2025-nji ýylyň 22-nji maýynda Türkmenistanyň Mejlisiniň Başlygynyň ýolbaşçylygyndaky wekiliýeti Hytaý Halk Respublikasyna iş saparynyň çäklerinde Pekin şäherindäki Sun Sinlin adyndaky Ýaşlar, ylym we tehnologiýa alyş-çalyş merkezinde boldular.

Merkezde Sun Sinlin adyndaky gaznanyň çagalaryň saglygyny berkitmek babatda alyp barýan işleri bilen tanşyldy.

Şu ýylyň mart aýynda Hytaý Halk Respublikasynyň Sun Sinlin adyndaky gaznasynyň başlygynyň orunbasary hanym Şen Beili Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 4 ýyllygy mynasybetli Arkadag şäherinde geçirilen «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahata gatnaşdy.

Sun Sinlin adyndaky gaznanyň işi bilen tanyşlygyň dowamynda hytaý tarapy Türkmenistandaky Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan işlerine ýokary baha berdiler we geljekde ikitaraplaýyn hyzmatdaşlygyň mümkinçiliklerini aýratyn nygtadylar.

Şeýle hem dürli ugurlarda ýola goýulýan we uzak geljegi nazarlaýan türkmen-hytaý gatnaşyklarynyň parlamentler derejesinde goldanylmagy dostlukly gatnaşyklaryň yzygiderli kämilleşmegine oňyn täsir edýändigi barada bellenildi.

Şu gün hormatly Prezidentimiz Serdar Berdimuhamedow Ministrler Kabinetiniň Başlygynyň orunbasary T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Onda ýurdumyzyň oba hojalyk toplumynda we sebitlerde alnyp barylýan işler bilen baglanyşykly meselelere garaldy.

Ilki bilen, Ahal welaýatynyň häkimi T.Nurmyradowa söz berildi. Ol welaýatdaky möwsümleýin oba hojalyk işleri barada hasabat berdi.

Bellenilişi ýaly, häzirki wagtda galla oragy möwsümine taýýarlyk görmek maksady bilen zerur guramaçylyk çäreleri geçirildi. Tohumlyk ekilen bugdaýyň hasylyny talabalaýyk ýygnap almak üçin taýýarlyk işleri alnyp barylýar. Welaýatyň gowaça ekilen meýdanlarynda hatarara bejergi, ýekelemek, otag etmek işleri geçirilýär. Bu agrotehniki çärelerde oba hojalyk tehnikalary doly güýjünde işledilýär. Şunuň bilen birlikde, pile möwsüminiň çäklerinde taýýarlanylan piläni kabul ediş nokatlaryna tabşyrmak işleri dowam edýär. Welaýatyň ýazlyk ýeralma, gök-bakja ekilen meýdanlarynda agrotehnikanyň kadalaryna laýyklykda ideg etmek, ýetişdirilen hasyly ýygnap almak işleri ýerine ýetirilýär. Şeýle hem häkim 25-nji maýda welaýatda “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Hormatly Prezidentimiz hasabaty diňläp, möwsümleýin işleriň agrotehnikanyň kadalaryna laýyklykda geçirilmeginiň, şunda oba hojalyk tehnikalaryndan netijeli peýdalanmagyň zerur talap bolup durýandygyny belledi hem-de bu babatda birnäçe tabşyryklary berdi.

Soňra Balkan welaýatynyň häkimi H.Aşyrmyradowa söz berildi. Häkim, ilki bilen, Eýran Yslam Respublikasynyň Gülüstan welaýaty bilen Balkan welaýatynyň arasynda söwda-ykdysady, ylmy-tehniki we medeni hyzmatdaşlyk hakynda Ähtnamanyň çäklerinde hyzmatdaşlygy pugtalandyrmak bilen bagly meseleleri ara alyp maslahatlaşmak üçin 14 — 16-njy maý aralygynda Eýran Yslam Respublikasynyň Gülüstan welaýatyna iş saparyny amala aşyrmaga döredilen mümkinçilik üçin hormatly Prezidentimize hem-de Gahryman Arkadagymyza tüýs ýürekden hoşallyk bildirdi.

Soňra häkim Balkan welaýatynda dowam edýän möwsümleýin oba hojalyk işleri barada hasabat berdi.

Bellenilişi ýaly, häzirki wagtda tohumlyk bugdaýyň hasylyny bildirilýän talaplara laýyklykda ýygnap almak, saklamak maksady bilen degişli taýýarlyk işleri alnyp barylýar. Gowaça ekilen meýdanlarda hatarara bejergi, ýekelemek, otag etmek işleri ýerine ýetirilýär. Welaýatda piläni kabul ediş kärhanalaryna tabşyrmak işleri dowam edýär. Ýurdumyzda ýeralma, gök-bakja önümleriniň öndürilýän möçberini artdyrmak barada öňde goýlan wezipelerden ugur alnyp, häzirki wagtda sebitde bu ekinlere ideg etmek, ýetişdirilen hasyly ýygnap almak işleri ýerine ýetirilýär. Mundan başga-da, häkim welaýatyň orta mekdeplerinde “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Hormatly Prezidentimiz hasabaty diňläp, oba hojalyk önümçiliginiň ähli tapgyrlarynda agrotehnikanyň kadalarynyň berk berjaý edilmeginiň ekinlerden bol we ýokary hilli hasyl almagyň, oba hojalygyny netijeli ýöretmegiň esasy şertleriniň biri bolup durýandygyna ünsi çekdi we häkime degişli tabşyryklary berdi.

Daşoguz welaýatynyň häkimi D.Babaýew sebitdäki möwsümleýin oba hojalyk işleri barada hasabat berdi.

Bellenilişi ýaly, welaýatda galla oragyny guramaçylykly geçirmek maksady bilen, häzirki wagtda galla kabul ediş kärhanalaryny, däne ýygýan kombaýnlary, beýleki tehnikalary möwsüme taýýarlamak işleri dowam edýär. Gowaça ekilen meýdanlarda hatarara bejergi, otag etmek, ýekelemek işleri geçirilýär. Şunda oba hojalyk tehnikalaryndan netijeli peýdalanylýar. Welaýatda şaly ekişi dowam edip, bu möwsümi bellenen möhletde geçirmek üçin zerur çäreler görülýär. Şu günler ýüpekçi kärendeçiler tarapyndan ýüpek gurçugyna ideg etmek işleri dowam edýär. Ýazlyk ýeralma, gök-bakja ekilen meýdanlarda agrotehnikanyň kadalaryna laýyklykda ideg etmek, suw tutmak işleri ýerine ýetirilýär. Şeýle hem häkim 25-nji maýda welaýatda “Soňky jaň” dabarasyny ýokary derejede geçirmek babatda görülýän taýýarlyk işleri barada hasabat berdi.

Hormatly Prezidentimiz hasabaty diňläp, gowaça ideg işleriniň talabalaýyk geçirilmegini, bugdaý oragy möwsümine ykjam taýýarlyk görülmegini ileri tutulýan wezipeleriň hatarynda kesgitledi hem-de bu babatda birnäçe anyk tabşyryklary berdi.

Lebap welaýatynyň häkimi M.Annanepesow welaýatda dowam edýän möwsümleýin oba hojalyk işleri barada hasabat berdi.

Bellenilişi ýaly, şu günler sebitde galla oragy möwsümine taýýarlyk işleri tamamlaýjy tapgyrda alnyp barylýar. Gowaça ekilen meýdanlarda agrotehnikanyň kadalaryna laýyklykda ideg işleri geçirilýär. Gögeriş alnan meýdanlara hatarara bejergi, ýekelemek, otag etmek işleri ýerine ýetirilýär. Hormatly Prezidentimiziň ýurdumyzda azyk bolçulygyny has-da pugtalandyrmak barada öňde goýan wezipelerinden ugur alnyp, welaýatyň ýazlyk ýeralma, gök-bakja ekinleri ekilen meýdanlaryna ideg etmek işleri ýerine ýetirilýär. Şeýle-de häkim 2024-2025-nji okuw ýylynyň tamamlanmagy mynasybetli “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Hormatly Prezidentimiz hasabaty diňläp, möwsümleýin oba hojalyk işleriniň möhüm ähmiýetine ünsi çekdi we welaýatyň ekerançylyk meýdanlarynda ýaýbaňlandyrylan agrotehniki çäreleriň, hususan-da, gowaça ideg işleriniň ýokary hilli alnyp barylmagyny, galla oragyna talabalaýyk taýýarlyk görülmegini üpjün etmegi tabşyrdy.

Mary welaýatynyň häkimi B.Orazow welaýatda dowam edýän möwsümleýin oba hojalyk işleriniň barşy barada hasabat berdi.

Bellenilişi ýaly, sebitde galla oragy möwsümini guramaçylykly geçirmek boýunça taýýarlyk işleri alnyp barylýar. Bu işleriň çäklerinde galla kabul ediş kärhanalary, elewatorlar, däne ýygýan kombaýnlar, awtoulaglar we beýleki tehnikalar möwsüme taýýar edildi. Tohumlyk bugdaýyň hasylyny ýitgisiz ýygnap almak, talabalaýyk saklamak üçin taýýarlyk işleri geçirilýär. Gowaça ekilen meýdanlarda hatarara bejergi, otag etmek, ýekelemek işleri ýerine ýetirilýär. Şeýle-de welaýatda ýetişdirilen pile hasylyny ýygnap almak, döwlet harmanyna tabşyrmak işleri dowam edýär. Ýazlyk ýeralma, gök-bakja ekilen meýdanlara ideg etmek, ýetişdirilen hasyly ýygnap almak işleri alnyp barylýar. Mundan başga-da, häkim 25-nji maýda welaýatda “Soňky jaň” dabarasyny guramaçylykly geçirmek boýunça görülýän taýýarlyk işleri barada hasabat berdi.

Döwlet Baştutanymyz hasabaty diňläp, welaýatyň gowaça ekilen meýdanlarynda alnyp barylýan ideg işleriniň ýokary hilli we guramaçylykly geçirilmeginiň, şunda oba hojalyk tehnikalarynyň netijeli işledilmeginiň, bugdaý oragy möwsümine guramaçylykly girişilmeginiň möhümdigini belledi hem-de degişli tabşyryklary berdi.

Soňra Ministrler Kabinetiniň Başlygynyň orunbasary T.Atahallyýew ýurdumyzyň oba hojalygynda dowam edýän möwsümleýin işler barada hasabat berdi.

Bellenilişi ýaly, häzirki wagtda galla kabul ediş kärhanalary, elewatorlar, bugdaý daşamakda ulanyljak awtoulaglar galla oragy möwsümine taýýar edildi. Şunuň bilen birlikde, tohumlyk bugdaýyň hasylyny talabalaýyk ýygnap almak, saklamak boýunça degişli taýýarlyk işleri geçirilýär. Ýurdumyzyň gowaça ekilen meýdanlarynda hatarara bejergi, ýekelemek, otag etmek, mineral dökünler bilen iýmitlendirmek işleri utgaşykly alnyp barylýar. Bu ugurda oba hojalyk tehnikalary netijeli işledilýär. Şunuň bilen birlikde, Daşoguz welaýatynda şaly ekişi dowam edýär. Pile möwsüminiň çäklerinde ýetişdirilen pile hasylyny ýygnap almak hem-de döwlet harmanyna tabşyrmak boýunça işler dowam edýär. Diýarymyzda ýeralmanyň, gök-bakja, beýleki azyklyk ekinleriň bol hasylyny ösdürip ýetişdirmek maksady bilen, häzirki wagtda ekerançylyk meýdanlarynda bu ekinlere ideg etmek, ýetişdirilen hasyly ýygnap almak işleri alnyp barylýar.

Hormatly Prezidentimiz hasabaty diňläp, oba hojalyk pudagynda özgertmeleri üstünlikli durmuşa geçirmek, pudagy döwrüň talabyna laýyklykda ösdürmek boýunça öňde durýan wezipeleriň toplumlaýyn çemeleşmäni, täzeçil çözgütleri talap edýändigini belledi we wise-premýere möwsümleýin işleriň ýokary hilli, guramaçylykly alnyp barylmagyny yzygiderli gözegçilikde saklamagy tabşyrdy. Soňra döwlet Baştutanymyz iş maslahatyna gatnaşyjylara ýüzlenip, galla oragy möwsüminiň ýetip gelýändigine ünsi çekdi hem-de möwsüme gowy taýýarlyk görüp, ony guramaçylykly geçirmegiň möhümdigini belledi.

Hormatly Prezidentimiz welaýatlaryň gowaça meýdanlarynda hatarara bejergi, ýekelemek, otag etmek işleriniň agrotehniki talaplara laýyk alnyp barlyşyny berk gözegçilikde saklamagy, gowaça ideg etmekde oba hojalyk tehnikalaryny doly güýjünde işletmek üçin zerur çäreleri görmegi, welaýatlaryň bugdaý meýdanlarynda ýetişdirilen tohumlyk bugdaý hasylyny bildirilýän talaplara laýyk ýygnap almak, daşamak hem-de saklamak işlerine gowy taýýarlyk görmegi tabşyrdy. Şeýle-de döwlet Baştutanymyz Daşoguz welaýatynda şaly ekişini bellenen agrotehniki möhletlerde geçirmegiň, sebitlerde pile taýýarlamak boýunça netijeli işleri alyp barmagyň, pagta we bugdaý öndürijiler bilen hyzmat ediji edara-kärhanalaryň arasynda ýerine ýetirilen işler üçin hasaplaşyklaryň wagtynda geçirilmegini üpjün etmegiň zerur talap bolup durýandygyny belledi. Hormatly Prezidentimiz ýeralma we beýleki gök-bakja ekinlerine ideg etmek, ýetişdirilen hasyly zaýasyz ýygnap almak işleriniň wagtynda geçirilmegine pugta gözegçilik etmegi, 25-nji maýda welaýatlardaky orta mekdeplerde «Soňky jaň» dabarasyny guramaçylykly geçirmek üçin zerur çäreleri görmegi tabşyrdy.

Hormatly Prezidentimiz Serdar Berdimuhamedow iş maslahatyny jemläp, oňa gatnaşanlara berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Şu gün Garaşsyz, baky Bitarap Türkmenistanda ählihalk baýramy — Watanymyzyň özygtyýarlylygyny, halkymyzyň synmaz jebisligini alamatlandyrýan Türkmenistanyň Konstitusiýasynyň we Döwlet baýdagynyň güni bellenilýär. Paýtagtymyz baýramçylyk mynasybetli esasy dabaralaryň geçirilýän merkezine öwrüldi. Bu ýerde hormatly Prezidentimiz Serdar Berdimuhamedowyň gatnaşmagynda Konstitusiýa binasyna hem-de ýurdumyzyň Baş baýdagyna gül goýmak dabaralary boldy.

Ýurdumyzyň hemişelik Bitaraplyk hukuk derejesine eýe bolmagynyň 30 ýyllygyna beslenýän şu ýylyň “Halkara parahatçylyk we ynanyşmak ýyly” şygary astynda geçýändigi bellärliklidir. 2025-nji ýylyň 21-nji martynda Birleşen Milletler Guramasynyň Baş Assambleýasynyň 79-njy sessiýasynyň 61-nji plenar mejlisinde «Türkmenistanyň hemişelik Bitaraplygy» atly Kararnama üçünji gezek kabul edildi. Munuň özi Garaşsyz Watanymyza, onuň Konstitusiýasyna we Döwlet baýdagyna bolan buýsanjymyzy artdyran ýene bir şanly waka öwrüldi.

Döwlet Baştutanymyzyň baýramçylyk mynasybetli halkymyza iberen Gutlagynda bellenilişi ýaly, Türkmenistanyň Konstitusiýasy we Döwlet baýdagy biziň asyrlaryň dowamynda kemala gelen milli döwletliligimiziň hem-de buýsanjymyzyň gözbaşydyr, abraý-mertebämiziň dünýä dolan belentligidir, abadançylygymyzyň we beýik ösüşlerimiziň dabaralanmasydyr. Watansöýüjilik duýgusyny, döredijilik hyjuwyny, zähmet joşgunyny belende göterýän mukaddeslikler hökmünde aýratyn sarpa goýýan Esasy Kanunymyzyň hem-de Döwlet baýdagymyzyň galkyndyryjy güýji bilen bu gün — Berkarar döwletiň täze eýýamynyň Galkynyşy döwründe ajaýyp geljegimizi gurýarys.

...Ir bilen Köpetdagyň etegindäki ajaýyp künjekde seleňläp görünýän Konstitusiýa binasynyň öňünde baýramçylyk dabaralary badalga aldy. Ildeşlerimiziň aýratyn hormat bilen garaýan bu baýramy ýokary watançylyk ruhuny döretmek bilen, halkymyzy täze zähmet üstünliklerine ruhlandyrýar. Dabara gatnaşyjylaryň hatarynda Mejlisiň Başlygy, Ministrler Kabinetiniň Başlygynyň orunbasarlary, ministrlikleriň, pudaklaýyn dolandyryş, harby we hukuk goraýjy edaralaryň, jemgyýetçilik guramalarynyň, daşary döwletleriň we halkara guramalaryň Türkmenistandaky diplomatik wekilhanalarynyň, köpçülikleýin habar beriş serişdeleriniň ýolbaşçylarydyr wekilleri, hormatly ýaşulular, eneler, talyplar, paýtagtymyzyň köp sanly ýaşaýjylary bar.

Hormatly Prezidentimiziň awtoulagy binanyň öňündäki baýramçylyk görnüşinde bezelen ýere gelýär. Hemmeler uly ruhubelentlik bilen döwlet Baştutanymyzy mübärekleýärler. Hormatly Prezidentimiz haly düşelen ýoda boýunça ugraýar. Onuň ugrunda Watan goragçylary hatara düzülipdir. Ýaş nesliň wekilleriniň ellerinde Türkmenistanyň Döwlet baýdagy parlaýar.

Döwlet Baştutanymyz Konstitusiýa binasynyň öňündäki meýdançada gurnalan ýörite ýere geçýär. Türkmenistanyň Döwlet senasy ýaňlanýar. Arkadagly Gahryman Serdarymyz berkarar Watanymyzyň döwlet binýatlarynyň, demokratik esaslarynyň, köpasyrlyk halk häkimiýetliligi ýörelgeleriniň mizemezligini alamatlandyrýan Konstitusiýa binasyna gül çemenini goýýar.

Pederlerimiziň ruhy mirasymyz baradaky pikirleri, nesillerine wesýet eden Watany söýmek, oňa wepaly gulluk etmek, hoşniýetlilik, adalatlylyk ýaly asylly ýörelgeleri Esasy Kanunymyzyň özenini düzýär. Şonuň üçin-de halkymyz gadymy taryhynyň şan-şöhratyna oňat düşünip, bu ajaýyp baýramy bellemek bilen, ata-babalarymyzyň ýörelgelerine uly hormat-sarpa goýýar. Hormatly Prezidentimiziň göreldesine eýerip, Mejlisiň Başlygy, Hökümet agzalary, ministrlikleriň, pudaklaýyn dolandyryş edaralarynyň, harby we hukuk goraýjy edaralaryň ýolbaşçylary, hormatly ýaşulular, jemgyýetçilik guramalarynyň wekilleri, dabara gatnaşyjylaryň ählisi gül desselerini we çemenlerini goýýarlar.

Ýurdumyzyň Esasy Kanunynyň hormatyna gurlan bu bina demokratik, hukuk we dünýewi döwletimiziň berkararlygynyň mizemez esaslaryny özünde jemleýän, halkymyzyň agzybirligini, jebisligini, ýurdumyzyň abraýynyň has-da belende göterilmeginiň bähbidine beýik işleri durmuşa geçirmäge taýýardygyny, Watanymyzyň kuwwatyny, gülläp ösüşini alamatlandyrýan özboluşly nyşana öwrüldi. Gahryman Arkadagymyzyň “Döwlet adam üçindir!” diýen baş ýörelgesi hem-de hormatly Prezidentimiziň “Watan diňe halky bilen Watandyr! Döwlet diňe halky bilen döwletdir!” diýen şygary durmuş ugurly we toplumlaýyn ösüşiň durnuklylygyny üpjün edýän häzirki döwrümiziň jemgyýetçilik ösüşiniň nusgasyny kesgitledi. Türkmenistanyň Konstitusiýasy adamy jemgyýetiň we döwletiň iň ýokary gymmatlygy diýip yglan etmek bilen, şahsyýetiň erkin ösmegi üçin şertleriň döredilmegini üpjün edýär hem-de raýatyň janyny, at-abraýyny, mertebesini, azatlygyny, şahsy eldegrilmesizligini, tebigy we aýrybaşgalanmaz hukuklaryny goraýar. Bu ýörelge Türkmenistanyň Mejlisiniň kanun çykaryjylyk işiniň baş ugruny kesgitleýär. Konstitusiýamyzyň binýadynda birnäçe kanunlar kabul edilip, olarda konstitusion hukuklar has-da ösdürildi we kepillendirildi.

Watanymyzyň Bitaraplygynyň şanly 30 ýyllygynyň dabaraly bellenilýän ýylynda halkymyz ýurdumyzyň durmuş-ykdysady ösüşiniň belent sepgitlerine buýsanmaga haklydyr. Bu üstünlikler döwletimiziň çuňňur oýlanyşykly içeri we daşary syýasatyny ildeşlerimiziň doly goldamagy, giň gerimli özgertmeler işine işjeň gatnaşmagy netijesinde gazanyldy.

...Tiz wagtda ajaýyp binanyň töweregi hoşboý ysly ajaýyp ter gül desseleri bilen örtüldi. Olar türkmenistanlylaryň belent watansöýüjilik duýgularynyň aýdyň beýanydyr.

Konstitusiýa binasyna gül goýmak dabarasy tamamlanandan soňra, dabaralar Baş baýdak meýdançasynda dowam etdi. Bu ýerde oturdylan belent baýdak sütüninde Türkmenistanyň Döwlet tugy buýsançly parlaýar.

Asuda asmany bezeýän Watanymyzyň ýaşyl tugy türkmen halkynyň döwlet gurmak baradaky köpasyrlyk arzuwynyň hasyl bolmagydyr, ýurdumyzyň Garaşsyzlygynyň we özygtyýarlylygynyň binýadynyň mizemezliginiň, agzybir halkymyzyň parahatçylyk, döredijilik, ynsanperwerlik, hoşniýetlilik ýörelgelerine üýtgewsiz ygrarlydygynyň nyşanydyr. Arkadag şäherinde, welaýat merkezlerinde we “Awaza” milli syýahatçylyk zolagynda ýaşyl baýdagymyz parlaýan belent sütünleriň gurulmagy halkymyzyň milli tugumyza mukaddeslik hökmünde belent sarpa goýýandygynyň aýdyň beýanydyr.

...Hormatly Prezidentimiz Serdar Berdimuhamedowyň awtoulagy Baş baýdak meýdançasynyň öňünde saklanýar. Bu ýere ýygnananlar döwlet Baştutanymyzy mähirli mübärekleýärler. Türkmenistanyň Döwlet senasy belentden ýaňlanýar.

Hormatly Prezidentimiz belent baýdak sütüniniň öňünde ajaýyp gül çemenini goýýar. Soňra döwlet Baştutanymyzyň göreldesine eýerip, dabara gatnaşyjylar hem gül desselerini goýýarlar.

Häzirki wagtda Türkmenistanyň Döwlet baýdagy ýurdumyzyň oňyn Bitaraplyk, hoşniýetli goňşuçylyk, sebit we ählumumy derejede dostlukly gatnaşyklary ösdürmek, netijeli hyzmatdaşlyk ýörelgelerine esaslanýan daşary syýasatynyň esasy ugurlarynyň nyşany bolup, bütin dünýäde giňden tanalýar. Gahryman Arkadagymyz tarapyndan başy başlanan bu öňdengörüjilikli strategiýanyň häzirki döwürde döwlet Baştutanymyz tarapyndan üstünlikli dowam etdirilmegi Watanymyzyň halkara giňişlikdäki abraýynyň has-da ýokarlanmagyny şertlendirdi. Ýurdumyzyň 1995-nji ýylda hemişelik Bitaraplyk hukuk derejesine eýe bolmagy bilen, ýaşyl tugumyzy halkymyzyň köpasyrlyk parahatçylyk söýüjilik däplerini alamatlandyrýan goşa zeýtun baldajygynyň şekili bezeýär. Häzirki wagtda Döwlet baýdagymyz ýurdumyzyň parahatçylyk söýüjilikli syýasatynyň nyşany bolup, Birleşen Milletler Guramasynyň ştab-kwartirasynyň we beýleki iri halkara guramalaryň binalarynyň öňünde buýsançly parlaýar.

Berkarar döwletiň täze eýýamynyň Galkynyşy döwründe mukaddes tugumyzyň saýasynda ägirt uly özgertmeler üstünlikli amala aşyrylýar, durmuş ulgamynyň ähli ugurlarynda belent sepgitlere ýetilýär. Ak mermerli paýtagtymyzyň keşbi düýpgöter özgerip, ýurdumyzyň ähli şäherleri we obalary ajaýyp görnüşe eýe bolýar, Watanymyzyň ykdysady kuwwaty pugtalanyp, halkymyzyň durmuş derejesi ýokarlanýar.

Dabara tamamlanandan soňra, hormatly Prezidentimiz hemmeler bilen mähirli hoşlaşyp, bu ýerden ugrady.

***

Şu gün Türkmenistanyň Konstitusiýasynyň we Döwlet baýdagynyň güni mynasybetli ýurdumyzyň ähli künjeklerinde-de dabaralar geçirildi. Olara belli artistler, aýdym-saz, tans we folklor toparlary gatnaşdylar. Dabaralarda Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ösüşiň täze belentliklerine tarap öňe barýan Garaşsyz, hemişelik Bitarap Watanymyzy, halkymyzyň jebisligini we agzybirligini wasp edýän ajaýyp aýdymlar ýaňlandy.

Eziz watandaşlar!

Hormatly adamlar!

Sizi Garaşsyzlygymyzyň hem-de Bitaraplygymyzyň mizemez esaslaryny özünde jemleýän, agzybirligimizi we jebisligimizi, parahatçylyk hem-de dostluk taglymatlaryna üýtgewsiz ygrarlydygymyzy dabaralandyrýan Türkmenistanyň Konstitusiýasynyň hem-de Döwlet baýdagynyň güni mynasybetli tüýs ýürekden gutlaýaryn. Her bir güni şanly wakalara beslenýän Halkara parahatçylyk we ynanyşmak ýylynda hem bu milli baýrama bagyşlanan göwün joşduryjy dabaralaryň eziz Watanymyzyň gülläp ösmegi üçin yhlasly zähmet çekýän, döredýän, gurýan mähriban halkymyzyň bagtyýar durmuşyna gaýtalanmajak öwüşgin çaýjakdygyna berk ynanýaryn.

Türkmenistanyň Konstitusiýasy we Döwlet baýdagy biziň asyrlaryň dowamynda kemala gelen milli döwletliligimiziň hem-de buýsanjymyzyň gözbaşydyr, abraý-mertebämiziň dünýä dolan belentligidir, abadançylygymyzyň we beýik ösüşlerimiziň dabaralanmasydyr. Watansöýüjilik duýgusyny, döredijilik hyjuwyny, zähmet joşgunyny belende göterýän mukaddeslikler hökmünde aýratyn sarpa goýýan Esasy Kanunymyzyň hem-de Döwlet baýdagymyzyň galkyndyryjy güýji bilen bu gün — Berkarar döwletiň täze eýýamynyň Galkynyşy döwründe ajaýyp geljegimizi gurýarys. Şoňa görä-de, milli senenamamyzda aýratyn orun tutýan bu baýramçylyk mynasybetli Aşgabat şäherindäki Konstitusiýa binasynda we Baş baýdak meýdançasynda, Arkadag şäheriniň, welaýat merkezleriniň hem-de «Awaza» milli syýahatçylyk zolagynyň Baş baýdak meýdançalarynda, ähli şäherdir obalarymyzda eziz Watanymyzyň ösüşine, oňyn özgertmelerine bagyşlanan maslahatlar, aýdym-sazly medeni-jemgyýetçilik çäreleri geçirilip, adamy jemgyýetiň we döwletiň beýik gymmatlygy hökmünde ykrar edýän Konstitusiýamyza, agzybirligimiziň we jebisligimiziň, parahatçylyk söýüjilik, dostluk we hoşniýetli goňşuçylyk ýörelgelerimiziň mukaddes nyşany bolup belentde parlaýan Döwlet baýdagymyza bolan sarpamyzy we söýgimizi dabaralandyrýarys. Bularyň ählisi Esasy Kanunymyzy hem-de Döwlet baýdagymyzy beýikligiň we mukaddesligiň täze derejesine götermek bilen, jemgyýetimizde egsilmez guwanç we buýsanç duýgularyny döredýär. Biziň parahatçylyk söýüjilik, dostluk we ynsanperwerlik ýörelgelerimizi dünýä ýaýýar, mähriban halkymyzy beýik maksatlara alyp barýan rowana ýollarymyzda has-da jebisleşdirýär.

Hormatly adamlar!

Biz döwlet we syýasy gurluşyň milli hem-de dünýä tejribesiniň esaslaryny, umumadamzat gymmatlyklary siňdirilen Esasy Kanunymyza daýanyp, şeýle hem ýaşyl tugumyzyň astynda ýurdumyzyň döwlet we jemgyýetçilik durmuşyny demokratiýalaşdyrýarys. Mähriban halkymyzyň bagtyýar we abadan durmuşda ýaşamagynyň, Garaşsyz Watanymyzyň gülläp ösmeginiň hatyrasyna giň gerimli özgertmelerimizi üstünlikli amala aşyrýarys. Eziz Watanymyzyň abadan we bagtyýar geljegi üçin agzybirlikde milli maksatnamalarymyzy amala aşyryp, halkara derejede ykrar edilýän ýokary ykdysady ösüşleri gazanýarys. Döwlet ähmiýetli Arkadag şäheriniň gurluşygynyň ikinji tapgyryny, sebitlerimizde häzirki zaman obalary, şäherçeleri, kiçi, orta we iri senagat önümçiliklerini, ýokary tizlikli awtomobil ýollaryny gurup, gülläp ösüşleriň, bagtyýar durmuşyň, döredijilikli zähmetiň gaýnap-joşýan mekanynyň, ynsan arzuwlarynyň hasyl bolýan ýurdunyň — Türkmenistanyň abraýyny has-da belende göterýäris. Berkarar döwletiň täze eýýamynyň Galkynyşy döwründe demokratik we adalatly jemgyýetimizi has-da kämilleşdirmek, adam hakyndaky aladany, il-ýurt bähbitlerini ileri tutup, täze sepgitlere tarap ynamly gadamlar bilen öňe gideris.

Hormatly adamlar!

Biz Birleşen Milletler Guramasy tarapyndan üç gezek ykrar edilen we Konstitusiýamyzda hemişelik berkidilen hemişelik Bitaraplygymyzyň esasy ýörelgelerinden hem-de maksatlaryndan ugur alyp, daşary ýurt döwletleri, halkara guramalar bilen köpugurly gatnaşyklary ýola goýýarys. Hyzmatdaşlygyň täze, netijeli ugurlaryny ösdürmek babatda toplanan gymmatly tejribelerimize daýanyp, eziz Watanymyzyň dünýä bileleşigindäki ornuny yzygiderli pugtalandyrýarys. Bu gün dünýä bileleşigi biziň ýurdumyzyň halkara gatnaşyklar ulgamyndaky belent abraýyna uly sarpa goýýar we häzirki zamanyň örän möhüm meseleleri boýunça öňe sürýän başlangyçlaryny işjeň goldaýar. 2025-nji ýylyň 21-nji martynda Birleşen Milletler Guramasynyň Baş Assambleýasynyň 79-njy sessiýasynyň 61-nji umumy mejlisinde kabul edilen «Türkmenistanyň hemişelik Bitaraplygy» atly Kararnama biziň parahatçylygyň we dostlugyň berkarar bolmagy ugrundaky tagallalarymyzy bütin dünýä äşgär edip, halkara syýasy, ykdysady, medeni-ynsanperwer gatnaşyklar üçin täze mümkinçilikleri açýar. Geljekde hem biziň iň beýik maksadymyz demokratik, hukuk we dünýewi döwletimiziň dünýä ösüşindäki eýeleýän ornuny, Ýer ýüzünde parahatçylygy we dostlugy hemmetaraplaýyn pugtalandyrmakdan ybarat bolar.

Eziz watandaşlar!

Hormatly adamlar!

Sizi Türkmenistanyň Konstitusiýasynyň we Döwlet baýdagynyň güni bilen ýene-de bir gezek tüýs ýürekden gutlaýaryn. Size berk jan saglygyny, uzak ömür, asuda we abadan durmuş, egsilmez bagt, eziz Watanymyzyň mundan beýläk-de gülläp ösmegi ugrunda alyp barýan işleriňizde uly üstünlikleri arzuw edýärin.

Türkmenistanyň Prezidenti

Serdar Berdimuhamedow.