalanýarlar.

«Türkmenistanyň Garaşsyzlygynyň 10 ýyllygyna»

diýen döşe dakylýan ýubileý medalynyň

ÝAZGYSY

Ýubileý medaly tegelek görnüşde bolup, zynjyr halkalar arkaly kolodka berkidilendir.

Medalyň tegeleginiň diametri 65 mm.

Medalyň tegeleginiň merkezinde Türkmenistanyň Prezidenti Beýik Saparmyrat Türkmenbaşynyň barelýef görnüşli şekili ýerleşdirilendir. Beýik Saparmyrat Türkmenbaşynyň barelýef şekiliniň arkasyndan dogup gelýän Günüň şöhleleri ýerleşdirilendir. Ol şöhleler medalyň tegeleginiň bütin çägine ýaýradylyp ýerleşdirilendir.

Medalyň tegeleginde «Türkmenistanyň Garaşsyzlygynyň 10 ýyllygyna» diýlen ýazgy güberçek görnüşde ýerleşdirilendir. Şol ýazgynyň «Türkmenistanyň Garaşsyzlygynyň» diýen bölegi medal tegeleginiň ýokarsynda ýarymhalka görnü;de ýerleşdirilendir. Ýazgynyň «10 ýyllygyna» diýen bölegi medal tegeleginiň merkeziniň aşaky böleginde göniburçly görnüşde, medal tegeleginiň aşaky böleginde zeýtun ýapraklaryndan bolan şekil ýarymhalka görnüşde ýerleşdirilendir. 

Medal tegeleginiň bütin töweregine l,5 mm. inli güberçek halka ýerleşdirilendir. Ol halkanyň içinde 36 sany tegelek nokat güberçek görnüşde ýerleşdirilendir. Medalyň tegeleginiň ýasalýan materialy tompak metalyndandyr. Onuň ýüzüne soňra altyn çaýylýandyr.

Medalyň kolodkasy göniburç şekilde bolup, onuň ýokarky hem-de aşaky bölegi üçburç şekillendirilendir. Kolodka tompak metalyndan ýasalyp, ýüzüne emal caýylýar.

Kolodkanyň göniburç şekili goýy gyrmyzy reňkli emal bolup, onuň ýüzüne Türkmenistanyň Döwlet Baýdagynyň bäş sany göli ýerleşdirilendir.

Kolodkanyň üçburç şekilleriniň reňki ýaşyl emal bilen reňklenilýär.

Medalyň arka tarapynda «Türkmenistanyň Prezidenti Beýik Saparmyrat Türkmenbaşydan» diýen ýazgy töwerekleýin ýerleşdirilendir.