Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, häzirki wagtda sebitde ýetişdirilen pagta hasylyny soňky hanasyna çenli ýitgisiz ýygnap almak boýunça işler dowam edýär. Ýygnalan hasyl pagta kabul ediş harmanhanalarynda, pagta arassalaýjy kärhanalarda bökdençsiz kabul edilýär. Bugdaý ekilen meýdanlarda agrotehnikanyň kadalaryna laýyklykda ideg etmek, hususan-da, gögeriş we ösüş suwuny tutmak işleri ýerine ýetirilýär. Welaýatda güýzlük ýeralma, gök-bakja, beýleki azyklyk ekinleri ekilen meýdanlarda ideg etmek, ýetişdirilen hasyly ýygnap almak işleri alnyp barylýar. Şeýle hem häkim ýurdumyzy durmuş-ykdysady taýdan ösdürmek boýunça maksatnamalara laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Hormatly Prezidentimiz hasabaty diňläp, pagta hasylyny soňky hanasyna çenli ýygnap almak, ýygymyň depginini güýçlendirmek, bugdaý ekişini öz wagtynda tamamlamak, gögeriş alnan ýerlerde ideg etmek işlerini berk gözegçilikde saklamagy tabşyrdy. Döwlet Baştutanymyz şu ýyl welaýatda açylyp ulanmaga berilmegi göz öňünde tutulýan dürli maksatly desgalardaky gurluşyk işlerini hem gözegçilikde saklamagy tabşyrdy.

Soňra Balkan welaýatynyň häkimi R.Jumaýewe söz berildi. Häkim, ilki bilen, welaýatyň edermen daýhanlarynyň pagta öndürmek baradaky şertnamalaýyn borçnamalaryny üstünlikli ýerine ýetirip, Watan harmanyna “ak altynyň” bol hasylyny tabşyrandyklary baradaky hoş habary ýetirdi we döredilýän ähli şertler, berilýän goldaw-hemaýatlar üçin welaýatyň ýaşaýjylarynyň adyndan hormatly Prezidentimize tüýs ýürekden hoşallyk bildirdi.

Soňra häkim welaýatdaky möwsümleýin oba hojalyk işleri barada hasabat berdi. Nygtalyşy ýaly, häzirki wagtda sebitde bugdaý ekişi tamamlaýjy tapgyrda dowam edýär. Ekiş geçirilen meýdanlarda gögeriş hem-de ösüş suwuny tutmak, gögeriş alnan ýerlerde mineral dökünler bilen iýmitlendirmek, ideg etmek işleri alnyp barylýar. Ýurdumyzda gök-bakja ekinleriniň öndürilýän möçberini yzygiderli artdyrmak barada öňde goýlan wezipelerden ugur alnyp, welaýatda güýzlük ekilen ekinlere ideg etmek, ýetişdirilen hasyly ýygnap almak işleri ýerine ýetirilýär. Şeýle-de häkim şu ýyl açylyp ulanmaga berilmegi göz öňünde tutulýan medeni-durmuş, önümçilik maksatly binalardaky gurluşyk işleriniň ýagdaýy barada hasabat berdi.

Hormatly Prezidentimiz hasabaty diňläp, welaýatyň ussat babadaýhanlarynyň Watan harmanyna pagta tabşyrmak boýunça şertnamalaýyn borçnamalaryny üstünlikli ýerine ýetirmekleri bilen welaýatyň pagtaçy daýhanlaryny, oba hojalyk işgärlerini tüýs ýürekden gutlap, olara täze rowaçlyklary arzuw etdi. Döwlet Baştutanymyz bugdaý ekilen meýdanlardaky ideg işleriniň agrotehnikanyň kadalaryna laýyklykda alnyp barylmagynyň möhümdigini aýdyp, bu işleri gözegçilikde saklamagy tabşyrdy. Ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, welaýatda şu ýyl üçin meýilleşdirilen gurluşyk işleriniň ýokary hilli ýerine ýetirilmegini gözegçilikde saklamak babatda-da degişli görkezmeler berildi.

Daşoguz welaýatynyň häkimi D.Babaýew welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, şu günler gowaça meýdanlaryndaky pagta hasylyny ýitgisiz ýygnap almak boýunça zerur çäreler görülýär. Ýygym möwsüminde ulanylýan oba hojalyk tehnikalarynyň doly güýjünde işledilmegine, ýygnalan hasylyň kabul ediş harmanhanalarynda bökdençsiz kabul edilmegine aýratyn üns berilýär. Welaýatda bugdaý ekişini ýokary hilli geçirmek ugrunda degişli işler ýerine ýetirilip, ekiş geçirilen meýdanlarda endigan gögeriş alynýar. Sebitde şaly hasylyny ýygnap almak işleri guramaçylykly dowam edýär. Ýurdumyzda azyk bolçulygyny has-da pugtalandyrmak barada öňde goýlan wezipelerden ugur alnyp, ekerançylyk meýdanlarynda güýzlük gök-bakja, beýleki azyklyk ekinleriň hasylyny ýygnap almak hem-de ilata ýetirmek boýunça degişli işler alnyp barylýar. Şeýle hem häkim ýurdumyzy durmuş-ykdysady taýdan ösdürmäge gönükdirilen maksatnamalara laýyklykda, şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň alnyp barlyşy barada hasabat berdi.

Arkadagly Gahryman Serdarymyz hasabaty diňläp, welaýatda ýetişdirilen pagta hasylyny soňky hanasyna çenli ýitgisiz ýygnap almagy, güýzlük bugdaý ekişini agrotehniki möhletlerde tamamlamagy, ekiş geçirilen ýerlerde ideg etmek işlerini gözegçilikde saklamagy tabşyrdy. Şeýle hem döwlet Baştutanymyz ýurdumyzy durmuş-ykdysady taýdan ösdürmek boýunça maksatnamalaryň çäklerinde welaýatda şu ýyl üçin meýilleşdirilen işleriň ýokary hilli, öz wagtynda ýerine ýetirilmegini üpjün etmegi tabşyrdy.

Lebap welaýatynyň häkimi H.Aşyrmyradow welaýatdaky möwsümleýin oba hojalyk işleri barada hasabat berdi.

Hasabatda bellenilişi ýaly, sebitiň ekerançylyk meýdanlarynda ýetişdirilen pagta hasylyny ýitgisiz ýygnap almak boýunça işler dowam edýär. Ýygnalan hasyl kabul ediş harmanhanalarynda, pagta arassalaýjy kärhanalarda bökdençsiz kabul edilýär. Welaýatda bugdaý ekişi tamamlaýjy tapgyrda dowam edip, ekiş geçirilen meýdanlarda gögeriş we ösüş suwuny tutmak işleri ýerine ýetirilýär. Ýetişdirilen şaly hasylyny öz wagtynda ýygnap almak ugrunda degişli işler alnyp barylýar. Ekerançylyk meýdanlarynda gök-bakja, beýleki azyklyk ekinleriň hasylyny ýygnap almak, bu önümler bilen ak bazarlary üpjün etmek boýunça zerur çäreler görülýär. Şeýle-de häkim Oba milli maksatnamasyna laýyklykda, şu ýyl welaýatda açylyp ulanmaga berilmegi meýilleşdirilýän medeni-durmuş we önümçilik maksatly desgalardaky gurluşyk işleriniň ýagdaýy barada hasabat berdi.

Hormatly Prezidentimiz hasabaty diňläp, daýhan yhlasy bilen ýetişdirilen pagta hasylyny soňky hanasyna çenli ýitgisiz ýygnap almagy, bugdaý ekişini agrotehniki möhletlerde, ýokary hilli geçirmegi, ekiş geçirilen ýerlerde ideg etmek işlerini gözegçilikde saklamagy tabşyrdy. Mundan başga-da, döwlet Baştutanymyz şu ýyl welaýatda açylyp ulanmaga berilmegi meýilleşdirilýän desgalardaky gurluşyk işleriniň ýokary hilli ýerine ýetirilmegini üpjün etmegi tabşyrdy.

Mary welaýatynyň häkimi B.Orazgylyjow welaýatda möwsümleýin oba hojalyk işleriniň barşy barada hasabat berdi.

Bellenilişi ýaly, sebitde ýetişdirilen pagta hasylyny soňky hanasyna çenli ýygnap almak, ýygnalan hasyly bökdençsiz kabul etmek we talabalaýyk saklamak boýunça degişli işler dowam edýär. Möwsümde ulanylýan kombaýnlaryň, beýleki tehnikalaryň netijeli işledilmegine aýratyn üns berilýär. Sebitde bugdaý ekişi tamamlaýjy tapgyrda alnyp barlyp, ekiş geçirilen ýerlerde gögeriş, ösüş suwuny tutmak hem-de ideg etmek işleri berjaý edilýär. Ýetişdirilen gant şugundyrynyň hasylyny ýygnap almak babatda taýýarlyk işleri ýerine ýetirilýär. Häzirki wagtda welaýatyň ekerançylyk meýdanlarynda ýetişdirilen gök-bakja we beýleki azyklyk ekinleriň hasylyny ýygnap almak, olary ilata ýetirmek boýunça zerur çäreler görülýär. Mundan başga-da, häkim Oba milli maksatnamasyna laýyklykda, welaýatda şu ýyl açylyp ulanmaga berilmegi meýilleşdirilen medeni-durmuş, önümçilik maksatly desgalardaky gurluşyk işleriniň barşy barada hasabat berdi.

Döwlet Baştutanymyz hasabaty diňläp, welaýatda ýetişdirilen pagta hasylyny soňky hanasyna çenli ýitgisiz ýygnap almagyň zerur talap bolup durýandygyny belledi we bu ugurdaky işleriň depginini güýçlendirmegi, olary berk gözegçilikde saklamagy, bugdaý ekişini öz wagtynda tamamlamak, ekiş geçirilen meýdanlarda ideg işlerini agrotehnikanyň kadalaryna laýyklykda geçirmek üçin zerur çäreleri görmegi tabşyrdy. Hormatly Prezidentimiz şu ýyl welaýatda açylyp ulanmaga berilmegi göz öňünde tutulýan desgalardaky gurluşyk işleriniň ýokary hilli ýerine ýetirilmegini gözegçilikde saklamagy tabşyrdy.

Soňra Ministrler Kabinetiniň Başlygynyň orunbasary T.Atahallyýew ýurdumyzda möwsümleýin oba hojalyk işleriniň barşy barada hasabat berdi.

Bellenilişi ýaly, şu günler welaýatlarda ýetişdirilen pagta hasylyny soňky hanasyna çenli ýitgisiz ýygnap almak boýunça degişli işler alnyp barylýar. Ýurdumyzyň bugdaý ekilen meýdanlarynda agrotehnikanyň kadalaryna laýyklykda ideg etmek, hususan-da, gögeriş, ösüş suwuny tutmak, mineral dökünler bilen iýmitlendirmek işleri dowam edýär. Welaýatlarda güýzlük ýeralmanyň, gök-bakja, beýleki azyklyk ekinleriň hasylyny ýygnap almak hem-de bu önümler bilen bazarlary üpjün etmek üçin zerur çäreler görülýär. Daşoguz hem-de Lebap welaýatlarynda ýetişdirilen şaly hasylyny ýygnap almak, Mary welaýatynda bolsa gant şugundyrynyň ýygymyna başlamaga taýýarlyk işleri alnyp barylýar.

Hormatly Prezidentimiz hasabaty diňläp, oba hojalyk pudagynyň milli ykdysadyýetimizdäki möhüm ornuna ünsi çekdi we wise-premýere ýurdumyz boýunça oba hojalyk ekinleriniň bol hasylyny ýetişdirmek boýunça alnyp barylýan işleri gözegçilikde saklamagy tabşyrdy. Döwlet Baştutanymyz häzirki wagtda dowam edýän möwsümleýin oba hojalyk işleriniň wajyp ähmiýetini belläp, pagta hasylyny soňky hanasyna çenli ýitgisiz ýygnap almak, bugdaý ekişini öz wagtynda tamamlamak, gögeriş alnan ýerlerde ideg etmek işlerini gözegçilikde saklamagy tabşyrdy.

Soňra hormatly Prezidentimiz iş maslahatyna gatnaşyjylara ýüzlenip, welaýatlarda ýetişdirilen pagta hasylyny iň soňky hanasyna çenli ýygnap almak işlerini berk gözegçilikde saklamagy, bugdaý ekilen meýdanlarda ideg işlerini talabalaýyk alyp barmagy, haşal otlara garşy göreş çärelerini wagtynda geçirmegi, gögeriş we birinji ösüş suwlaryny wagtynda tutup, kadaly gögeriş almak üçin ähli zerur çäreleri görmegi tabşyrdy. Döwlet Baştutanymyz içerki bazarlarymyzy üpjün etmek üçin welaýatlarda ýetişdirilen gök-bakja we beýleki oba hojalyk önümlerini talabalaýyk ýygnap almagyň, Daşoguz, Lebap welaýatlarynda şaly hasylyny ýitgisiz ýygnap almagyň, Mary welaýatynda gant şugundyrynyň ýygymyna başlamaga gowy taýýarlyk görmegiň zerurdygyny nygtady.

Arkadagly Gahryman Serdarymyz welaýatlarda bugdaý, pagta öndürijiler bilen hyzmat ediji edara-kärhanalaryň arasynda şu ýylyň hasyly üçin ýerine ýetirilen işler boýunça hasaplaşyklary wagtynda geçirmegi, şu ýyl welaýatlarda açylyp ulanmaga berilmegi meýilleşdirilen medeni-durmuş we önümçilik maksatly desgalarda gurluşyk işleriniň alnyp barlyşyna berk gözegçilik etmegi tabşyrdy.

Döwlet Baştutanymyz Serdar Berdimuhamedow sanly ulgam arkaly geçirilen iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Habaryň resmi çeşmesi: (“Türkmenistanyň Döwlet habarlar agentligi” web-saýty)

Şu gün ýurdumyzda hormatly Prezidentimiz Serdar Berdimuhamedowyň gatnaşmagynda ählihalk bag ekmek dabarasynyň güýzki möwsümine badalga berildi.

Täze taryhy eýýamda Gahryman Arkadagymyzyň Diýarymyzy bagy-bossanlyga öwürmäge gönükdirilen başlangyçlary hormatly Prezidentimiziň baştutanlygynda üstünlikli durmuşa geçirilýär. Tutuş halk bag ekmek dabarasy umumymilli çäreleriň iň möhümleriniň biri bolup, ýurdumyzyň ekologik abadançylygy üpjün etmäge ygrarlydygyny alamatlandyrýar. Arkadagly Gahryman Serdarymyzyň baştutanlygynda ýurdumyzda alnyp barylýan ekologiýa strategiýasy diňe bir milli bähbitleri öz içine alman, eýsem, tutuş adamzadyň abadançylygyna gönükdirilen ählumumy meseleler bilen hem berk baglanyşyklydyr. Häzirki wagtda döwletimiz tarapyndan ekologiýa diplomatiýasyny ösdürmek, tebigy baýlyklary aýawly saklamak we «ýaşyl» ykdysadyýete geçmek ugrunda wajyp ädimler ädilýär.

Ählihalk bag ekmek dabarasy diňe bir ekologiýa çäresi bolman, jemgyýetde jebisligi pugtalandyrmaga ýardam berýän möhüm medeni-durmuş wakasydyr. Ol ýaş nesilde tebigata aýawly garamak, daşky gurşaw bilen sazlaşykly ýaşamak medeniýetini kemala getirýär. Ýurdumyzda asylly däbe öwrülen bag nahallaryny oturtmak çäreleri giň möçberli özgertmeleri durmuşa geçirmäge gönükdirilen döwlet syýasatynyň aýratyn ugry bolup, täze seýilgähleri, tokaý zolaklaryny döretmäge, türkmen topragynyň ösümlik dünýäsini baýlaşdyrmaga ýardam berýär. Netijede, paýtagtymyzyň we beýleki şäherleriň daş-töwerekleri tokaý zolaklary bilen gurşalýar.

...Şu gezekki dabara gatnaşyjylaryň hatarynda Mejlisiň Başlygy, Ministrler Kabinetiniň Başlygynyň orunbasarlary, harby we hukuk goraýjy edaralaryň, ministrlikleriň, pudaklaýyn dolandyryş edaralarynyň, syýasy partiýalaryň, jemgyýetçilik guramalarynyň, diplomatik wekilhanalaryň we halkara guramalaryň ýolbaşçylary hem-de wekilleri, halk köpçüligi bar.

Hormatly Prezidentimiziň awtoulagy ählihalk bag ekmek dabarasynyň geçirilýän ýerine — paýtagtymyzdaky Döwlet münberiniň günorta-günbatar tarapyna geldi. Dabara gatnaşyjylar döwlet Baştutanymyzy mähirli mübäreklediler. Ýurdumyzyň sungat ussatlarynyň çykyşlary çärä aýratyn öwüşgin çaýdy.

Hormatly Prezidentimiz dabara gatnaşyjylary mähirli mübärekläp, bag ekmek üçin ýörite taýýarlanylan ýere bardy. Bu ýerde ýaş nesliň wekili Arkadagly Gahryman Serdarymyzdan bag ekmek dabarasyna badalga bermegi haýyş etdi. Soňra hormatly Prezidentimiz bag nahalyny oturdyp, güýzki ählihalk bag ekmek dabarasyna badalga berdi.

Döwlet Baştutanymyzyň tutuş ýurdumyz boýunça ýaýbaňlandyrylan bu asylly çärä gatnaşmagy onuň ähmiýetini has-da artdyrdy. Munuň özi paýhasly pederlerimiziň asyrlaryň dowamynda kemala getiren milli dessurlarynyň häzirki zamanyň ruhuna laýyk derejede ösdürilýändigini alamatlandyrýar.

Dabara gatnaşyjylaryň ählisi Arkadagly Gahryman Serdarymyzyň göreldesine eýerip, bag nahallaryny oturtmaga girişdiler. Dürli görnüşli nahallaryň bu künjegiň toprak-howa şertleri nazara alnyp ekilmegi dag etegindäki giňişliklerde tokaý zolaklaryny döretmäge mümkinçilik berer.

Giň möçberli bag ekmek çäreleri ekologiýa medeniýetini has-da kämilleşdirmäge, jemgyýetimizde agzybirlik we ruhubelentlik ýörelgelerini pugtalandyrmaga itergi berýär. Her bir ekilen nahal, döredilýän täze tokaý zolaklary geljek nesiller üçin arassa hem-de sagdyn daşky gurşawy üpjün etmegiň, eziz Watanymyzyň gözel tebigatyny gül açýan bossanlyga öwürmegiň aýdyň beýanydyr. Milli tokaý maksatnamasynyň üstünlikli amala aşyrylmagy ýurdumyzda biologik köpdürlüligi gorap saklamaga, ösümlik we haýwanat dünýäsini baýlaşdyrmaga şert döredýär. Ylmy çemeleşmeler esasynda alnyp barylýan bu işler tokaý zolaklarynyň howanyň üýtgemegine garşy durnuklylygyny artdyryp, sebitde amatly howa gurşawyny üpjün edýär.

Halkara guramalar, şol sanda BMG-niň degişli düzümleri bilen ýola goýlan hyzmatdaşlyk ekologiýa ulgamyndaky öňdebaryjy tejribäni öwrenmäge, önümçilige innowasion tehnologiýalary ornaşdyrmaga giň mümkinçilikleri açýar. Bu bolsa ýurdumyzda alnyp barylýan işleriň dünýä ülňülerine doly laýyk gelýändigini görkezýär. Birleşen Milletler Guramasynyň daşky gurşaw boýunça konwensiýalarynyň onlarçasyna goşulan Türkmenistanyň ýokary derejeli forumlarda öňe sürýän başlangyçlary halkara bileleşik tarapyndan giň goldawa eýe bolýar. Şolaryň hatarynda Aşgabatda BMG-niň Merkezi Aziýada howanyň üýtgemegi bilen bagly tehnologiýalar boýunça sebit merkezini döretmek, BMG-niň Suw strategiýasyny, BMG-niň Aral deňziniň sebiti üçin Ýörite maksatnamasyny işläp taýýarlamak, Aral meselesini BMG-niň işiniň aýratyn ugry hökmünde kesgitlemek, Hazar deňziniň ekologik abadançylygyny gorap saklamak boýunça başlangyçlar bar.

...Çäräniň dowamynda hormatly Prezidentimiz Ministrler Kabinetiniň Başlygynyň käbir orunbasarlarynyň alyp barýan işleri bilen gyzyklandy.

Ministrler Kabinetiniň Başlygynyň oba hojalyk toplumyna gözegçilik edýän orunbasary T.Atahallyýew Arkadagly Gahryman Serdarymyza tutuş ýurdumyz boýunça geçirilýän ählihalk bag ekmek dabarasynyň barşy hem-de Milli tokaý maksatnamasynyň çäklerinde ýerine ýetirilýän işler barada hasabat berdi.

Döwlet Baştutanymyz Türkmenistanyň döwlet syýasatynda ekologiýa ugruna möhüm ähmiýet berilýändigini belläp, ýurdumyzy bagy-bossanlyga öwürmek boýunça işleri hemişe gözegçilikde saklamagy tabşyrdy.

Soňra Ministrler Kabinetiniň Başlygynyň paýtagtymyza gözegçilik edýän orunbasary B.Annamämmedow baş şäherimizi abadanlaşdyrmak we bagy-bossanlyga öwürmek boýunça alnyp barylýan işler barada hasabat berdi.

Hormatly Prezidentimiz sebitiň ekologik taýdan iň arassa şäherleriniň biri bolan Aşgabat üçin bag ekmek çäreleriniň uly ähmiýete eýedigini aýdyp, paýtagtymyzy mundan beýläk-de ösdürmek, durmuş infrastrukturasyny döwrebaplaşdyrmak boýunça işleri hemişe gözegçilikde saklamagy tabşyrdy.

Aşgabat şäheriniň, Watanymyzyň beýleki künjekleriniň ýaşyl zolaklar bilen gurşalmagy ýaşaýyş üçin amatly şertleri döredýär. Paýtagtymyzyň halkara derejedäki abraýly baýraklara we güwänamalara mynasyp bolmagy ýurdumyzda tebigaty goramak babatda amala aşyrylýan işleriň dünýä jemgyýetçiligi tarapyndan giňden goldanylýandygynyň aýdyň güwäsidir. Diňe bir durmuş-ykdysady ulgamlarda däl, eýsem, daşky gurşawy goramak ugrunda-da innowasion çemeleşmeleri synag etmek üçin geljegi uly meýdança hökmünde Arkadag şäherini mysal getirmek bolar. Mälim bolşy ýaly, bu şäherdäki tapgyrlaýyn işler Gahryman Arkadagymyzyň başlangyjy hem-de hormatly Prezidentimiziň tagallalary bilen durmuşa geçirilýär. Sebitde özboluşlylygy bilen tapawutlanýan «akylly» şäher rahat ýaşamak, zähmet çekmek üçin döwrebap amatlyklary özünde jemläp, ekologik ölçeglere doly laýyk gelýär, daşky gurşaw bilen sazlaşykly utgaşýar.

Arkadag şäheriniň mysalynda bolşy ýaly, ýurdumyzyň şähergurluşyk syýasatynda hem «ýaşyl» standartlar, ekologik howpsuzlyk baş ýörelge hökmünde kesgitlenilýär. Ýokary tehnologiýaly «akylly» şäher konsepsiýasy tebigat bilen tehnologiýanyň sazlaşykly utgaşmagyny üpjün edip, geljekki gurluşyklar üçin nusgalyk bolup durýar. Şäherleriň we beýleki ilatly ýerleriň töwereginde saýaly baglaryň ýetişdirilmegi daşky gurşawyň arassalygyny, howanyň hapalanmagynyň öňüniň alynmagyny üpjün edýär. Sähra giňişliklerinde bag nahallarynyň oturdylmagy ilatly ýerleri epgekden, tozanly ýellerden goraýar. Şeýle-de gür baglaryň sil suwlarynyň täsirini peseltmekde, umuman, amatly howa gurşawyny emele getirmekde ähmiýetlidigini bellemek gerek.

Soňra Ministrler Kabinetiniň Başlygynyň orunbasary, daşary işler ministri R.Meredow hormatly Prezidentimizi şu gezekki ählihalk bag ekmek dabarasynyň üstünlikli geçmegi bilen gutlady.

Türkmenistanyň Milli tokaý maksatnamasy tokaý hojalygy, daşky gurşawy goramak, howanyň üýtgemegine uýgunlaşmak ulgamynda döwlet syýasatyny kesgitleýän esasy resminama bolup durýar. Ol tokaýlary durnukly dolandyrmaga, olary gorap saklamaga, ekologiýa we ykdysady mümkinçilikleri ýokarlandyrmaga gönükdirilendir. Maksatnamanyň çäklerinde tebigy tokaýlary gorap saklamak, emeli tokaý zolaklaryny döretmek, ekoulgamlaryň we tokaýlaryň howanyň üýtgemegine garşy durnuklylygyny artdyrmak boýunça çäreler durmuşa geçirilýär. Şeýle hem bu resminama ýurdumyzyň dürli sebitleriniň toprak-howa şertlerini, tebigy ekoulgamynyň aýratynlyklaryny nazara almak bilen, birnäçe beýleki anyk çäreleri göz öňünde tutýar. Milli tokaý maksatnamasy Türkmenistanyň howanyň üýtgemegi barada Milli strategiýasyndaky wezipeler bilen berk baglanyşykly bolup, ekologiýa meselelerini toplumlaýyn çözmäge gönükdirilendir.

Suw serişdelerini rejeli peýdalanmak, önümçilige we oba hojalygyna suw tygşytlaýjy döwrebap tehnologiýalary ornaşdyrmak döwlet syýasatynyň ileri tutulýan ugurlarynyň biridir. Bu çäreler ýurdumyzyň toprak-howa şertlerinde tebigy deňagramlylygy üpjün etmäge, suw baýlyklaryny geljek nesiller üçin aýawly saklamaga ýardam berýär. Diýarymyzda alnyp barylýan giň möçberli ekologiýa çäreleri diňe bir tebigaty goramak bilen çäklenmän, eýsem, ykdysadyýetiň durnukly ösüşini üpjün etmäge, ilatyň ýaşaýyş-durmuş derejesini ýokarlandyrmaga hem-de ekoulgamlaryň uzak möhletleýin durnuklylygyny kepillendirmäge kuwwatly esas bolup hyzmat edýär.

Ministrler Kabinetiniň Başlygynyň orunbasarlary hormatly Prezidentimizi şu gezekki ekologiýa çäresiniň üstünlikli geçmegi, şeýle hem Hasyl toýy bilen dabara gatnaşyjylaryň adyndan tüýs ýürekden gutlap, döwlet Baştutanymyza berk jan saglyk, uzak ömür, il-ýurt bähbitli işleriniň hemişe rowaçlyklara beslenmegini arzuw etdiler.

Mälim bolşy ýaly, ýurdumyzda her ýylyň noýabr aýynyň ikinji ýekşenbesinde türkmen topragynyň berekedini we sahawatyny, türkmen daýhanynyň yhlasly zähmetini alamatlandyrýan Hasyl toýy giňden bellenilýär. Bu iki dabaranyň gabat gelmegi halkymyzda aýdylýan «Toýlar goşa-goşadan gelýär» diýen sözleriň aýdyň beýanyna öwrüldi.

Ählihalk bag ekmek dabarasyna gatnaşyjylaryň yhlasly zähmeti halkymyzyň asylly işlere bolan höwesini we jebisligini aňladýar. Ýurdumyzda tutuş halkymyz üçin bähbitli işlere hemmeleriň agzybirlikde gatnaşmagy asyrlar aşyp gelýän milli ýörelgeleriň häzirki döwürde üstünlikli dowam etdirilýändiginiň güwäsidir. Şu gün Diýarymyzda köpçülikleýin bag nahallaryny oturtmak bilen bir hatarda, ozal bar bolan tokaý zolaklaryna ideg etmek işleri hem geçirildi. Munuň özi seýilgähleriň arassalygyny, abadançylygyny, baglaryň ösüşini üpjün etmekde wajyp ähmiýete eýedir.

Bag ekmek dabarasy tamamlanandan soňra, hormatly Prezidentimiz Serdar Berdimuhamedow çärä gatnaşyjylar bilen mähirli hoşlaşyp, bu ýerden ugrady.

Tutuş ýurdumyz boýunça geçirilen ählihalk bag ekmek dabarasynyň dowamynda 537 müň 900 düýp bag nahaly ekildi. Şeýle hem seýilgähleri we tokaý zolaklaryny arassalamak, abadanlaşdyrmak işleri bilen birlikde, jemi 1 million 947 müň 396 düýp baga ideg etmek işleri geçirildi.

Şeýlelikde, bu giň möçberli çäre ýurdumyzyň ekologik abadançylygy üpjün etmek, daşky gurşawy goramak, Durnukly ösüş maksatlaryna ýetmek boýunça ählumumy tagallalara goşýan mynasyp goşandynyň aýdyň güwäsi boldy.

Habaryň resmi çeşmesi: (“Türkmenistanyň Döwlet habarlar agentligi” web-saýty)

Şu gün ýurdumyzyň ähli künjeklerinde bolşy ýaly, Gahryman Arkadagymyzyň yhlasyndan binýat bolan Arkadag şäherinde hem ählihalk bag ekmek dabarasynyň güýzki möwsümine badalga berildi. «Garaşsyz, baky Bitarap Türkmenistan — bedew batly at-myradyň mekany» ýylynyň taryhy ähmiýetli wakalarynyň üstüni ýetiren umumymilli çäre halal zähmetiň joşguny we belent ruha beslenen aýdym-sazly dabaralar bilen utgaşyklylykda dowam etdi.

Häzirki döwürde Diýarymyzyň çar künjeginde, ýol ýakalarynda, derýalaryň, iri göwrümli suw akabalarynyň, kölleriň kenarlarynda köpçülikleýin bag nahallary oturdylýar. Asylly işler ýurdumyzyň oba-şäherleriniň çäklerinde ýokary ekologik derejäniň saklanmagyny üpjün edýär. Munuň özi Gahryman Arkadagymyzyň başyny başlan we Arkadagly Gahryman Serdarymyzyň baştutanlygynda üstünlikli alnyp barylýan döwlet syýasatynyň esasy ugurlarynyň biridir.

Ýurdumyzda ählihalk bag ekmek dabarasynyň ýazky hem-de güýzki möwsümleriniň geçirilmeginde çuňňur many bar. Munuň özi döwlet Baştutanymyzyň ekologiýa syýasatynyň rowaçlyklara beslenýändigini görkezýär. Şunda Köpetdagyň etegindäki ajaýyp künjekde gurlan Arkadag şäheriniň çäklerinde asylly çäräniň ýazky hem-de güýzki tapgyrlarynda müňlerçe düýp bag nahaly ekilýär. Munuň özi täze şäheriň çäklerinde ýakymly howa gurşawyny döretmek meselelerine döwlet derejesinde ähmiýet berilýändiginiň aýdyň beýanydyr.

...Ir bilen türkmen halkynyň Milli Lideri Arkadag şäheriniň çäklerinde ählihalk bag ekmek dabarasynyň geçirilýän ýerine geldi. Bu ýerde Gahryman Arkadagymyz mähirli garşylanyldy.

Täze şäheriň çäklerinde baýramçylyga mahsus ýagdaý emele geldi. Sogap işe gatnaşýan adamlaryň ruhubelentligi, medeniýet we sungat ussatlarynyň joşgunly çykyşlary bilen utgaşyp, ählihalk bag ekmek dabarasynyň ähmiýetini belende göterdi. Joşgunly aýdym-sazlar dabara özboluşly baýramçylyk öwüşginini çaýdy.

Türkmenistanyň Halk Maslahatynyň Başlygy ýörite taýýarlanan ýere geçip, bag ekiljek meýdany synlady. Dabara gatnaşýanlaryň ruhubelentligi we taýýarlanan bag nahallarynyň hatary bu künjege özboluşly bezeg berýär. Arkadag şäheriniň ählihalk bag ekmek dabarasynyň güýzki möwsümine badalga berilýän ýeriniň abadanlaşdyryş hem-de bezeg işlerinde “Garaşsyz, baky Bitarap Türkmenistan — bedew batly at-myradyň mekany” ýylyna mahsus görnüşler öz beýanyny tapýar.

Dabara gatnaşýan körpe nesliň wekili joşgunly goşgy setirleriniň üsti bilen Gahryman Arkadagymyzdan köpçülikleýin bag nahallaryny ekmek çäresine badalga bermegini haýyş etdi. Milli Liderimiz oglanjyga toý sowgadyny gowşurdy. Sowgady uly hoşallyk bilen kabul eden oglanjyk hormatly Arkadagymyzdan özi bilen ýadygärlik surata düşmegini haýyş etdi.

Türkmenistanyň Halk Maslahatynyň Başlygy berkarar döwletiň bagtyýar nesli bilen gürrüňdeş bolup, onuň okuwy, höwes edýän hünäri bilen gyzyklandy. Oglanjyk Gahryman Arkadagymyza tüýs ýürekden hoşallyk bildirip, okaýan mekdebi we sapaklaryna ýetişigi barada uly joşgun bilen gürrüň berdi.

Milli Liderimiz bu ýerde ilkinji bag nahalyny oturdyp, Arkadag şäherinde ýaýbaňlandyrylan ählihalk bag ekmek dabarasyna badalga berdi. Munuň özi asylly işleriň halkymyzyň dünýä nusgalyk ýagşy dessurlary bilen utgaşýandygynyň güwäsidir.

Arkadag şäheriniň çäginde geçirilýän ählihalk bag ekmek dabarasyna gatnaşyjylar türkmen halkynyň Milli Lideriniň göreldesine eýerip, uly joşgun bilen köpçülikleýin bag nahallaryny ekdiler. Bu çärä şäheriň ähli ýaşaýjylarynyň, edara-kärhanalaryň işgärleriniň, şol sanda “Arkadag” futbol toparynyň futbolçylarynyň uly höwes bilen gatnaşandyklaryny bellemek gerek.

Soňra Gahryman Arkadagymyz dabara gatnaşyjylary Hasyl toýy bilen gutlady hem-de bag ekmek çäresiniň hem bu baýramyň dabaralary bilen utgaşýandygyny aýtdy.

Ählihalk bag ekmek dabarasynyň ýurdumyzda giňden bellenilýän we daýhan zähmetine goýulýan sarpany alamatlandyrýan Hasyl toýunyň öňüsyrasynda geçirilmeginde çuňňur many bar. Munuň özi sahawatly türkmen topragynyň berekedine goýulýan sarpanyň aýdyň nyşany bolmak bilen, bag ekmek çäresiniň haýyr işlere utgaşýandygynyň nobatdaky beýanydyr.

Medeniýet we sungat ussatlarynyň hoş owazly aýdym-sazlary dabara gatnaşyjylaryň ruhuny göterip, päk zähmetiň waspyny ýetirdi. Ahalteke bedewleriniň gadymy mekanynda ýaýbaňlandyrylan dabaralarda halkymyzyň agzybirligi, asylly işlere bolan yhlasy, ýurdumyzyň abadançylygy öz beýanyny tapdy. Asyrlaryň dowamynda bagşy-sazandalar türkmen toýlarynyň bezegine öwrülipdir. Bu ýörelgeleriň häzirki döwrüň ruhuna kybap derejede ösdürilmegi bolsa halkymyzyň ýagşy dessurlarynyň dowamata atarylýandygyny görkezýär.

Gahryman Arkadagymyz bu ýerde Arkadag şäheriniň häkimi G.Mämmedowa bilen gürrüňdeş boldy. Häkim, ilkinji nobatda, Niderlandlar Patyşalygynda saparda bolup, dürli görnüşli baglary we köpöwüşginli gülleri ösdürip ýetişdirmegiň häzirki zaman tejribesi bilen tanyşmak babatda döredilen mümkinçilik üçin Milli Liderimize we Arkadagly Gahryman Serdarymyza hoşallyk bildirdi. Şeýle hem ol Niderlandlar Patyşalygyndan dürli gülleriň tohumlarynyň getirilendigi barada maglumat berdi.

Halk Maslahatynyň Başlygy oňa dünýäde baglary we dürli gülleri ösdürip ýetişdirmek boýunça öňdebaryjy ýurtlaryň birinde saparda bolup, toplan tejribelerini iş ýüzünde durmuşa geçirmek, häzirki zamanyň ösen tejribesini Aşgabat şäherinde hem giňden ulanmak babatda öz maslahatlaryny berdi. Şunuň bilen baglylykda, täze şäheriň çäklerinde gök zolaklaryň çägini giňeltmek, dürli şekilleri emele getirýän owadan gülleri köpçülikleýin ekmek we bu işleri paýtagtymyzyň jemagat hojalygy gulluklary bilen sazlaşykly alyp barmak babatda maslahatlaryny berip, Gahryman Arkadagymyz şäherleriň çäginde ýokary ekologik derejäniň üpjün edilmegini şertlendirýän işleriň ylmy esasda alnyp barylmalydygyna ünsi çekdi.

Soňra Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow şäheriň gurluşygynyň ikinji tapgyrynda alnyp barylýan işler, aýratyn-da, Arkadag şäheriniň lukmançylyk klasteriniň önümçilik binalarynyň gurluşyklaryny çaltlandyrmak ugrunda edilýän tagallalar barada giňişleýin maglumat berdi.

Gahryman Arkadagymyz täze şäheriň gurluşygynyň ikinji tapgyrynda alnyp barylýan işleriň hil derejesiniň üpjün edilmegi, binalaryň gurluşyklarynyň bellenen möhletlerde tamamlanmagy bilen baglanyşykly meseleleriň yzygiderli gözegçilikde saklanmalydygyny belledi.

Milli Liderimiz şäheriň çäklerinde gurulýan önümçilik toplumlarynyň enjamlaşdyrylyş derejesiniň ýokary ekologik talaplara laýyk gelmelidigini aýtdy. Şunda önümçilikde daşky gurşawa zyýan berýän galyndylaryň peseldilmegine häzirki zaman talaplaryna laýyk derejede we ylmy esasda çemeleşilmelidir. Bu wezipeleriň kada laýyk ýerine ýetirilmeginiň şäheriň çäklerinde ekilen baglaryň, dürli gülleriň sazlaşykly ösüşinde ähmiýetlidigini nygtap, hormatly Arkadagymyz bu işleriň yzygiderli gözegçilikde saklanmalydygyna ünsi çekdi. Şunda dünýäniň ösen tejribesiniň, häzirki zaman ylmynyň gazananlarynyň çuňňur özleşdirilmegi wajypdyr.

Bu ýerde guralan çäräniň dabarasyny belende göteren medeniýet we sungat ussatlarynyň ýakymly owazlarynda ýurdumyzda amala aşyrylýan beýik işler, halkymyzyň agzybirligi, halal zähmetiň joşguny öz beýanyny tapdy.

Dabara gatnaşan medeniýet we sungat işgärlerine Gahryman Arkadagymyzyň adyndan toý sowgatlarynyň gowşurylmagy asylly işleriň türkmen halkynyň durmuşyna mahsus bolan nusgalyk ýörelgeler bilen utgaşýandygynyň nobatdaky beýanyna öwrüldi. Munuň özi il içinde sogap iş hasaplanýan bag ekmek çäresiniň ýokary guramaçylyk derejesiniň üpjün edilendigini görkezýär.

Soňra türkmen halkynyň Milli Lideri bag ekmek çäresiniň belent dabaralara beslenmegini üpjün eden sungat ussatlaryna hem-de ählihalk bag ekmek dabarasyna gatnaşyp, asylly işleri bitirenlere uly zähmet üstünliklerini arzuw edip, bu ýerden ugrady.

Habaryň resmi çeşmesi: (“Türkmenistanyň Döwlet habarlar agentligi” web-saýty)

Şu gün Gazagystan Respublikasyna iş saparynyň ikinji gününde hormatly Prezidentimiz Serdar Berdimuhamedow emeli aň ulgamynda howpsuzlyk boýunça Akaba prosesiniň Merkezi Aziýa döwlet Baştutanlary derejesindäki duşuşygyna gatnaşdy.

...Ir bilen döwlet Baştutanymyz çäräniň geçirilýän ýerine — Garaşsyzlyk köşgüne bardy. Bu ýerde hormatly Prezidentimizi Gazagystan Respublikasynyň Prezidenti Kasym-Žomart Tokaýew we Iordaniýa Haşimit Patyşalygynyň Patyşasy Abdulla II mähirli garşyladylar hem-de bilelikde ýadygärlik surata düşdüler.

Ähli wekiliýet Baştutanlarynyň bilelikde resmi surata düşmek dabarasyndan soňra sammit öz işine başlady.

Bu ýokary derejeli duşuşyga Gazagystan Respublikasynyň Prezidenti, Iordaniýanyň Patyşasy, Täjigistan Respublikasynyň Prezidenti, Özbegistan Respublikasynyň Prezidenti, Azerbaýjan Respublikasynyň Milli mejlisiniň başlygy, Gyrgyz Respublikasynyň daşary işler ministri, halkara guramalaryň, şol sanda BMG-niň ýöriteleşdirilen edaralarynyň, Ýewropa Bileleşiginiň, GDA-nyň ugurdaş edaralarynyň, Şanhaý Hyzmatdaşlyk Guramasynyň wekilleri, emeli aň howpsuzlygy ulgamyndaky halkara bilermenler we beýlekiler gatnaşdylar.

Sammitiň gün tertibine emeli aň ulgamynda howpsuzlygy üpjün etmek, kiberhowplara garşy durmak hem-de bu ugurda Merkezi Aziýa we Ýakyn Gündogar ýurtlarynyň ugurdaş düzümleriniň hem-de maglumat tehnologiýalary ulgamynyň wekilleriniň tagallalaryny birleşdirmek bilen baglanyşykly meseleler girizildi.

Hormatly Prezidentimiz Serdar Berdimuhamedow sammitde çykyş etmek bilen, ýurdumyz tarapyndan öňe sürülýän başlangyçlary beýan etdi.

Hormatly Prezidentimiz: “Türkmenistan halkara ähmiýetli teklipleri öňe sürmek bilen, dünýäde uzak möhletli howpsuzlygy, ilkinji nobatda, öňüni alyş diplomatiýasyny işjeňleşdirmek, bitaraplyk ýörelgelerini iş ýüzünde ulanmak, şeýle hem parahatçylyk, ynanyşmak we syýasy dialog medeniýetini gaýtadan dikeltmek arkaly üpjün edip boljakdygyndan ugur aldy” diýip belledi.

Döwlet Baştutanymyz Türkmenistanyň Merkezi Aziýada we tutuş dünýäde berk howpsuzlygy we durnuklylygy üpjün etmek boýunça hyzmatdaşlyga üýtgewsiz ygrarlydygyny hem-de Akaba prosesiniň maksatlaryny hem-de wezipelerini durmuşa geçirmäge netijeli goşandyny goşmaga taýýardygyny tassyklady.

Şeýle hem sammitiň dowamynda sebit we halkara gün tertibiniň özara gyzyklanma bildirilýän möhüm meseleleri boýunça pikir alşyldy.

Gazagystan Respublikasyna iş saparynyň maksatnamasy tamamlanandan soňra, hormatly Prezidentimiz Serdar Berdimuhamedow Astana şäheriniň Nursultan Nazarbaýew adyndaky Halkara howa menziline bardy we bu ýerden Watanymyza ugrady.

Birnäçe sagatdan soňra, döwlet Baştutanymyzyň uçary paýtagtymyzyň Halkara howa menziline gelip gondy. Bu ýerde hormatly Prezidentimizi ýurdumyzyň resmi adamlary mähirli garşyladylar.

Şeýlelikde, döwlet Baştutanymyzyň Astanada geçirilen ýokary derejedäki duşuşyga gatnaşmagy ýurdumyzyň parahatçylygyň, durnuklylygyň we ählumumy howpsuzlygyň bähbidine köptaraplaýyn dialoga ygrarlydygyny nobatdaky gezek tassyklady. Hormatly Prezidentimiziň ählumumy kiberhowpsuzlygyň täze arhitekturasyny kemala getirmäge gönükdirilen netijeli başlangyçlary hem-de teklipleri bolsa sammite gatnaşyjylaryň ýokary bahasyna mynasyp boldy.

Habaryň resmi çeşmesi: (“Türkmenistanyň Döwlet habarlar agentligi” web-saýty)