«Awaza» milli syýahatçylyk zolagynda BMG-niň Zenanlar düzüminiň Merkezi Aziýadaky aragatnaşyk edarasynyň ýolbaşçysy bilen duşuşyk geçirildi2026-njy ýylyň 8-nji oktýabrynda «Awaza» milli syýahatçylyk zolagynda geçirilýän halkara çäreleriň çäklerinde Türkmenistanyň Mejlisiniň Ylym, bilim, medeniýet we ýaşlar syýasaty baradaky komitetiniň başlygy B.Myradowa bilen BMG-niň Zenanlar düzüminiň Merkezi Aziýadaky aragatnaşyk edarasynyň ýolbaşçysy hanym Jeren Güwen Gureşiň duşuşygy boldy.

Duşuşygyň başynda myhman «Awaza» milli syýahatçylyk zolagynda guralan halkara çäreleriň ýokary derejede guramaçylykly geçirilendigi hem-de gatnaşmaga döredilen giň mümkinçilikler üçin Türkmenistanyň hormatly Prezidentine hem-de türkmen halkynyň Milli Liderine çuňňur hoşallyk bildirip, köp sagbolsun aýtdy.

Duşuşykda «Parahatçylygy saklamakda we durnukly ösüşe ýetmekde zenanlaryň orny» atly Halkara zenanlar dialogynyň sebitde we ählumumy derejede parahatçylygy, ynanyşmagy, durnukly ösüşi üpjün etmekde, döwlet we jemgyýetçilik durmuşynyň ähli ugurlarynda, şeýle hem gender deňligini gazanmakda zenanlaryň ornuny berkitmekde we mümkinçiliklerini has-da giňeltmekde uly ähmiýete eýedigi nygtaldy. Şeýle hem gender deňligini üpjün etmek, zenanlaryň hukuklaryny we mümkinçiliklerini giňeltmek maksady bilen, «Türkmenistanda gender deňligi boýunça 2026 – 2030-njy ýyllar üçin Hereketleriň milli meýilnamasynyň» üstünlikli durmuşa geçirilýändigi bellenilip geçildi.

Birleşen Milletler Guramasy ýaly abraýly halkara guramalaryň çäklerinde ýola goýlan hyzmatdaşlyk gatnaşyklarynyň aýratyn ähmiýeti nygtaldy. Zenanlaryň döwletiň we jemgyýetiň durmuşyndaky ornuny ýokarlandyrmakda, olaryň hukuklaryny we mümkinçiliklerini giňeltmekde,  başlangyçlaryny goldamakda, iş bilen üpjünçiligini gowulandyrmakda tagallalaryň utgaşdyrylmagynyň ähmiýeti dogrusynda aýratyn durlup geçildi hem-de bu ugurda Türkmenistanyň öňe sürýän oňyn başlangyçlaryna, durmuşa geçirýän giň gerimli işlerine ýokary baha berildi.

2026-njy ýylyň 8-nji oktýabrynda «Awaza» milli syýahatçylyk zolagynda guralan halkara çäreleriň çäklerinde Türkmenistanyň Mejlisiniň Ylym, bilim, medeniýet we ýaşlar syýasaty baradaky komitetiniň başlygy B.Myradowa bilen Türkiýe Respublikasynyň Beýik Millet Mejlisiniň agzalarynyň duşuşygy boldy.

Duşuşygyň barşynda myhmanlar «Awaza» milli syýahatçylyk zolagynda geçirilen «Parahatçylygy saklamakda we durnukly ösüşe ýetmekde zenanlaryň orny» atly Halkara zenanlar dialogynyň, «Ählumumy saglygy goraýyş hyzmatlary we durnukly ösüş maksatlary» atly ikinji halkara maslahatyň, şeýle-de «Demografik prosesler we durnukly ösüş: häzirki zamanyň wezipeleri we halkara tejribesi» atly halkara maslahatyň guramaçylykly, ýokary derejede geçirilendigini bellemek bilen, oňa gatnaşmaga döredilen giň mümkinçilikler üçin Türkmenistanyň hormatly Prezidentine hem-de türkmen halkynyň Milli Liderine çuňňur hoşallyk bildirip, köp sagbolsun aýtdylar.

Duşuşykda ikitaraplaýyn esasda döredilen parlamentara dostluk toparlarynyň kanunçykaryjylyk işinde tejribe alyşmakda mümkinçilikleri artdyrýandygy aýratyn bellenildi. Şunuň bilen birlikde, iki ýurduň arasyndaky syýasy-diplomatik, söwda-ykdysady we    medeni-ynsanperwer ugurlardaky gatnaşyklaryň häzirki derejesi, özara ynanyşmagy berkitmekde, hoşniýetli hyzmatdaşlygyň gerimini giňeltmekde tagallalary birleşdirmegiň ähmiýeti barada pikir alşyldy.

Türkmenistanyň başlangyjy bilen, Birleşen Milletler Guramasynyň Baş Assambleýasy tarapyndan kabul edilen «2028-nji ýyl – Halkara hukuk ýyly» atly Kararnamanyň bütin dünýäde halkara hukugyň ornuny ýokarlandyrmakda, ählumumy parahatçylygy we howpsuzlygy üpjün etmekde, Durnukly ösüş maksatlaryna ýetmekde, netijeli köptaraplaýyn hyzmatdaşlygy ösdürmekde möhüm ähmiýete eýe boljakdygy nygtaldy. 

Şu gün hormatly Prezidentimiz Serdar Berdimuhamedow iş sapary bilen Balkan welaýatyna ugrady. Döwlet Baştutanymyz ir bilen paýtagtymyzyň Halkara howa menziline geldi. Howa menzilinden hormatly Prezidentimiz Türkmenbaşy şäherine tarap ugrady.

Biraz wagtdan döwlet Baştutanymyzyň uçary Türkmenbaşy şäheriniň Halkara howa menziline gondy. Bu ýerde hormatly Prezidentimiz mähirli garşylanyldy.

Arkadagly Gahryman Serdarymyz hemmelere üstünlikleri arzuw edip, bu ýerden “Awaza” milli syýahatçylyk zolagyna tarap ugrady.

Habaryň resmi çeşmesi: (“Türkmenistanyň Döwlet habarlar agentligi” web-saýty)

Şu gün hormatly Prezidentimiz Serdar Berdimuhamedow bilen Russiýa Federasiýasynyň Prezidenti Wladimir Putiniň arasynda telefon arkaly söhbetdeşlik boldy.

Döwlet Baştutanymyz Prezident Wladimir Putini doglan güni mynasybetli tüýs ýürekden gutlap, oňa berk jan saglyk, bagtyýarlyk we abadançylyk, Russiýanyň halkynyň bähbidine alyp barýan döwlet işlerinde uly üstünlikleri arzuw etdi. Şeýle hem hormatly Prezidentimiz türkmen-rus gatnaşyklaryny ösdürmäge berýän şahsy ünsi we hemmetaraplaýyn goldawlary üçin Russiýa Federasiýasynyň Prezidentine tüýs ýürekden minnetdarlyk bildirdi.

RF-niň Prezidenti gutlaglar üçin hoşallyk bildirip, Russiýa bilen Türkmenistanyň arasyndaky gatnaşyklaryň deňhukuklylyk, özara hormat goýmak we hoşniýetli goňşuçylyk ýörelgelerine esaslanýandygyny aýtdy. Şeýle-de Wladimir Putin döwletara dialogy pugtalandyrmakda döwlet Baştutanymyzyň uly goşandyny belledi hem-de pursatdan peýdalanyp, Gahryman Arkadagymyza mähirli salamyny we iň gowy arzuwlaryny beýan etdi.

Söhbetdeşligiň dowamynda nygtalyşy ýaly, Russiýa Federasiýasy bilen strategik hyzmatdaşlygy yzygiderli ösdürmek Türkmenistanyň daşary syýasatynyň esasy ugurlarynyň biri bolmagynda galýar. Iki ýurduň arasyndaky däp bolan dostlukly gatnaşyklar köpasyrlyk dostluga, ynanyşmaga we özara düşünişmek ýörelgelerine esaslanýar. Hyzmatdaşlyk edilip gelinýän ýyllaryň dowamynda ähli ugurlar boýunça özara gatnaşyklaryň baý tejribesi toplanyldy we ýokary netijeler gazanyldy.

Türkmenistan bilen Russiýa Federasiýasy giň ugurlar boýunça, ilkinji nobatda, syýasy-diplomatik, söwda-ykdysady we medeni-ynsanperwer ulgamlarda ýakyn hyzmatdaşlyk edýärler. Ýurtlarymyzyň arasynda ýokary döwlet derejesinde yzygiderli netijeli dialog, işjeň hökümetara we pudagara hyzmatdaşlyk alnyp barylýar. Türkmenistan we Russiýa Federasiýasy BMG we GDA ýaly halkara guramalaryň çäklerinde hem üstünlikli hyzmatdaşlyk edýärler. Şunuň bilen baglylykda, döwlet Baştutanymyz «Awaza» milli syýahatçylyk zolagynda Wladimir Putin bilen ikitaraplaýyn gün tertibiniň wajyp meseleleri boýunça pikir alyşmaga mümkinçilik döretjek duşuşygyň geçiriljekdigini aýtdy.

Şeýle hem hormatly Prezidentimiz GDA-nyň döwlet Baştutanlarynyň Geňeşiniň mejlisine we Hazar ekologiýa sammitine gatnaşjakdyklaryny belläp, öňde boljak duşuşyklaryň GDA-nyň giňişliginde netijeli dialogy has-da pugtalandyrmaga ýardam etjekdigine hem-de Hazar sebitiniň ekologiýa durnuklylygyny üpjün etmäge uly goşant boljakdygyna ynam bildirdi.

Telefon arkaly söhbetdeşligiň ahyrynda hormatly Prezidentimiz Serdar Berdimuhamedow we Russiýa Federasiýasynyň Prezidenti Wladimir Putin birek-birege berk jan saglyk, işlerinde mundan beýläk-de üstünlikleri, iki ýurduň dostlukly halklaryna bolsa abadançylyk, rowaçlyk arzuw etdiler.

Habaryň resmi çeşmesi: (“Türkmenistanyň Döwlet habarlar agentligi” web-saýty)