TÜRKMENISTANYŇ MEJLISINIŇ KARARY

Türkmenistanyň Prezidenti

Serdar Gurbangulyýewiç Berdimuhamedowy

«Türkmenistanyň Bitaraplygynyň 30 ýyllygyna» atly

Türkmenistanyň ýubileý medaly we

ýadygärlik nyşanlar toplumy bilen sylaglamak hakynda

Türkmenistanyň çuňňur hormatlanylýan Prezidenti Serdar Berdimuhamedowyň parasatly baştutanlygynda Halkara parahatçylyk we ynanyşmak ýylynda Garaşsyz, hemişelik Bitarap ýurdumyzyň hoşniýetli goňşuçylyga, deňhukuklylyga, dünýäniň ähli döwletleri, abraýly halkara guramalary bilen özara bähbitli hyzmatdaşlyga esaslanýan Bitaraplyk syýasaty rowaçlyklara beslenýär. Türkmenistanyň hemişelik Bitaraplyk hukuk ýagdaýy dünýä bileleşigi üçin halkara gatnaşyklarynyň ulgamynda ählumumy bähbitleri utgaşdyrmagyň serişdesine öwrüldi, ýurdumyzyň at-abraýyny we şan-şöhratyny beýgeldýän hem-de türkmen halkynyň buýsanç-mertebesini belende göterýän gymmatlyk hökmünde ykrar edildi. Ösüşiň we rowaçlygyň ýoly bilen ynamly öňe barýan hemişelik Bitarap Türkmenistanyň halkara abraýy barha artýar, onuň dünýä syýasatyndaky täsirli orny berkeýär. Türkmen döwletiniň daşary syýasatynyň ileri tutýan we wajyp başlangyçlary dünýä jemgyýetçiligi, ilkinji nobatda Birleşen Milletler Guramasy tarapyndan uly goldaw tapýar.

Türkmenistanyň Garaşsyzlygyny, özygtyýarlylygyny we  hemişelik Bitaraplyk hukuk ýagdaýyny berkitmekde, onuň halkara abraýyny hemişelik Bitaraplyk ýörelgelerine laýyklykda ýokarlandyrmakda, halkara gatnaşyklarynda «Açyk gapylar» syýasatyny, «Dialog ‒ parahatçylygyň kepili» taglymatyny baş ýörelge edinen ýurdumyzyň daşary syýasy ugruny, ata Watanymyzyň dünýä döwletleri we halkara guramalary bilen parahatçylykly, dostlukly         hem-de özara bähbitli gatnaşyklaryny ösdürmekde, türkmen Bitaraplygynyň syýasy, diplomatik, hukuk, ykdysady, durmuş-medeni, ynsanperwer babatdaky mümkinçiliklerini durmuşa geçirmekde, sebitde we dünýäde parahatçylygy, howpsuzlygy we durnukly ösüşi üpjün etmäge gönükdirilen halkara başlangyçlaryny öňe sürmekde we durmuşa geçirmekde, Türkmenistanyň parahatçylyk we ynanyşmak syýasatynyň hukuk esaslaryny, onuň kadalaryny, esasy maksatlaryny, öňüni alyş diplomatiýasyny, ýurdumyzyň içeri we daşary syýasatynyň ileri tutulýan ugurlaryny kanun arkaly berkitmekde goşan uly şahsy goşandyny, jemgyýetiň we döwletiň öňünde bitiren aýratyn hyzmatlaryny göz öňünde tutup, şeýle hem halk wekillerinden, zähmet toparlaryndan, iri jemgyýetçilik birleşiklerinden we ýurdumyzyň raýatlaryndan gelip gowşan köpsanly teklipleriň esasynda, Halkara parahatçylyk we ynanyşmak ýylynda Halkara Bitaraplyk güni, Türkmenistanyň    hemişelik Bitaraplygynyň 30 ýyllyk baýramy mynasybetli, Türkmenistanyň Konstitusiýasynyň 81-nji maddasyna laýyklykda, Türkmenistanyň Mejlisi karar edýär:

Türkmenistanyň Prezidenti Serdar Gurbangulyýewiç Berdimuhamedowy «Türkmenistanyň Bitaraplygynyň 30 ýyllygyna» atly Türkmenistanyň ýubileý medaly we ýadygärlik nyşanlar toplumy bilen sylaglamaly.

Türkmenistanyň

Mejlisiniň Başlygy                                           D.Gulmanowa

Aşgabat şäheri.

2025-nji ýylyň 6-njy dekabry.

№ 189-VII.