Ýusupguly Aşyrgulyýewiç Eşşäýew 1977-nji ýylyň 12-nji iýulynda Mary welaýatynyň Mary etrabynyň Akybaý geňeşliginde doguldy. Milleti türkmen. 

1984 — 1992-nji ýyllarda Mary etrabyndaky 4-nji orta mekdepde okady.

1992 — 1995-nji ýyllarda Türkiýäniň Anadolu mugallymçylyk mekdebinde okap, ony taryh mugallymy hünäri boýunça tamamlady.

1995 — 2000-nji ýyllarda Türkiýäniň Seljuk uniwersitetinde okap, ony hukukçy hünäri boýunça tamamlady. 2000 — 2003-nji ýyllarda Türkiýäniň Seljuk uniwersitetiniň Sosial bilimler institutynda magistraturada okady.

2004-2005-nji ýyllarda Wekilbazar etrap kazyýetiniň kazyýet ýerine ýetirijisi, 2005 — 2007-nji ýyllarda Mary welaýat döwlet arhiwinde elektrik-kompýuterçi, birinji derejeli arhiwçi, Wekilbazar etrap kazyýetiniň kazyýet ýerine ýetirijisi, 2007 — 2011-nji ýyllarda Mary welaýatynyň ozalky Oguzhan etrap kazyýetiniň edara ediş we ýerine ýetirijilik iş ýörediş kazysy, 2011 — 2014-nji ýyllarda «Türkmenbaşy» döwlet täjirçilik bankynyň Mary welaýat dolandyryş edarasynyň Baýramaly şahamçasynyň esasy hukukçysy, Türkmenistanyň Goranmak ministrliginiň Mary jaý-ulanyş bölüminiň ýaşaýyş jaý toparynyň başlygy, 2014 — 2017-nji ýyllarda Mary welaýat kazyýetiniň döwlet hasabaty boýunça maslahatçysy wezipelerinde işledi. 

2017-nji ýylyň fewralyndan 2018-nji ýylyň martyna çenli Türkmenistanyň Mejlisiniň Durmuş syýasaty baradaky komitetiniň agzasy bolup işledi. 

2018-nji ýylyň mart aýyndan bäri Türkmenistanyň Mejlisiniň Adam hukuklaryny we azatlyklaryny goramak baradaky komitetiniň başlygy wezipesinde işleýär. 

Türkmenistanyň Mejlisiniň V, VI we VII çagyrylyşlarynyň deputaty. 

2020-nji ýylda «Türkmenistanyň Bitaraplygynyň 25 ýyllygyna», 2021-nji ýylda «Türkmenistanyň Garaşsyzlygynyň 30 ýyllygyna» atly Türkmenistanyň ýubileý medallary bilen sylaglanyldy. 

Maşgalaly, üç çagasy bar.

Türkmenistanyň Demokratik partiýasy tarapyndan dalaşgärlige hödürlenildi.